រាជធានីភ្នំពេញ ៖ កម្មការិនីរោងចក្រកាត់ដេរជីនយីហ្គាមេនដែលមានទីតាំងតាមបណ្តោយ ផ្លូវជាតិលេខ៥ ស្ថិតក្នុងភូមិចំការចេក ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង ចំនួន៦០នាក់តំណាងឱ្យកម្មករជាង៣ពាន់នាក់បាននាំគ្នាជិះរថយន្តមកមុខវត្តបុទមវតី្តកាលពីវេលាម៉ោង១១ព្រឹក ថ្ងៃទី២៨ សីហា ២០១៤ ដើម្បីដាក់ញត្តិ និងសុំកិច្ចអន្តរាគមន៍ពីសម្តេចអគ្គមហាសេនាបតីតេជោ ហ៊ុន សែន បន្ទាប់ពីធ្វើកូដកម្មអស់រយៈពេល៣សប្តាហ៍មកហើយនៅតែគ្មានដំណោះស្រាយ។
កម្មការិនីរោងចក្រជីនយីហ្គាមេនមួយរូបនិយាយក្នុងន័យសុំមិនបង្ហាញឈ្មោះបានឲ្យដឹងថា អស់រយៈពេលបីសប្តាហ៍មកហើយដែលកម្មករ-កម្មការិនីជាង៣ពាន់នាក់នៅរោងចក្រជីនយីហ្គាមេនបានផ្ទុះកូដកម្មទាមទារលក្ខខណ្ឌការងារ១៧ចំណុចពីភាគីម្ចាស់រោងចក្រ ក្នុងនោះសុំឲ្យបញ្ឈប់ប្រធានរដ្ឋបាល។ ប៉ុន្តែបែរជាទទួលបានមកវិញនូវការគំរាមគំហែងពីសមត្ថកិច្ចចំរុះស្រុកខេត្ត ទំនងជាបានលាបសក្ការៈពីម្ចាស់រោងចក្រហើយមើលទៅ ។
កម្មការិនីរូបនោះបន្តថា ដោយអស់សង្ឃឹមទៅលើអាជ្ញាធរដែនដីខេត្តកំពង់ឆ្នាំងទើបនៅថ្ងៃទី២៤ សីហា ២០១៤ កម្មករប្រមាណជា៧០០នាក់បាននាំគ្នាខ្លះធ្វើដំណើរតាមរថយន្ត ខ្លះទៀតតាមរ៉ឺម៉ុក់ម៉ូតូ ក្រោមការគំរាមពីសមត្ថកិច្ចតាមផ្លូវជាតិលេខ៥ តែទោះជាយ៉ាងណានៅវេលាម៉ោងជាង១១ថ្ងៃដដែល កម្មករបានប្រមូលផ្តុំគ្នានៅមុខក្រសួងការងារ ហើយត្រូវបានក្រសួងការងារចាត់តាំងលោកវង្ស សុវណ្ណ អគ្គលេខាធិការរងនៃគណៈកម្មការសំរាប់ដោះស្រាយបញ្ហាកូដកម្មបាតុកម្មចុះដោះស្រាយជាមួយភាគីរោងចក្រដោយមានការចូលរួមតំណាងកម្មករផងដែរ។
នៅវេលាម៉ោង០៩ និង៣០នាទីព្រឹក ថ្ងៃទី២៦ សីហា លោកវង្ស សុវណ្ណ អគ្គលេខាធិការរងនៃគណៈកម្មការសំរាប់ដោះស្រាយបញ្ហាកូដកម្ម-បាតុកម្មបានមកដល់រោងចក្រកាត់ដេរជីនយីហ្គាមេន ហើយបានចូលជួបម្ចាស់រោងចក្រនោះតែម្នាក់ឯងដោយគ្មានវត្តមានតំណាងកម្មករចូលរួមឡើយ។ រហូតដល់ម៉ោងជិត៣រសៀលថ្ងៃដដែលទើបឃើញលោកវង្ស សុវណ្ណ ចេញមកវិញដោយមិនបានប្រាប់កម្មករពីលទ្ធផលនៃការជួបគ្នានោះទេ គឺលោកបានឡើងជិះរថយន្តទៅភ្នំពេញបាត់។
តំណាងកម្មករបានលើកឡើងថា ដោយមើលឃើញ និងអស់សង្ឃឹមទៅលើក្រសួងពាក់ព័ន្ធទើបកម្មករចំនួន៦០នាក់តំណាងឲ្យកម្មករជាង៣ពាន់នាក់នាំគ្នាជិះរថយន្តមកកាន់ខុទ្ទកាល័យសម្តេចតេជោហ៊ុន សែន (មុខវត្តបុទមវតី្ត) ស្ថិតក្នុងសង្កាត់ចតុមុខ ខណ្ឌដូនពេញដើម្បីដាក់ញត្តិជូនសម្តេចតេជោជួយអន្តរាគមន៍៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