ប្រធានាធិបតីចិន លោកស៊ី ជីនពីង កាលពីថ្ងៃទី២៧ សីហា បានជួបពិភាក្សានៅទីក្រុងប៉េកាំងជាមួយលោកឡេហុងអាញ់ បេសកជនពិសេសរបស់អគ្គលេខាបក្សកុំមុយនីស្តវៀតណាម ហើយលោកអំពាវនាវឱ្យមានការខិតខំប្រឹងប្រែងរួមដើម្បីស្តារឡើងវិញនូវទំនាក់ទំនងទ្វេភាគី ក្រោយភាពតានតឹងនាពេលថ្មីៗនេះរវាងប្រទេសទាំងពីរ ។
លោកស៊ី ជីនពីង មានប្រសាសន៍នាឱកាសនោះថា ចិននិងវៀតណាមជាប្រទេសនៅជាប់ជិតខាងគ្នា និងជាប្រទេសសង្គមនិយមដូចគ្នា។ អ្នកជិតខាងមួយមិនអាចផាត់ចោលបានទេ ហើយវាជាផលប្រយោជន៍រួមរបស់ភាគីទាំងពីរដែលត្រូវរក្សាទំនាក់ទំនងមិត្តភាព ។
លោកឡេហុងអាញ់ សមាជិកការិយាល័យនយោបាយបក្សកុំមុយនីស្តវៀតណាមបានមកដល់ទីក្រុងប៉េកាំងកាលពីថ្ងៃទី២៦ សីហាកន្លងមកនេះ ដើម្បីបំពេញទស្សនកិច្ចរយៈពេល២ថ្ងៃនៅចិន ។ លោកឡេហុងអាញ់ ក៏បានជួបពិភាក្សានាថ្ងៃទី២៧ សីហា នោះជាមួយលោក LIU YUNSHAN សមាជិកគណៈកម្មាធិការអចិន្ត្រៃយ៍នៃការិយាល័យនយោបាយបក្សកុំមុយនីស្តចិន ហើយភាគីទាំងពីរបានចុះហត្ថលេខាលើកិច្ចព្រមព្រៀងមាន៣ចំណុចមួយ ។
យោងតាមកិច្ចព្រមព្រៀងនោះ ចិននិងវៀតណាមនឹងអនុវត្តទិសដៅសំខាន់ដើម្បីដោះស្រាយបណ្តាបញ្ហាសមុទ្ររវាងប្រទេសទាំងពីរ ដែលទិសដៅនោះត្រូវបានចុះហត្ថលេខាកាលពីខែតុលា ឆ្នាំ២០១១ នឹងប្រើប្រាស់យន្តការទ្វេភាគីនៃការចរចាស្តីពីព្រំដែនរវាងរដ្ឋាភិបាលទាំងពីរ ស្វែងរកដំណោះស្រាយជាសារវ័ន្ត និងស្ថិតស្ថេរទាំងឡាយដែលអាចទទួលយកបានសម្រាប់ភាគីទាំងពីរ សិក្សាព្រមទាំងពិភាក្សាគ្នាលើវិធីធ្វើអាជីវកម្មរួមនៅសមុទ្រចិនខាងត្បូង ចៀសវាងបណ្តាសកម្មភាពដែលនាំឱ្យមានភាពស្មុគស្មាញ និងធ្វើឱ្យទំនាស់កាន់តែធ្ងន់ធ្ងរ ព្រមទាំងថែរក្សាស្ថេរភាពជាទូទៅនៃទំនាក់ទំនងទ្វេភាគី និងសន្តិភាពនៅសមុទ្រចិនខាងត្បូង ៕
ចែករំលែកព័តមាននេះ