ក្រោយការចេញផ្សាយវីដេអូមួយដែលបង្ហាញពីអំពើសហាវព្រៃផ្សៃបំផុតរបស់ពួកអ៊ិស្លាមនិយមនៃក្រុមរដ្ឋអ៊ិស្លាម អង្គការក្រៅរដ្ឋាភិបាលស៊ីរី OSDH គូសបញ្ជាក់កាលពីថ្ងៃទី២៨ សីហា ថា ពួកជីហាដនិយមនៃក្រុមរដ្ឋអ៊ិស្លាមបានប្រហារជីវិតទាហានស៊ីរីជាង១៦០នាក់ ក្រោយពីពួកគេវាយដណ្តើមយកបានមូលដ្ឋានគន្លឹះមួយនៅសុីរីមក ។
ក្រោយទទួលការចោទប្រកាន់ពីការសម្លាប់មនុស្សដោយកាត់ក្បាល ការធ្វើទារុណកម្ម និងការប្រព្រឹត្តអំពើយ៉ាងកាចសាហាវនានាក្រុមរដ្ឋអ៊ិស្លាម កាលពីថ្ងៃទី២៧និង២៨សីហា បានប្រហារជីវិតទាហានស៊ីរីជាង១៦០នាក់នៅខេត្តរ៉ាក់កា ដែលក្រុមគេត្រួតត្រា ។ ពេលប្រកាសពីការប្រហារជីវិតនេះវីដេអូមួយរបស់ពួកជីហាដនិយមផ្សាយតាមអុីនធើរណេត បង្ហាញមនុស្សទាំងឡាយដែលជាពួកទាហានស៊ីរី ចាប់បានត្រូវគេប្រហារជីវិតក្នុងតំបន់វាលខ្សាច់មួយ ។
រូបភាពដំបូងនានាបង្ហាញពីមនុស្សវ័យក្មេងជាច្រើនសិបនាក់ ដើរតាមផ្លូវមួយកាត់វាលខ្សាច់ឥតពាកអាវ ដើរជើងទទេ ដៃដាក់លើក្បាលអមដោយពួកជីហាដនិយមប្រដាប់អាវុធ ។ បន្ទាប់មកគេឃើញរូបភាពសាកសពមនុស្សជាច្រើនសិបនាក់តម្រៀបគ្នាផ្កាប់មុខនឹងដី ។ មនុស្សប្រមាណជា១០នាក់ ដែលជាប្រជាជនតំបន់នោះបានឈរមើលសាកសពទាំង ។
យោងតាមលោក Rami Abdel Rahmane នាយករបស់អង្គការ OSDH ថា ទាហានស៊ីរីដែលត្រូវបាញ់សម្លាប់ទាំងនោះ ត្រូវពួកជីហាដនិយមចាប់បានពេលវាយដណ្តើមកាន់កាប់មូលដ្ឋានកងពលលេខ១៧នៅខេត្តរ៉ាក់កា កាលពីដំណាច់ខែកក្កដា និងពេលវាយកាន់កាប់ព្រលានយន្តហោះយោធាតាបាកា កាលពីថ្ងៃទី២៤ សីហា ក្នុងខេត្តដដែល និងក្នុងពេលពួកគេរត់ចេញពីព្រលានយន្តហោះ ឆ្ពោះទៅកាន់មូលដ្ឋាន Esraya ។
ក្រោយវាយយកបានមូលដ្ឋានអាកាសចរណ៍តាបាកា ជាទីតាំងចុងក្រោយរបស់កងទ័ពរដ្ឋាភិបាលស៊ីរី ខេត្តរ៉ាក់កាទាំងមូល ពេលនេះស្ថិតក្រោមការត្រួតត្រារបស់ពួករដ្ឋអ៊ិស្លាម ។លោក Abdel Rahmane គូសបញ្ជាក់ទៀតថា នៅភាគខាងកើតស៊ីរីជិតក្រុង Deir Ezzor បណ្តាយន្តហោះប្រដេញស៊ីរីបានទម្លាក់គ្រាប់បែកសម្លាប់ប្រមុខក្រុមរដ្ឋអ៊ិស្លាមជាច្រើននាក់ ដែលកំពុងប្រជុំក្នុងផ្ទះមួយ ៕
ចែករំលែកព័តមាននេះ