ខេត្តសៀមរាប ៖ មន្ត្រីអាជ្ញាធរអប្សរាដែលគ្រប់គ្រងរមណីយដ្ឋានអង្គរបានចេញសេចក្តីជូនដំណឹងថា ដើមស្ពង់ធំមួយដើមក្នុងចំណោមដើមឈើដែលដុះចាក់ឫសនៅលើប្រាង្គកំពែងប្រាសាទតាព្រហ្ម នឹងត្រូវបានសម្រេចឱ្យកាត់មួយកំណាត់ចោល ដើម្បីបញ្ចៀសនូវគ្រោះថ្នាក់ជាយថាហេតុ ដល់ភ្ញៀវទេសចរជាតិ និងអន្តរជាតិ ។ ការប្រកាសនេះធ្វើឡើងបន្ទាប់ពីមានឧបទ្ទវហេតុដើមដូងងាប់មួយដើម ដោយសាររន្ទះបាញ់បានបាក់រលំសង្កត់លើបុរសរត់រ៉ឺម៉កម៉ូតូម្នាក់បណ្តាលឱ្យស្លាប់ កាលពីល្ងាចថ្ងៃទី១៧ សីហា និងការសម្រេចកាប់កូនដើមត្នោតចំនួនពីរដើមដែលបានដាំនៅផ្លូវមុខរានហាលច្រកចូលប្រាសាទអង្គរវត្ត កាលពីពេលថ្មីៗ ។
យោងតាមសេចក្តីជូនដំណឹងរបស់អាជ្ញាធរអប្សរាចុះថ្ងៃទី២៧ សីហា ឆ្នាំ២០១៤ ចុះហត្ថលេខាដោយអគ្គនាយកអាជ្ញាធរអប្សរា លោក ប៊ុន ណារិទ្ធិ ចាប់ពីទំព័រទី២ បញ្ជាក់ថា ដើម្បីរក្សាបាននូវសោភ័ណភាព និងលើកតម្លៃរមណីយដ្ឋាន ហើយបញ្ចៀសបាននូវគ្រោះថ្នាក់ជាយថាហេតុផ្សេងៗ អាជ្ញាធរអប្សរាមានកិត្តិយសសូមជម្រាបជូនដំណឹងដល់ប្រជាពលរដ្ឋភ្ញៀវជាតិ-អន្តរជាតិ មគ្គុទ្ទេសក៍ទេសចរណ៍ និងសាធារណជនថា «ក្រោយពីបានតាមដាន និងពិនិត្យជាប្រចាំអំពីដើមឈើមួយចំនួននៅក្នុងប្រាសាទតាព្រហ្ម អ្នកជំនាញផ្នែកព្រៃឈើ និងអភិរក្សប្រាសាទរបស់អាជ្ញាធរអប្សរា ព្រមទាំងមានការចូលរួមពីស្ថាប័នមកពីប្រទេសឥណ្ឌាដែលកំពុងជួសជុលប្រាសាទតាព្រហ្មរួចហើយឃើញថា ដើមស្ពង់មួយដើមបានដុះទ្រេតទៅលើកំពែងប្រាសាទក្បែររានហាលច្រកទិសពាយ័ព្យ ដើមស្ពង់នោះកាលពីមុនផ្នែកអភិរក្សព្រៃឈើបានកាប់លះមែកចេញមួយចំនួនរួចហើយ ព្រមទាំងបានដាក់រន្ទា និងខ្សែកាបទាញដើម្បីទល់ទ្រ និងតាមដានការប្រែប្រួលនៃទម្ងន់ដើមទូទៅរបស់វា ។ ក៏ប៉ុន្តែបច្ចុប្បន្នដើមស្ពង់នេះឫសរបស់វាបានហើបឡើងកាន់តែខ្ពស់ដែលអាចដួលរលំបង្កគ្រោះថ្នាក់ក្នុងពេលណាមួយពុំខាន ប្រសិនបើយើងមិនមានវិធានការទាន់ពេល ។
សេចក្តីជូនដំណឹងដដែលបន្តថា បន្ទាប់ពីបានសិក្សាផលប៉ះពាល់ និងរិះរកវិធានការចំពោះមុខដើមស្ពង់នេះរួចមក អាជ្ញាធរអប្សរាបានសម្រេច និងរុះរើរន្ទា ព្រមទាំងខ្សែកាបចងទប់នោះចេញ ហើយកាត់ដើមស្ពង់នោះមួយកំណាត់ទៀតចេញដើម្បីសម្រួលទម្ងន់សង្កត់ ដោយរក្សាកំណាត់ខាងគល់ឱ្យនៅរស់ដដែល ។ សេចក្តីជូនដំណឹងនេះ បានបញ្ជាក់ថា ការកាប់ដើមស្ពង់ខាងលើ នឹងត្រូវអនុវត្តចាប់ពីថ្ងៃទី២៩ សីហា ប៉ុន្តែមន្ត្រីអាជ្ញាធរអប្សរាបញ្ជាក់ឡើងវិញថា ពេលវេលាត្រូវបានលើកទៅថ្ងៃទី១ វិច្ឆិកា ខាងមុខវិញ ។ គួរបញ្ជាក់ដែរថា ប្រាសាទតាព្រហ្ម មានទីតាំងនៅតាមផ្លូវវង់តូចទៅតាមទ្វារជ័យ គឺ បន្ទាប់ពីប្រាសាទតាកែវប្រហែល១គីឡូម៉ែត្រ។ ប្រាសាទនេះកសាងឡើងនៅក្នុងឆ្នាំ១១៨៦ នៃគ្រឹស្តសករាជ ដោយព្រះបាទជ័យវរ្ម័នទី៧ ដើម្បីឧទ្ទិសថ្វាយព្រះមាតារបស់ព្រះអង្គ ក្រោមរូបភាពប្រាជ្ញាបារមី ។
សព្វថ្ងៃ ប្រាសាទនេះរុំព័ទ្ធទៅដោយដើមស្ពង់ធំៗ ដុះចាក់ឫសនៅលើកំពែងនៃប្រាសាទ បង្កើតបានជាបរិយាកាសធម្មជាតិស្រស់ញញឹមសម្រាប់អ្នកទស្សនា បើទោះកំពែងប្រាសាទនេះភាគច្រើន បានជ្រុះញែកចេញពីគ្នាខ្លះៗ ដោយសារធម្មជាតិ និងពេលវេលាក្តី ។ «ប្រាសាទតាព្រហ្ម» កសាងឡើងពីថ្មភក់ និងថ្មបាយក្រៀម មានកំពែង៥ជាន់ និងមានប្រាង្គប្រាសាទចំនួន៣៩ ។ កំពែងខាងក្រៅរបស់ប្រាសាទនេះមានប្រវែង៧០០ម៉ែត្រx១០០០ម៉ែត្រ ។ នៅខាងជើងគោបុរៈ ខាងកើតនៃកំពែងខាងក្រៅ មានអគាររបាំមួយ ។ ប្រាសាទនេះ ក៏ជាត្រូវបានចាត់ទុកផងដែរជាសាកលវិទ្យាល័យផ្នែកវិទ្យាសាស្ត្រដែលកាលពីសម័យបុរាណកាល មានម្ចាស់ក្សត្រីឥន្ទ្រទេវីជាអ្នកគ្រប់គ្រង ៕
ចែករំលែកព័តមាននេះ