រាជធានីភ្នំពេញ ៖ ប្រធានស្តីទីប៉ុស្តិ៍នគរបាលចាក់អង្រែលើ ខណ្ឌមានជ័យ លោក ឈរ បូរិន ដែលត្រូវបានភរិយាទី២របស់ខ្លួន ចាក់នឹងកូនកាំបិតចិតបន្លែ បណ្តាលឲ្យរងរបួសធ្ងន់ បានស្លាប់ហើយកាលពីវេលាម៉ោង២និង៣០នាទីរសៀលថ្ងៃទី២៩ សីហា ។
គួររំលឹកថា លោក ឈរ បូរិន ប្រធានស្តីទីប៉ុស្តិ៍នគរបាលចាក់អង្រែលើ ខណ្ឌមានជ័យ ត្រូវបានភរិយាទី២របស់ខ្លួន ចាក់នឹងកូនកាំបិតចិតបន្លែ បណ្តាលឲ្យរងរបួសធ្ងន់ នៅក្នុងផ្ទះរបស់ខ្លួន ស្ថិតក្នុងព្រែកតាគង់ សង្កាត់ចាក់អង្រែលើ ខណ្ឌមានជ័យ កាលពីវេលាម៉ោង៨និង៣០នាទីយប់ ថ្ងៃទី១៩ សីហា ឆ្នាំ២០១៤។
បន្ទាប់ពីកើតហេតុ លោក ឈរ បូរិន ត្រូវបានអ្នកជិតខាងនិងបងប្អូនដឹងយកទៅសង្គ្រោះបន្ទាន់នៅ មន្ទីរពេទ្យកាល់ម៉ែត្រ ចំណែកស្ត្រីជាភរិយាបានរត់គេចខ្លួនបាត់ ។ ស្ត្រីដែលចាក់ប្តីរបស់ខ្លួនបណ្តាលឲ្យរងរបួសខាងលើនេះ ឈ្មោះ សេង ណៃហៀក ជាកម្មការិនីរោងចក្រកាត់ដេរ រស់នៅក្នុងផ្ទះផ្ទាល់ខ្លួនជាមួយគ្នានឹងលោក បូរិន ។
តាមប្រភពព័ត៌មានឱ្យដឹងថា កន្លងមក លោក ឈរ បូរិន និងនាង សេង ណៃហៀក តែងមានទំនាស់ឈ្លោះប្រកែកគ្នា មិនសូវចុះសម្រុងគ្នាឡើយ ហើយនៅយប់កើតហេតុ ភាគីទាំងពីរក៏បានទាស់ពាក្យសម្តីគ្នាបន្តិចបន្តួច រហូតផ្ទុះហិង្សា ហើយភរិយាទាញកូនកាំបិតចិតបន្លែចាក់ប្តីចំនួន២កាំបិត ក្នុងនោះមួយកាំបិតត្រូវចំពោះ និងមួយកាំបិតទៀតត្រូវចំភ្លៅ បណ្តាលឲ្យរងរបួសធ្លាយពោះវៀន ៕
ចែករំលែកព័តមាននេះ