ខេត្តប៉ៃលិន ៖ គេសង្កេតឃើញ រថយន្តសង្គ្រោះពណ៌ក្រហមមួយគ្រឿងម៉ាក RENAULT ( Turbo) នៅក្នុងមន្ទីរពេទ្យបង្អែកខេត្ត ដែលជាជំនួយមកពីទីក្រុងហ៊ែ្សកបួរ-អុកតឺវីល ប្រទេសបារាំង ត្រូវបានគេចតទុកចោល នៅក្រោមដើមក្រខុប១ដើម លុះពេលភ្លៀងខ្លាំងកាលពីយប់ថ្ងៃទី២៣ សីហា ២០១៤ បណ្តាលឱ្យខ្យល់បុកប៉ើងដើមឈើនេះ រលំសង្កត់ផ្នែកខាងក្រោយរថយន្ត ។ តែអស់រយៈពេលជាច្រើនថ្ងៃ រហូតមកដល់ព្រឹកថ្ងៃទី២៨ សីហា ២០១៤នេះ មិនឃើញមានគ្រូពេទ្យណាម្នាក់ យកទៅដាក់ទុកនៅក្នុងរោងឱ្យបានត្រឹមត្រូវសមរម្យនោះទេ ។
ប្រភពព័ត៌មានបានឱ្យដឹងថា រថយន្តសាមុយមួយគ្រឿង ដែលត្រូវដើមក្រខុបសង្កត់ពីលើផ្នែកខាងក្រោយ ហើយត្រូវគេដាក់ទុកចោលអស់រយៈពេលជាច្រើនថ្ងៃកន្លងមកនេះ គឺជាអំណោយដ៏ថ្លៃថ្លា មកពីប្រទេសបារាំង តាមរយៈលោក ហ្សង់ម៉ានុយអែលឡឺក្លែរ និងលោក យឹម សៀប ប្រធានអង្គការសុខភាពយើង នាំយកមកប្រគល់ឱ្យសាលាខេត្តប៉ៃលិន កាលពីថ្ងៃទី១៩ កក្កដា ២០១៣ ។ ហើយតំណាងភាគីទាំងពីរបានថ្លែងការកោតសរសើរ អបអរសាទរយ៉ាងរាក់ទាក់ និងធានារ៉ាប់រងយករថយន្តជាអំណោយខាងលើ ទៅប្រើប្រាស់ ដើម្បីសម្រួលដល់ជីវភាពរស់នៅរបស់ប្រជាពលរដ្ឋមូលដ្ឋានទូទាំងខេត្តប៉ៃលិន ។ ដោយធ្វើការអភិវឌ្ឍន៍ ភាពជាដៃគូ ក្នុងគោលដៅផ្តល់ការគាំទ្រទៅលើវិស័យអប់រំ សុខាភិបាល ហេដ្ឋារចនាសម្ព័ន្ធ អភិបាលកិច្ចល្អ ។
ប្រភពបន្តទៀតថា រថយន្តដែលជាអំណោយរបស់សប្បុរសជនបារាំងដែលផ្តល់ឱ្យ មន្ទីរពេទ្យបង្អែកខេត្ត ដោយឥតគិតថ្លៃបែបនេះ មិនគួរណាប្រធានមន្ទីរសុខាភិបាលខេត្ត និងប្រធានមន្ទីរពេទ្យបង្អែកខេត្ត យកទៅចតទុកចោលនៅក្រោមដើមឈើ បណ្តាលឱ្យដួលរលំសង្កត់បែបនេះទេ គួរតែមានកៅស៊ូឬ តង់គ្របពីលើឱ្យបានល្អផងដែរ ។ ពេលនេះ គេកំពុងតែព្រួយបារម្ភជំនួសមន្ទីរពេទ្យបង្អែកខេត្តដែរ ថា បើសិនម្ចាស់ជំនួយឃើញបែបនេះ អាចគេអស់ទំនុកចិត្តក្នុងការជួយផ្តល់ជំនួយដល់យើងបន្តទៀត ព្រោះតាមប្រភពដដែលបានរាយការណ៍ ថាទម្រាំនឹងបានរថយន្តមួយគ្រឿងនេះមកដាក់នៅក្នុងខេត្តយើងនេះ មានការលំបាកខ្លាំង ណាស់ លុះពេលបានហើយបែរជាខ្ជីខ្ជាបែបនេះទៅវិញ ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព
ចែករំលែកព័តមាននេះ