រាជធានីភ្នំពេញ ៖ នៅថ្ងៃអាទិត្យទី៣១ សីហា សប្ដាហ៍នេះ កីឡាករលេខ១ស្ទួនជាបណ្ដោះអាសន្ន២រូបនឹងឡើងប្រកួតគ្នាដើម្បីកំណត់យកតែម្នាក់ឱ្យឈរជាលេខ១ពិតប្រាកដ។ ដ្បិតតែតំណែងនេះមិនសូវសំខាន់ តែម្នាក់ៗក្នុងចំណោមអ្នកទាំងពីរពិតជាប្រឹងប្រែងឱ្យអស់ពីសមត្ថភាពដើម្បីកុំឱ្យជាប់ប្រវត្ដិចាញ់គ្នាជាក់ជាមិនខាន ។
នៅក្នុងពូល A កីឡាករម៉ន សាម៉េត មកពីក្លិបព្រែកឯងកីឡា និងកីឡាករឃីម បូរ៉ា មកពីក្លិបរស្មីភូមិគាប ខេត្ដបន្ទាយមានជ័យ គឺជាអ្នកមានពិន្ទុដល់កំពូលដូចគ្នា ដោយសារតែការប្រកួតទាំង៤លើកកន្លងមក ក្នុងវគ្គសន្សំពិន្ទុគឺមិនដែលចាញ់ដូចគ្នា ។ អ្នកទាំងពីរត្រូវមហាជនអ្នកតាមដានប្រដូចថា ជាខ្លា២នៅភ្នំតែមួយ ហើយក៏ជាបេក្ខភាពដែលមានលទ្ធភាពច្រើនជាងជើងខ្លាំងក្នុងពូល B ទាំង៣ដែលអាចដណ្ដើមបានខ្សែក្រវាត់របស់ស្រាបៀរកម្ពុជាក្នុងប្រភេទទម្ងន់៥៧គីឡូក្រាម ក្រោមការរៀបចំរបស់ទូរទស្សន៍អាស៊ីអាគ្នេយ៍នោះដែរ ។ នេះជាលើកទី១ហើយដែលការប្រកួតសន្សំពិន្ទុឆ្ពោះទៅកាន់វគ្គខ្វែងដើម្បីដណ្ដើមខ្សែក្រវាត់មួយ ស្រាប់តែអាចរកឃើញកីឡាករប្រដាល់ជើងខ្លាំងដល់ទៅ២នាក់មានពិន្ទុកប់ពពកដូចគ្នា ហើយត្រូវប៉ះគ្នាក្នុងជុំសន្សំពិន្ទុចុងក្រោយ ដើម្បីរើសម្នាក់ឱ្យអង្គុយកៅអីលេខ១ក្នុងពូល ។ ការប្រកួតលើកនេះ ទោះជាពួកគេចាញ់ឬឈ្នះ ក៏បានជាប់ចំណាត់ថ្នាក់លេខ១និងលេខ២ ហើយអាចបន្ដទៅកាន់វគ្គខ្វែងជាមួយអ្នកខ្លាំងក្នុងពូល B ដោយស្វ័យប្រវត្ដិ ។ អីុចឹងហើយទើបមានការព្យាករខ្លះសង្ស័យថា អ្នកទាំងពីរនឹងប្រកួតមិនអស់ដៃដើម្បីទុកកម្លាំងនិងថាមពលទៅកាន់វគ្គខ្វែង ក្នុងវគ្គសំខាន់ឆ្ពោះទៅដណ្ដើមខ្សែក្រវាត់នោះ ។
