រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិដ៏កក្រើករបស់ក្រុមហ៊ុនភេសជ្ជៈប៉ូវកម្លាំងបាកាស កាលពីថ្ងៃព្រហស្បតិ៍ ទី២៨ សីហា កីឡាករជើងខ្លាំងថៃ Noppakao ដែលមិនធ្លាប់ចាញ់សោះក្រោមដៃកីឡាករជើងខ្លាំងកម្ពុជា បានសម្រេចចិត្តបោះបង់ការប្រកួត ដោយគ្រាន់តែភ្លាត់ឱ្យរយះលើភ្នែក ។ ពាក់ព័ន្ធនឹងហេតុផលនេះ ភាគីថៃបានបញ្ជាក់ពីមូលហេតុដែលនាំទៅដល់ការសម្រេចចិត្តបែបនោះ ។
រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិដ៏កក្រើករបស់ក្រុមហ៊ុនភេសជ្ជៈប៉ូវកម្លាំងបាកាស កាលពីថ្ងៃព្រហស្បតិ៍ ទី២៨ សីហា កីឡាករជើងខ្លាំងថៃ Noppakao ដែលមិនធ្លាប់ចាញ់សោះក្រោមដៃកីឡាករជើងខ្លាំងកម្ពុជា បានសម្រេចចិត្តបោះបង់ការប្រកួត ដោយគ្រាន់តែភ្លាត់ឱ្យរយះលើភ្នែក ។ ពាក់ព័ន្ធនឹងហេតុផលនេះ ភាគីថៃបានបញ្ជាក់ពីមូលហេតុដែលនាំទៅដល់ការសម្រេចចិត្តបែបនោះ ។
គ្មានអ្នកណាមិនដឹងនោះទេថា ជើងខ្លាំងផ្នែកប្រដាល់សេរីជាជនជាតិថៃឈ្មោះ Noppakao ធ្លាប់បង្ហាញខ្លួននៅលើសង្វៀនអន្តរជាតិក្នុងប្រទេសកម្ពុជាចំនួន២លើក ហើយទទួលជ័យជម្នះទាំងពីរលើក ។ ការប្រកួតលើកទី១ លោកបានបំបាក់ជើងខ្លាំង ពេជ្រ អារុណ ឱ្យសន្លប់ក្នុងទឹកទី២ និងលើកទី២ បានបំបាក់កីឡាករល្បីឈ្មោះរបស់កម្ពុជា លៀង ស៊ីពេជ្រ ឱ្យសន្លប់ក្នុងទឹកទី៤ ។ ក្នុងចំណោមការប្រកួត៦៤លើក Noppakao ឈ្នះ៥១លើក និងមានតួលេខឈ្នះកីឡាករខ្លាំងៗស្ទើរតែគ្រប់ការប្រកួតនៅបុ៉ន្មានលើកចុងក្រោយ ។
ក្នុងការប្រកួតជាមួយ ពុធ ហ៊ុច មកពីក្លិបពុទ្ធសេរីវង្សកីឡានោះ ជើងខ្លាំងកម្ពុជាបានត្រឹមតែទប់ និងការពារចំពោះស្នៀតវាយលុករបស់ Noppakao តែបុ៉ណ្ណោះ ដោយសារតែ Noppakao ជាអ្នកគ្រប់គ្រងការវាយសម្រុកបានល្អ ។ ឆ្លងផុត២ទឹក បង្គោលក្រហម ពុធ ហ៊ុច រកមិនឃើញចំណុចខ្សោយរបស់គូប្រកួតនោះទេ ដោយត្រូវកីឡាករថៃវាយឡើងទ្រមខ្លួន និងដួលជាច្រើនលើក ជាពិសេសគ្រប់ពេលចូលកៀក គឺរមែងត្រូវស្វាគមន៍ដោយរន្ទះជើង និងម៉ាត់ចំប្លង់ល្អៗជាប្រចាំ ។ Noppakao ត្រូវអ្នកទស្សនាមើលឃើញថា នៅតែរឹងជំហរ និងរស់រវើកគ្រប់ស្នៀតនៅពេលប៉ះជាមួយ ពុធ ហ៊ុច លើកនេះ ។ ទាំងការគេច ការវាយបក និងបច្ចេកទេសក្នុងការកាច់បំបាក់គូប្រកួត គឺកីឡាករឆ្លងដែនមកពីថៃរូបនេះឈ្នះ ពុធ ហុ៊ច ទាំងអស់ ។ ការប្រកួតដែលបានធ្វើឡើងនៅលើសង្វៀនទូរទស្សន៍អាស៊ីអាគ្នេយ៍នោះមានអ្នកទស្សនាស្រែកហ៊ោកញ្ជ្រៀវគ្រប់លើកនៅពេលកីឡាករកម្ពុជាទប់ជាប់មួយស្នៀតៗរបស់ Noppakao ហើយអាចវាយបកទៅវិញបានខ្លះៗ។
