រាជធានីភ្នំពេញ ៖ ការប្រកួតប្រដាល់វគ្គជម្រុះឈានទៅដណ្តើមខ្សែក្រវាត់ក្រុមហ៊ុនស្រាបៀរលីអូ ក្នុងប្រភេទទម្ងន់៦០គីឡូក្រាមនៅលើសង្វៀនស៊ីធីអិន នាថ្ងៃសៅរ៍ ទី៣០ សីហាស្អែកនេះ ឈានចូលដល់សប្តាហ៍ទី៧ ហើយ។ កីឡាកររឿម វណ្ណៈ មកពីសមាគមកីឡាប្រដាល់ក្រសួងការពារជាតិ ត្រូវជួបប្រកួតជាមួយកីឡាករទេស សំខាន់ មកពីក្លិបកងពលតូចលេខ៧០ ចំណែកកីឡាករសេក រតនា មកពីក្លិបសឹករងខេត្តសៀមរាប ជួបប្រកួតជាមួយកីឡាករអឹុង បូរ៉ា មកពីក្លិបគជសារកីឡា ។
រវាងរឿម វណ្ណៈ និង ទេសសំខាន់ ប្រកួតបាន២លើកម្នាក់រួចមកហើយ ប៉ុន្តែលទ្ធផលមិនដូចគ្នាទេ ដោយរឿម វណ្ណៈ ឈ្នះ១លើក ចាញ់១លើក រីឯទេស សំខាន់ ឈ្នះទាំង២លើក ហើយលើកនេះមិនដឹងថា ជ័យជម្នះធ្លាក់ទៅក្នុងកណ្តាប់ដៃអ្នកណានោះទេ ។
រឿម វណ្ណៈ ចលនានៃការវាយចេញ ទោះបីរហ័សបន្តិចមែនទាំងការប្រើស្នៀតដៃ និងការប្រើស្នៀតជើង ប៉ុន្តែគេមានចិត្តឆាប់ឆេវឆាវបន្តិច ។ ម្យ៉ាងវិញទៀត ការមកជួបទេស សំខាន់ លើកនេះគេមិនអាចធ្វេសប្រហែសបានឡើយ ដោយសារគេចាញ់ប្រៀបកម្ពស់គូប្រកួត។ ម្យ៉ាងទេស សំខាន់ ចេះប្រើស្នៀតកែង និងជង្គង់បានយ៉ាងស្ទាត់ជំនាញ ប៉ុន្តែរាល់ការវាយចេញ គឺមិនសូវជារហ័សរហួនប៉ុន្មានឡើយ ឯចិត្តក៏មិនសឿងទៀត ។ ដូច្នេះចាំមើលគូនេះ នរណាខ្លាំងជាងនរណា ?
ចំណែកសេក រតនា និងអឹុង បូរ៉ា វិញនោះ ប្រកួតបាន២លើកម្នាក់រួចមកហើយ ប៉ុន្តែលទ្ធផ្ទុយគ្នាស្រឡះ ដោយសេក រតនា ចាញ់ទាំង២លើក ឯអឹុង បូរ៉ា ឈ្នះទាំង២លើក ។ តាមរយៈលទ្ធផលនេះ គេអាចវាយតម្លៃបានថា សេក រតនា ច្បាស់ជាទៅមិនរួចជាមួយ អឹុង បូរ៉ា ឡើយ ។ ទាំងអស់នេះគ្រាន់តែជាការវិភាគក្រៅផ្លូវការប៉ុណ្ណោះ ឯលទ្ធផលពិតប្រាកដមានតែរង់ចាំមើលការប្រកួតជាក់ស្តែងប៉ុណ្ណោះ ៕
ចែករំលែកព័តមាននេះ