ផ្ទុយពីការសន្និដ្ឋាននេះ មានការលើកឡើងថា រវាងម៉ន សាម៉េត និងឃីម បូរ៉ា ពិតជាគិតថា ការប្រកួតចុងក្រោយនៅថ្ងៃអាទិត្យប្រចាំពូលនេះ សំខាន់មិនធម្មតា ដោយសារតែអ្នកទាំងពីរមិនត្រូវការចាញ់គ្នានាំឱ្យជាប់ប្រវត្ដិខ្មៅនៅក្នុងពិភពប្រដាល់ជាដាច់ខាត ។ ម្យ៉ាងអ្នកណាក៏ដឹងថា កីឡាករទាំងពីរកំពុងឡើងសន្ទុះ និងត្រូវមហាជនកោតសរសើរដូចគ្នានៅក្នុងពិភពប្រដាល់សេរី ដែលនេះជាកត្ដាមិនអាចឱ្យម្នាក់ក្នុងចំណោមពួកគេទាំងពីរយល់ព្រមចាញ់គ្នាដោយងាយៗទេ គឺពិតជាប្រឹងដណ្ដើមគ្នាយកកៅអីខ្ពស់ជាងគេក្នុងពូល និងដណ្ដើមយកចំណាត់ថ្នាក់ខ្លាំងនៅក្នុងចិត្ដមហាជន ។ ជំនួបអ្នកទាំងពីរមិនត្រឹមតែជាការប្រកួតដណ្ដើមយកលេខ១ប៉ុណ្ណោះទេ ប៉ុន្ដែក៏ជាការប៉ះគ្នាលើកដំបូងដើម្បីកំណត់ថា រវាងឃីម បូរ៉ា និងម៉ន សាម៉េត ដែលល្បីថាខ្លាំងដូចគ្នា តើពេលប៉ះគ្នាអ្នកណាជើងខ្លាំងពិតប្រាកដ ។ ដ្បិតថាការចាញ់ឈ្នះនៅតែបានឡើង ដែលមិនគួរចំណាយកម្លាំងច្រើន ប៉ុន្ដែមុខមាត់និងកេរ្ដិ៍ឈ្មោះ នឹងមិនធ្វើឱ្យការប្រកួតនេះក្លាយជារឿងវាយគ្នាបង្គ្រប់ម៉ោងនោះឡើយ ។ គូនេះត្រូវមហាជនជាអ្នកគាំទ្រភាគច្រើននិយាយថា អាចនឹងជក់ចិត្ដដោយសារតែពួកគេត្រូវការការកោតសរសើរនិងមានទំនុកចិត្ដកាន់តែខ្ពស់បន្ថែមទៀតនៅក្នុងពិភពប្រដាល់សេរី។ ស្រួលមិនស្រួលជំនួបអ្នកទាំងពីរអាចនឹងបែកផ្កាភ្លើងមិនធម្មតានៅលើសង្វៀនទូរទស្សន៍អាស៊ីអាគ្នេយ៍ផងក៏មិនដឹង ។
កីឡាករឃីម បូរ៉ា ជាជើងខ្លាំងរហ័សដៃ និងកែង ប៉ុន្ដែលោកហាក់អន់ថាមពល មិនពេញកម្លាំងដោយសារតែហេតុផលធ្វើដំណើរតាមរថយន្ដតាំងពីខេត្ដបន្ទាយមានជ័យមករាជធានីភ្នំពេញ នៅគ្រប់ការប្រដាល់ ។ រវាងអ្នកទាំងពីរមើលទៅទាំងស្នៀតនិងល្បិចគឺល្អប្រហែលគ្នា ដោយឃីម បូរ៉ា បានកម្ពស់ល្អជាង ឯម៉ន សាម៉េត មានភាពអំណោយផលត្រង់មិនចំណាយកម្លាំងជិះរថយន្ដផ្លូវឆ្ងាយសម្រាប់ការប្រកួតនេះ ។ អីុចឹងហើយទើបមានសំណួរដដែលជាដដែលថា អ្នកណានឹងឈ្នះសម្រាប់លេខ១ក្នុងពូល ហើយអ្នកឈ្នះនឹងឈ្នះដោយមានប្រៀបត្រង់ចំណុចណា ?
ចែករំលែកព័តមាននេះ