ពួកឧទ្ទាមស្និទ្ធរុស្ស៊ីនៅភាគខាងកើតអ៊ុយក្រែន កាលពីថ្ងៃទី២៧ សីហា បានវាយបកពង្រីកទឹកដីកាន់កា.ប់វិញ ដោយធ្វើឱ្យកងទ័ពរដ្ឋាភិបាលបាក់ទ័ព វាយដកថយ ហើយបោះបង់ចោលអាវុធ ព្រមទាំងគ្រាប់រំសេវ ខណៈក្រុងគៀវចោទប្រកាន់កងទ័ពរុស្ស៊ីថា ធ្វើប្រតិបត្តិការលើដែនដីអ៊ុយក្រែន ។
ពួកឧទ្ទាមស្និទ្ធរុស្ស៊ីនៅភាគខាងកើតអ៊ុយក្រែន កាលពីថ្ងៃទី២៧ សីហា បានវាយបកពង្រីកទឹកដីកាន់កាប់វិញ ដោយធ្វើឱ្យកងទ័ពរដ្ឋាភិបាលបាក់ទ័ព វាយដកថយ ហើយបោះបង់ចោលអាវុធ ព្រមទាំងគ្រាប់រំសេវ ខណៈក្រុងគៀវចោទប្រកាន់កងទ័ពរុស្ស៊ីថា ធ្វើប្រតិបត្តិការលើដែនដីអ៊ុយក្រែន ។
ក្រោយការវាយលុកជាច្រើនសប្តាហ៍ប្រកបដោយជោគជ័យ ដោយរុញច្រានពួកឧទ្ទាមឱ្យដកថយទៅកាន់បណ្តាទីតាំងចុងក្រោយរបស់ពួកគេត្រូវឡោមព័ទ្ធជិតមក កងទ័ពអ៊ុយក្រែននាពេលនេះហាក់ដូចជាបាត់បង់ការផ្តួចផ្តើមគំនិតក្នុងជម្លោះនៅភាគខាងកើតប្រទេស ជំរុញឱ្យក្រុងគៀវស្នើសុំជំនួយជាក់ស្តែងរបស់អូតង់ ។
បណ្តាអ្នកកាសែតរបស់ AFP កត់សម្គាល់ឃើញថាពួកឧទ្ទាមស្និទ្ធរុស្ស៊ី បានបោះទីតាំងនៅតាមផ្លូវថ្នល់រវាងទីតាំងធំរបស់គេ គឺក្រុងដូណេតស្ក៍ និងក្រុង Novoazovsk ជាទីក្រុងនៅជាប់សមុទ្រ ចម្ងាយ១០០គីឡូម៉ែត្រពីគ្នា ដែលតាមបណ្តោយផ្លូវថ្នល់នោះ រាល់ចំណុចត្រួតពិនិត្យពេលនេះកាន់កាប់ដោយពួកបះបោរ ។
ក្នុងភូមិ Starobecheve ស្ថិតនៅតាមផ្លូវថ្នល់នោះ ចម្ងាយ៣០គីឡូម៉ែត្រពីក្រុងដូណេតស្ក៍ ពួកបះបោរស្និទ្ធរុស្ស៊ី ប្រមូលយកបានគ្រាប់រំសេវ និងរថយន្តយោធាជាច្រើនគ្រឿង ដែលកងទាហានអ៊ុយក្រែន បោះបង់ចោល បង្ហាញពីការបាក់ទ័ពរបស់កងទាហាននោះ ។
យោងតាមប្រជាជនមូលដ្ឋានថា ការបាក់ទ័ពនោះកើតមានតាំងពីថ្ងៃទី២៥ សីហា មក ក្រោយការបាញ់ផ្លោងនានាពីតំបន់ព្រំដែនរុស្ស៊ី ។ យោងតាមអ្នកនាំពាក្យយោធាអ៊ុយក្រែន លោកអានឌ្រីអីុ លូឆេនកូ ថា ភូមិ Starobecheve ត្រូវពួកយុទ្ធជនមកពីក្រុងដូណេតស្ក៍ និងពួករុស្ស៊ីកាន់កាប់ ។ អង្គការអូតង់ និងប្រទេសប៉ូឡូញអះអាងថា មានភស្ថុតាងនានាដែលថា កងទ័ពរៀបរយរុស្ស៊ីធ្វើប្រតិបត្តិការនៅអ៊ុយក្រែន ដែលក្រុងមូស្គូបដិសេធជានិច្ច ។
យោងតាមលោក លូឆេនកូ ថា កងទ័ពរុស្ស៊ីបានដាក់ទីបញ្ជាការមួយនៅមូលដ្ឋាន Pobeda ចម្ងាយ៦០គីឡូម៉ែត្រពីព្រំដែនរុស្ស៊ី និង៤៨គីឡូម៉ែត្រពីក្រុងដូណេតស្ក៍ ខណៈរថពាសដែក៥គ្រឿង និងរថយន្តយោធា១គ្រឿងបើកចូលក្នុងមូលដ្ឋានអាមហ្វ្រូស៊ីអុីវកា ចម្ងាយ៧០គីឡូម៉ែត្រពីក្រុងដូណេតស្ក៍ ។
