រាជធានីភ្នំពេញ ៖ ហាងសាច់អាំងយីហោផ្ទះតាទេព BBQ (សាខាទី២) ស្ថិតនៅផ្ទះលេខ៩០ ផ្លូវលេខ១៦០ ក្រោយវិទ្យាស្ថានប៊ែលធី ក្នុងសង្កាត់ទឹកល្អក់ទី២ ខណ្ឌទួលគោក ត្រូវបានអគ្គិភ័យឆាបឆេះបន្ទប់ដាក់សម្ភារ បង្កឱ្យមានការភ្ញាក់ផ្អើលកាលពីវេលាម៉ោង១១និង៣០នាទីព្រឹកថ្ងៃទី២៨ សីហា ។ ចំពោះការកើតមានអគ្គិភ័យនេះសមត្ថកិច្ចឱ្យដឹងថា បណ្ដាលមកពីទុស្សេចរន្ដអគ្គិសនី នៅបន្ទប់ជាន់ទី១ ហើយកម្ទេចភ្លើងធ្លាក់លើកម្រាលព្រំ ។
តាមព័ត៌មានឱ្យដឹងថា ហាងសាច់អាំងយីហោផ្ទះតាទេព BBQ (សាខាទី២) បានបើកដំណើរការកាលពីថ្ងៃទី១៥ សីហា កន្លងមក គឺបានប្រមាណជិតកន្លះខែហើយដែលមានម្ចាស់ឈ្មោះ លឹម បុណ្យវាសនា ភេទប្រុស អាយុ៣៤ឆ្នាំ ។ មុនពេលកើតហេតុ បុគ្គលិកក្នុងហាងកំពុងរៀបចំតុដើម្បីលក់ដូរ ស្រាប់តែឃើញផ្សែងហុយទ្រលោមចេញពីបន្ទប់ជាន់ទី១ ដែលផ្នែកខាងលើនេះ គឺបានចាក់សោទុកចោល ។ ហេតុការណ៍នេះបានបង្កឱ្យមានការភ្ញាក់ផ្អើលឡើង ហើយបុគ្គលិកនាំគ្នាវាយបំបែកកញ្ចក់ យកបំពង់បាញ់ពន្លត់ភ្លើងមកបាញ់ពន្លត់រួមជាមួយអ្នកជិតខាងដែលបានជួយឈឺឆ្អាល ហើយភ្លាមៗរថយន្ដពន្លត់អគ្គិភ័យ១គ្រឿងបានទៅអន្ដរាគមន៍បាញ់ទឹកពន្លត់ ។
ម្ចាស់ហាងបានប្រាប់មន្ដ្រីនគរបាលខណ្ឌថា មូលហេតុដែលកើតមានអគ្គិភ័យនេះបណ្ដាលមកពីទុស្សេចរន្ដអគ្គិសនីចេញពីព្រីភ្លើងនៅជាប់ជញ្ជាំងថ្មនៅបន្ទប់ដាក់អីវ៉ាន់ជាន់ទី១ ហើយកម្ទេចភ្លើងបានធ្លាក់លើកម្រាលព្រំ ។
ដោយសារតែបន្ទប់នោះមានជញ្ជាំងថ្មភ្លើងបានឆាបអស់តែគ្រឿងក្នុងដោយបំផ្លាញកង់១គ្រឿង កម្រាលព្រំ៣ដុំ ទូឈើ១ និងឆេះរោលៗពិតានម្នាងសិលា និងជញ្ជាំងថ្មតែប៉ុណ្ណោះ ។ ផ្ទះ5ល្វែង ត្រូវអគ្គិភ័យឆាបឆេះធ្ងន់ធ្ងរ3ល្វែង ក្នុងនោះ2ល្វែងជារបស់មន្ដ្រីយោធាខេត្ដបន្ទាយមានជ័យ ៖ ផ្ទះ៣ល្វែងក្នុងចំណោម៥ល្វែង ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ត្រូវបានអគ្គិភ័យឆាបឆេះយ៉ាងសន្ធោសន្ធៅដែលក្នុងនោះ២ល្វែងជារបស់មន្ដ្រីយោធាសឹករងក្រុងប៉ោយប៉ែត និងមន្ដ្រីយោធាការិយាល័យទំនាក់ទំនងព្រំដែនកម្ពុជា-ថៃ ។
