ខេត្តប៉ៃលិន ៖ បុរសម្នាក់ ដោយសារតែឈឺចុកចាប់ឆ្អឹងជំនីរផ្នែកខាងស្តាំខ្លាំងពេកមិនអាចទ្រាំជាប់ឃុំខ្លួនបណ្តោះអាសន្នក្នុងពន្ធនាគារខេត្តបាន ទើបប្រាប់បងស្រីបង្កើតឱ្យរត់រកប្រាក់ទៅតម្កល់ទុកនៅសាលាដំបូងខេត្ត ដើម្បីសុំធានាខ្លួនចេញក្រៅឃុំ រួចឱ្យពេទ្យពិនិត្យ និងព្យាបាល។ លុះគ្រូពេទ្យឆ្លុះថតមើលឃើញបាក់ឆ្អឹងជំនីរអស់ចំនួន២កាំ ក៏ដាក់ពាក្យបណ្តឹងកាលពីថ្ងៃទី២២ សីហា ដោយចោទមន្ត្រីនគរបាលព្រហ្មទណ្ឌកម្រិតធ្ងន់ម្នាក់ពីបទប្រើអំពើហិង្សាវាយដំរូបគេ មុនពេលសួរចម្លើយ ។
ហេតុការណ៍នេះ បើតាមដើមចោទប្រាប់ថា បានកើតឡើងកាលពីថ្ងៃទី២ សីហា នៅក្នុងស្នងការដ្ឋាននគរបាលខេត្ត ។ ពេលនេះបុរសខាងលើបានចូលទៅសម្រាកព្យាបាលនៅមន្ទីរពេទ្យ និងដាក់ពាក្យបណ្តឹងទៅអង្គការសិទ្ធិមនុស្សប្រចាំនៅខេត្ត ដែលមានស្នាក់ការស្ថិតនៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ។
បុរសជាដើមបណ្តឹង គឺជាជនជាប់ចោទប្រើអំពើហិង្សាក្នុងគ្រួសារឈ្មោះ ជា រ៉ាស៊ី អាយុ៣០ឆ្នាំ មានស្រុកកំណើតនៅភូមិព្រៃគ្រី ឃុំព្រៃគ្រី ស្រុកជលគិរី ខេត្តកំពង់ឆ្នាំង បច្ចុប្បន្នរស់នៅភូមិស្ទឹងកាច់ ឃុំស្ទឹងកាច់ ស្រុកសាលាក្រៅ។
បុរសរូបនេះបានរៀបរាប់ខណៈកំពុងសម្រាកព្យាបាលនៅក្នុងមន្ទីរពេទ្យបង្អែកខេត្ត នាព្រឹកថ្ងៃទី២៥ សីហាថា កាលពីថ្ងៃទី២៨ កក្កដា គាត់បានឈ្លោះប្រកែកទាស់ទែងគ្នាជាមួយនឹងប្រពន្ធឈ្មោះ រ៉ាយ សុខរ៉ា អាយុ២៩ឆ្នាំ នៅក្នុងផ្ទះដែលសង់នៅក្បែរផ្ទះឪពុកក្មេកប្រហែល៣០ម៉ែត្រ ។ ការឈ្លោះប្រកែកនេះរហូតឈានដល់ការប្រវាយប្រតប់គ្នា រួចប្រពន្ធខឹងខ្លាំង ក៏យកដំបងទៅវាយម៉ូតូបណ្តាលឱ្យបែកខូចខ្ទេចខ្ទីជាច្រើនកន្លែង ។ ដោយទ្រាំមិនបានគាត់ក៏ទះកំផ្លៀងប្រពន្ធ១ដៃ បន្ទាប់មកនាងក៏ស្រែកជេររួចទាញយកកាំបិតចុងស្រួចដេញចាក់ ទើបរូបគាត់ច្រានប្រពន្ធចេញបណ្តាលឱ្យនាងដួលទៅប៉ះនឹងពាងទឹករលាត់ក្តោងច្រមុះ ។
ប្រភពដដែលបន្តទៀតថា លុះនៅថ្ងៃទី១ សីហា បងស្រីម្នាក់ឈ្មោះ ឈុន ឡៃហៀង អាយុ៣៤ឆ្នាំ បាននាំពួកគាត់ទាំងពីរនាក់ប្តីប្រពន្ធទៅធ្វើការសម្រុះសម្រួល និងធ្វើកិច្ចសន្យាអប់រំនៅបុ៉ស្តិ៍នគរបាលឃុំស្ទឹងកាច់ ហើយពួកគាត់ក៏សុខចិត្តព្រមព្រៀងរួមរស់ជាមួយគ្នាវិញ ព្រោះអាណិតកូនតូចៗ ។ ជាអកុសល ទោះបីជារឿងរ៉ាវជម្លោះប្តីប្រពន្ធដូចចានរណ្តំក្នុងរាវបានផ្សះផ្សាគ្នាបញ្ចប់រឿងទៅហើយក៏ដោយ បុ៉ន្តែឪពុកក្មេករបស់គាត់ឈ្មោះ រ៉ាយ សារ៉ន អាយុ៥៤ឆ្នាំ បានបន្តដាក់ពាក្យប្តឹងទៅលោកព្រះរាជអាជ្ញាអមសាលាដំបូងខេត្ត ទើបនៅវេលាម៉ោង៨និង៣០នាទីយប់ថ្ងៃទី២ សីហា មានក្រឡាបញ្ជីម្នាក់ឈ្មោះ ជា វ៉ាន់រ៉ន រួមទាំងកម្លាំងនគរបាលព្រហ្មទណ្ឌកម្រិតធ្ងន់ចំនួន៣នាក់ចុះទៅចាប់រូបគាត់ គឺមាន ១-ឈ្មោះ ឆម វ៉ាន់ធី ប្រធានការិយាល័យ ២-ឈ្មោះ ណុប សាវុធ និង៣-ឈ្មោះ ផាត គឹមយូ។
ខណៈពេលចាប់ដាក់ខ្នោះបម្រុងរុញចូលរថយន្ត មន្ត្រីនគរបាលឈ្មោះ ផាត គឹមយូ បានទះកំផ្លៀងរូបគាត់ចំនួន៣ដៃ ។ លុះមកដល់ស្នងការដ្ឋាន មន្ត្រីសមត្ថកិច្ចម្នាក់នេះបានទាត់ចំនួន៣ជើងផ្ទួនៗចំឆ្អឹងជំនីរខាងស្តាំបណ្តាលឱ្យដួលទៅលើដីទាំងដៃជាប់ខ្នោះ ដែលហាក់ដូចជាមានគំនុំតាំងពីយូរណាស់មកហើយ ទាំងរូបគាត់មិនដែលធ្លាប់ស្គាល់គ្នាទាល់តែសោះ។ រូបគាត់ត្រូវបានហៅចូលសួរចម្លើយនៅក្នុងបន្ទប់ការិយាល័យដោយបានដកហូតទូរស័ព្ទដៃម៉ាកណូគា១គ្រឿង ប្រាក់ខ្មែរចំនួន៣០ម៉ឺនរៀល និងប្រាក់ដុល្លារ៣០ដុល្លារ ស្បែកជើង១គូ រហូតមកដល់ពេលនេះ មិនទាន់ប្រគល់ឱ្យវិញទេ ថែមទាំងគំរាមមិនឱ្យប្រាប់អ្នកដទៃ បើពុំដូច្នោះទេ គេនឹងយកថ្នាំញៀនទៅដាក់នៅក្នុងផ្ទះបងប្អូនរបស់ខ្លួន រួចចាប់យកទៅដាក់គុកទាំងអស់គ្នា ។
ប្រភពដដែលបន្តទៀតថា ពេលបញ្ជូនទៅសាលាដំបូងខេត្ត មន្ត្រីនគរបាលរូបនេះបានទះកំផ្លៀងគាត់ចំនួន២ដៃថែមទៀត ។ ពេលបញ្ចប់ការទាត់ធាក់នៅស្នងការដ្ឋាន ស្រាប់តែនៅថ្ងៃទី៤ សីហា ឈ្មោះ ផាត គឹមយូ បានឱ្យអ្នកទោសដែលជាមេក្រុមក្នុងពន្ធនាគារវាយទាត់ធាក់បណ្តាលឱ្យរូបគាត់រងរបួសគ្រាំក្នុង (ក្អកធ្លាក់ឈាម) ។ លុះក្រោយពីបងស្រីធានាឱ្យនៅក្រៅឃុំ ទើបបញ្ជូនមកមន្ទីរពេទ្យបង្អែកខេត្តនៅថ្ងៃទី២២ សីហា ហើយពេលគ្រូពេទ្យពិនិត្យ និងឆ្លុះថតឃើញបាក់ឆ្អឹងជំនីរខាងស្តាំចំនួន២កាំ (កាំទី៧ និងទី៨) ។ ករណីនេះគាត់បានដាក់ពាក្យបណ្តឹងទៅអង្គការសិទ្ធិមនុស្សកាលពីថ្ងៃទី២២ សីហា និងដាក់ពាក្យប្តឹងទៅអភិបាលខេត្ត កងរាជអាវុធហត្ថខេត្ត ព្រមទាំងសាលាដំបូងខេត្តនៅព្រឹកថ្ងៃទី២៥ សីហា ឱ្យជួយអន្តរាគមន៍ ដោយទាមទារសំណងថ្លៃព្យាបាលជំងឺរាងកាយ និងជំងឺចិត្តចំនួន៤.០០០ដុល្លារ ហើយសុំឱ្យប្រគល់របស់របរដែលដកហូតត្រឡប់មកវិញ ព្រមទាំងសុំឱ្យច្បាប់ចាត់វិធានការទៅលើមន្ត្រីរូបនេះផងដែរ ។