សំឡេងនេះកាន់តែឮខ្លាំងបន្ថែមទៀតនៅចុងទឹកទី៣ ខណៈដែលកីឡាករពុធ ហុ៊ច វាយសម្រុកចូលមួយកែងពេញទំហឹងធ្វើឱ្យ Noppakao រយះលើភ្នែកខាងស្តាំបណ្តាលឱ្យហូរឈាម។ ជើងខ្លាំង Noppakao បានប្រកាសឈប់ប្រកួតភ្លាមៗ បន្ទាប់ពីដឹងថា ខ្លួនមានរបួសរយះហូរឈាម ដែលការពិតសភាពនៃរបួសនោះ ប្រសិនបើលោកបន្តការប្រកួត ក៏នៅតែអាចធ្វើព្យុះធ្វើភ្លៀង រុញឱ្យ ពុធ ហ៊ុច ពិបាកខ្លួនដដែល ។ មន្ត្រីតំណាងជនជាតិថៃនិយាយថា សភាពបែករយះរបស់ Noppakao មិនមែនជាហេតុផលដែលធ្វើឱ្យកីឡាកររបស់ខ្លួនបន្តការប្រកួតមិនបាននោះទេ បុ៉ន្តែមកពី Noppakao ខ្លួនឯងហួសចិត្តដែលភ្លាត់ឱ្យបែកក្នុងពេលដែលខ្លួនជាអ្នកឈ្នះប្រៀបនោះ ទើបខឹងចិត្តហើយឈប់ប្រកួតតែម្តង ។ Noppakao គឺជាអ្នកលើកដៃមិនបន្តការប្រកួតខ្លួនឯង បើទោះជាមានការជជីកសួរម្តងជាពីរដងពីលោកអាជ្ញាកណ្តាល និងមានការជំរុញពីសំណាក់អ្នកដឹកនាំរបស់គេពីខាងក្រោមក្តី ។
អ្នកទស្សនាភាគច្រើនសុទ្ធតែមើលឃើញថា បើ Noppakao មិនភ្លាត់ឱ្យរយះ ហើយខឹងចិត្តរហូតបោះបង់ការប្រកួតទេ កីឡាករពុធ ហ៊ុច អាចជាអ្នកគ្មានសំណាងនោះទេ ដោយសារតែការប្រកួតជិត៣ទឹកដែលបានកើតឡើង ភាគីកម្ពុជាគឺជាអ្នកចាញ់ប្រៀបទាំងស្រុង មិនថាការទទួលរងកណ្តាប់ដៃ និងរឿងត្រូវ Noppakao វាយឱ្យផ្ងារជើងដួលលើរេញប៊ិះនឹងសន្លប់ម្តងៗ។ ទោះជាជ័យជម្នះរបស់ ពុធ ហ៊ុច ត្រូវអ្នកទស្សនាមើលឃើញថា ជារឿងសំណាងដូចខ្មោចឱ្យ ក៏មានន័យថា លោកមានបច្ចេកទេសធ្វើឱ្យបង្គោលខៀវថៃបោះបង់ការប្រកួតនោះដែរ ។ វាក៏ជាលទ្ធផលដែលមានន័យថា ពុធ ហ៊ុច អាចសងសឹកឱ្យមិត្តរួមអាជីព គឺពេជ្រ អារុណ និងលាង ស៊ីពេជ្រ និងអាចបំបាក់ Noppakao នៅលើសង្វៀនអន្តរជាតិរបស់ក្រុមហ៊ុនភេសជ្ជៈប៉ូវកម្លាំងបាកាសជាលើកទី១ ផងដែរ ។
ពីរប្រកួតអន្តរជាតិទៀត កីឡាករឌុន រដ្ឋា មកពីក្លិបអេភូថងកីឡា ចាញ់កីឡាករចិន Bing Yuan ដោយពិន្ទុ និងកីឡាករឈិន ក្វាន់ងុ៉យ មកពីក្លិបមកុដរាជសីហ៍ ផ្តួលកីឡាករថៃ Davara ឱ្យសន្លប់ក្នុងទឹកទី៣ ។ ជ័យជម្នះរបស់ ឈិន ក្វាន់ងុ៉យ រឹតតែត្រូវប្រដូចថាជាខ្មោចឱ្យទៅទៀត ដោយសារតែក្នុងពេលប្រកួត គឺឈិន ក្វាន់ងុ៉យ ត្រូវកីឡាករថៃវាយឱ្យខូចជើង និងប៊ិះសន្លប់ បុ៉ន្តែបែរជាសំណាងវាត់ត្រូវមួយកែងធ្វើឱ្យថៃសន្លប់ក្នុងទឹកទី៣ ៕
ចែករំលែកព័តមាននេះ