កងទ័ពអ៊ុយក្រែនក៏រៀបរាប់ផងដែរកាលពីថ្ងៃទី២៧ សីហា ពីការរុលទៅមុខនៃក្បួនរថយន្តយោធាដល់ទៅ១០០គ្រឿង រួមមានទាំងរថក្រោះ រថពាសដែក រថយន្តផ្ទុកកាំជ្រួចហ្វូងធុន Grad មកពីរុស្ស៊ី ឆ្លងកាត់តំបន់ភាគខាងត្បូងក្រុងដូណេតស្ក៍ ដែលពេលនេះមានសភាពស្ងប់ស្ងាត់ ក្រោយការប្រយុទ្ធគ្នាយ៉ាងសាហាវនានាចាប់ពីថ្ងៃទី២៥ សីហា មក ។ កងទ័ពអ៊ុយក្រែនរាយការណ៍ពីទាហានរបស់ខ្លួនស្លាប់១៣នាក់ ។ នៅក្រុងដូណេតស្ក៍ ការបាញ់កាំភ្លើងធំបណ្តាលឱ្យមនុស្សស្លាប់៣នាក់ ព្រោះតែរថយន្តមួយដឹកជនស៊ីវិលត្រូវគ្រាប់កាំភ្លើងត្បាល់ ។
នៅទីក្រុងគៀវមនុស្សជាច្រើនរយនាក់បានប្រមូលផ្តុំគ្នាធ្វើបាតុកម្មកាលពីថ្ងៃទី២៧ សីហា នៅមុខវិមានប្រធានាធិបតី ទាមទារឱ្យបញ្ជូនកងកម្លាំងបន្ថែមទៅជួយកងទាហានអ៊ុយក្រែនដែលជាប់ឡោមព័ទ្ធនៅក្រុងអីុឡូវ៉ៃអីុស ។
អ៊ុយក្រែនស្រែករកជំនួយជាក់ស្តែងរបស់អូតង់
ដោយសារការវាយបកវិញរបស់ពួកឧទ្ទាមស្និទ្ធរុស្ស៊ី នាយករដ្ឋមន្ត្រីអ៊ុយក្រែន លោក អាសឺនី អីុយ៉ាតសឺនីអ៊ុក និយាយថា ក្រុងគៀវរង់ចាំជំនួយជាក់ស្តែង និងការសម្រេចចិត្តសំខាន់ៗ ក្នុងឱកាសនៃកិច្ចប្រជុំកំពូលអូតង់ដែលគ្រោងធ្វើនាថ្ងៃទី៤ កញ្ញា នៅអង់គ្លេស ។ លោកអះអាងថាយើងត្រូវការជំនួយ ។
យោងតាមអគ្គលេខាធិការអូតង់លោក Anders Fogh Rasmussen ថា អូតង់អាចដាក់ពង្រាយតែប៉ុន្មានថ្ងៃនូវកងទ័ព និងគ្រឿងសព្វាវុធបន្ទាន់នៅភាគខាងកើតអឺរ៉ុប ។
សហរដ្ឋអាមេរិកចេញការព្រមាន
សហរដ្ឋអាមេរិក កាលពីថ្ងៃទី២៧ សីហា បានធ្វើការព្រមានប្រទេសរុស្ស៊ី ទាក់ទិននឹងព័ត៌មានពីការលុកលុយរបស់កងទ័ពរុស្ស៊ីចូលដែនដីអ៊ុយក្រែន ដោយវាយតម្លៃថា បែបនេះបង្ហាញឱ្យឃើញតាមរយៈការវាយបកមួយរៀបចំឡើងដោយក្រុងមូស្គូ ក្នុងតំបន់មានជម្លោះរបស់ពួកឧទ្ទាមស្និទ្ធរុស្ស៊ី ។
អ្នកនាំពាក្យក្រសួងការបរទេសអាមេរិក លោកស្រី Jen Psaki ថ្លែងទៅកាន់សារព័ត៌មានថា ការលុកលុយទាំងនេះបង្ហាញពីការវាយបកមួយដឹកនាំធ្វើដោយរុស្ស៊ី ដែលអាចកំពុងធ្វើនៅដូណេតស្ក៍ និងនៅលូហ្គានស្ក៍ ។ នេះពិតជារឿងគួរឱ្យព្រួយបារម្ភបំផុតមួយសម្រាប់យើង ។ លោកស្រីបញ្ជាក់ថា ក្រុងវ៉ាស៊ីនតោន ចង់ឱ្យរដ្ឋាភិបាលរុស្ស៊ីនិយាយពីការពិត ពេលកងទ័ពរបស់ខ្លួនស្ថិតនៅចម្ងាយ៤៨គីឡូម៉ែត្រ ខាងក្នុងដែនដីអ៊ុយក្រែន ៕
ចែករំលែកព័តមាននេះ