រាជធានីភ្នំពេញ ៖ បុរសម្នាក់ស្ថិតក្នុងស្ថានភាពស្រវឹងបានធ្វើដំណើរមកលោតទឹកសម្លាប់ខ្លួនពីលើស្ពានជ្រោយចង្វា កាលពីវេលាម៉ោង១០និង៣០នាទីព្រឹកថ្ងៃទី២៧ សីហា តែត្រូវបាននគរបាល និងអ្នកដំណើរឃាត់ទាន់ពេល ។ បុរសគិតខ្លីនោះត្រូវបានគេស្គាល់ឈ្មោះធឿន វឿន អាយុ៣៦ឆ្នាំ មានទីលំនៅផ្ទះជួលក្នុងសង្កាត់ស្ទឹងមានជ័យ ខណ្ឌមានជ័យ ។ គេពុំដឹងថា បុរសនោះមានរឿងរ៉ាវជីវិតយ៉ាងណានោះទេ បានជាគិតខ្លីមកបញ្ចប់ជីវិតខ្លួនឯងបែបនេះ ។
តាមព័ត៌មានឱ្យដឹងថា នៅមុនពេលកើតហេតុ គេឃើញបុរសរូបនោះស្ថិតក្នុងស្ថានភាពស្រវឹងបានដើរទ្រេតទ្រោតៗនៅលើស្ពានជ្រោយចង្វាផ្នែកខាងកើត រួចក៏បានឈោងតោងបង្កាន់ដៃស្ពានប្រុងលោតសម្លាប់ខ្លួន ។ ខណៈនោះនគរបាលអង្គភាពគោលដៅទី៣ដែលការពារស្ពានជ្រោយចង្វា រួមទាំងអ្នកដំណើរបាននាំគ្នាឃាត់ ហើយនាំទៅរង្វង់មូលជ្រោយចង្វាដើម្បីសាកសួរ ។ នៅចំពោះមុខនគរបាល បុរសមានវិបត្តិរូបនោះហាក់ដូចជាមិនចង់និយាយពីរឿងរ៉ាវជូរចត់នៅក្នុងជីវិតរបស់ខ្លួនឡើយ ។ តែទោះបីជាយ៉ាងណា បុរសនោះបានបង្ហើបប្រាប់ថា មូលហេតុដែលធ្វើឱ្យគាត់គិតខ្លីមិនចង់រស់នៅលើលោកនេះ ព្រោះតែតូចចិត្តខ្លួនឯងត្រូវប្រពន្ធសុំលែង ។ ដោយសារតែមានវិបត្តិក្នុងគ្រួសារនេះហើយ ទើបធ្វើឱ្យគាត់ផឹកស្រាស្រវឹង ហើយបានគិតខ្លីធ្វើដំណើរមកលោតទឹកសម្លាប់ខ្លួនឱ្យផុតពីលោកនេះតែម្ដងទៅ ។
បុរសរូបនេះនិយាយដោយឱនមុខថា «តើបងខុសអ្វីបានជាស្រីសុំលែង» ។ បន្ទាប់ពីសួរនាំរួច នគរបាលក៏បានអប់រំណែនាំកុំឱ្យគិតខ្លីបែបនេះទៀត រួចក៏បានទាក់ទងទៅប្អូនប្រុសឱ្យនាំត្រឡប់ទៅផ្ទះវិញ ។ នេះជាអ្នកមានវិបត្តិទី២០ នៅក្នុងឆ្នាំ២០១៤ ដែលបានធ្វើដំណើរមកលោតទឹកសម្លាប់ខ្លួនពីលើស្ពានជ្រោយចង្វា តែការប៉ងធ្វើអត្តឃាតនេះត្រូវបានរារាំងទាន់ពេល ៕
ចែករំលែកព័តមាននេះ