ហេតុការណ៍ភ្លើងឆេះនេះ បានកើតឡើងកាលពីវេលាម៉ោង៩និង១០នាទីព្រឹកថ្ងៃទី២៨ សីហា ។ ម្ចាស់ផ្ទះ៣ល្វែងក្នុងចំណោម៥ល្វែងដែលត្រូវភ្លើងឆេះនេះមាន ១-ប្ដីឈ្មោះ កែវ ប្រពន្ធឈ្មោះ ច្រឹប មុខរបរជាកម្មករអូសរទេះ ជាអ្នកជួលស្នាក់នៅ ២-ឈ្មោះ ហេង យូឡេង ភេទប្រុស អាយុ៥២ឆ្នាំ ជាអនុប្រធានការិយាល័យទំនាក់ទំនងព្រំដែនកម្ពុជា-ថៃ ច្រកទ្វារអន្ដរជាតិប៉ោយប៉ែត និង៣-ឈ្មោះ ហង្ស ស៊ីផៃ ហៅប្រុសអាយុ៥២ឆ្នាំ ជាមេបញ្ជាការផ្នែកសឹករងក្រុងប៉ោយប៉ែត ។ ក្រៅពីផ្ទះទាំង៣ល្វែងខាងលើ ផ្ទះ២ល្វែងទៀតដែល១ល្វែងជាប់ពីខាងលិចទីតាំងកើតហេតុជារបស់លោក វង្ស សារី នាយរងការិយាល័យនគរបាលប្រឆាំងបទល្មើសសេដ្ឋកិច្ចខេត្ដ (មិនមានមនុស្សស្នាក់នៅ) ដាក់ស្លាកផ្ទះជួល និងខាងកើតចំណុចកើតហេតុមិនស្គាល់អត្ដសញ្ញាណម្ចាស់ ក៏ត្រូវអគ្គិភ័យឆេះអស់មួយចំនួនដែរ ។
ប្រភពព័ត៌មានពីកន្លែងកើតហេតុ និយាយថា ដំបូងភ្លើងបានឆេះចេញពីទីតាំងផ្ទះជួលដែលប្ដីឈ្មោះកែវ និងប្រពន្ធឈ្មោះច្រឹប ស្នាក់នៅ ហើយបង្កាត់ភ្លើងទុកចោលក្នុងផ្ទះ រួចគ្មានអ្នកនៅ ។ ការឆេះដំបូងនោះ អ្នករស់នៅជុំវិញបានព្យាយាមរត់ទៅជួយពន្លត់គ្រប់គ្នា ប៉ុន្ដែដោយសារពេលកើតហេតុ តាមផ្ទះនីមួយៗបើកក្បាលរ៉ូប៊ីណេទឹកមិនហូរ (គ្មានទឹក) ទើបភ្លើងបន្ដឆេះរាលដាលដល់ផ្ទះមន្ដ្រីយោធាការិយាល័យទំនាក់ទំនងព្រំដែន និងបន្ដឆេះដល់ផ្ទះមេបញ្ជាការរងយោធាសឹករងក្រុងប៉ោយប៉ែត និងផ្ទះ២ល្វែងទៀតនៅខាងលិចនិងខាងកើតទីតាំងកើតហេតុ ។ អាជ្ញាធរនិងសមត្ថកិច្ចបានអន្ដរាគមន៍ហៅរថយន្ដពន្លត់អគ្គិភ័យទាំងខ្មែរ ទាំងថៃចំនួន៧គ្រឿងដែល៥គ្រឿងជារបស់កាស៊ីណូត្រូពីកាណា និងហ្គ្រែនដាយមិនស៊ីធី ១គ្រឿងជារបស់អង្គភាពអធិការដ្ឋាននគរបាលក្រុងប៉ោយប៉ែត និង១គ្រឿងជារបស់អាជ្ញាធរថៃ នៅស្រុកអារញ្ញ ខេត្ដស្រះកែវ ដែលមានទាំងអ្នកយកព័ត៌មានទូរទស្សន៍ប៉ុស្ដិ៍លេខ៧ របស់ថៃមកជាមួយផង បានជួយបាញ់ពន្លត់យ៉ាងសស្រាក់សស្រាំ ទើបអណ្ដាតភ្លើងដែលឆេះសន្ធោសន្ធៅបានស្ងប់ទៅវិញ ។
សមត្ថកិច្ចសន្និដ្ឋានថា ផ្ទះ៣ល្វែងក្នុងចំណោម៥ល្វែងខាងលើខូចខាត៨០% ដោយឡែក២ល្វែងផ្សេងទៀតរងការខូចខាតដែរ ប៉ុន្ដែមិនធ្ងន់ធ្ងរប៉ុន្មានទេ ។ ទោះជាយ៉ាងណា ការឆេះនេះគេមិនទាន់បានទិន្នន័យនៃការខូចខាតពីម្ចាស់ផ្ទះរងគ្រោះនៅឡើយទេ ព្រោះពួកគេរវល់តែមានទុក្ខមិនអាចសួរនាំបានភ្លាមៗឡើយ ។ គួរបញ្ជាក់ថា ផ្ទះដែលឆេះធ្ងន់ធ្ងរទាំង៣ល្វែងធ្វើពីថ្មក្រោមឈើលើ ទំហំ៤ម៉ែត្រគុណ២០ម៉ែត្រ ៕
ចែករំលែកព័តមាននេះ