ចំណែកគ្រូពេទ្យនៅមន្ទីរពេទ្យបង្អែកខេត្តបញ្ជាក់ថា ការបាក់ឆ្អឹងជំនីរនេះប៉ះចំកន្លែងសំខាន់បណ្តាលឱ្យឆ្អឹងបុកទៅនឹងគ្រឿងក្នុងដូចជា ថ្លើម លំពែងជាដើម ទើបបណ្តាលឱ្យក្លាយទៅជាឈាមកកបែបនេះ ។ រីឯការព្យាបាលត្រូវចំណាយពេលយូរបន្តិច ទើបអាចជាសះស្បើយ ហើយនៅថ្ងៃខាងមុខជនរងគ្រោះមិនត្រូវធ្វើការងារធ្ងន់ឡើយ ជួនកាលអាចពិការថែមទៀតផង ព្រោះត្រង់កន្លែងនេះមិនអាចដាក់ដែកគ្រីបឆ្អឹងឱ្យជាប់គ្នាវិញដូចឆ្អឹងដៃជើងស្រួលទេ ។ ទាក់ទិនទៅនឹងបញ្ហានេះ កោះសន្តិភាពបានទាក់ទងទៅលោកឆម វ៉ាន់ធី នាយការិយាល័យនគរបាលលព្រហ្មទណ្ឌកម្រិតធ្ងន់ដើម្បីបំភ្លឺ បុ៉ន្តែលោកប្រាប់ថា ជាប់រវល់ប្រជុំ មិនអាចបំភ្លឺបានទេ ។ ចំណែកលោកផាត គឹមយូ មន្ត្រីនគរបាលព្រហ្មទណ្ឌកម្រិតធ្ងន់នៃស្នងការដ្ឋានខេត្ត បានបដិសេធតាមទូរស័ព្ទថា លោកមិនបានប្រព្រឹត្តអំពើទាំងនេះទេ បើសិនជាលោកវាយបាក់ឆ្អឹងជំនីរ២កាំមែន បុរសម្នាក់នេះ គឺឆ្លើយដាក់លោកតាំងពីឡើងទៅសាលាដំបូងម្ល៉េះ មិនមែនជាប់គុករយៈពេល១ខែទៅហើយ លុះចេញមកវិញ ទើបដាក់ពាក្យប្តឹងបែបនេះទេ ។
លោកបន្តទៀតថា ការនាំខ្លួនពីការិយាល័យទៅ សូម្បីតែ១ដៃ ក៏លោកមិនហ៊ានប៉ះបុរសរូបនេះផង ណាមួយដោយសារបទល្មើសមួយដែលយើងគិតថា មិនអាចប្រព្រឹត្តបែបនេះទេ ហើយពេលចុះទៅផ្ទះរបស់គាត់នោះមានក្រឡាបញ្ជីម្នាក់ដែរចុះទៅជាមួយ អាចធ្វើជាសាក្សីបាន។
ម្យ៉ាងវិញទៀត ពេលយកចេញពីកន្លែងឃុំឃាំង គាត់បានធាក់ទ្រុង៣ជើង ហើយពេលនោះមិនដឹងថា គាត់គិតយ៉ាងម៉េចទេ ដោយស្មានថា គាត់រត់ ហើយលោកក៏ចាប់កអាវគាត់ជាប់បណ្តាលឱ្យរហែកអាវ ហើយប៉ះមុខគាត់បន្តិច ឯបងប្អូនស្រីគាត់ពីរបីនាក់ទៀតក៏នៅទីនោះ និងបានមើលឃើញផ្ទាល់ភ្នែកដែរ ។ ចំពោះការវាយដំនៅក្នុងពន្ធនាគារ លោកគ្មានសិទ្ធិទៅបញ្ជាឱ្យមនុស្សនៅក្នុងនោះវាយដំអ្នកផ្សេងបានទេ ព្រោះយើងនៅស្ថាប័នខុសគ្នា ហើយលោកក៏សូមបដិសេធចោលផងដែរ ។ ចំពោះការដែលបុរសខាងលើចោទថា លោកដកហូតយកប្រាក់ខ្មែរចំនួន៣០ម៉ឺនរៀល និងប្រាក់អាមេរិក៣០ដុល្លារ លោកអត់ដឹងរឿងនោះទេ ព្រោះខណៈដែលចាប់នោះគាត់ស្លៀកខោខ្លីយឺត អាវយឺត លុះពេលសួរនាំរួច ហើយរាយការណ៍ទៅព្រះរាជអាជ្ញា ក៏ឱ្យឃុំខ្លួនបណ្តោះអាសន្ន គឺឱ្យគាត់ដោះខោអាវដោយខ្លួនឯង ។ ចំណែកទូរស័ព្ទដៃ១គ្រឿង និងស្បែកជើង១គូ នៅរក្សាទុកនៅក្នុងការិយាល័យលោកនៅឡើយទេ រង់ចាំឱ្យម្ចាស់មកយកត្រឡប់ទៅវិញ ៕
ចែករំលែកព័តមាននេះ