រាជធានីភ្នំពេញ ៖ ក្រុមអ្នកតវ៉ាមកពីសហគមន៍បឹងកក់ចំនួនជាង៥០នាក់ បាននាំគ្នាដង្ហែជាក្បួនដើរចេញពីស្ថានទូតសិង្ហបុរី ឆ្ពោះទៅកាន់រដ្ឋសភាជាតិ ប៉ុនប៉ងគប់ពងទាទៅលើវិមានរដ្ឋសភាដូចដែលធ្លាប់បានធ្វើការព្រមានកន្លងមក ត្រូវបានកម្លាំងអាជ្ញាធររារាំង កាលពីព្រឹកថ្ងៃទី២៧ សីហា នៅលើផ្លូវមុខរដ្ឋសភា ក្នុងសង្កាត់ទន្លេបាសាក់ ខណ្ឌចំការមន ។
ក្រុមអ្នកតវ៉ា ក្រោយពីបានលើកគ្នាយកញត្ដិទៅដាក់នៅស្ថានទូតសិង្ហបុរី ប្រចាំនៅប្រទេសកម្ពុជា ដើម្បីសុំឱ្យស្ថានទូតមួយនេះមានការឆ្លើយតបជាមួយនឹងពួកគាត់ក្នុងការដាក់ញត្ដិនាពេលកន្លងមក ដោយមិនមានការឆ្លើយតប ហើយក៏បន្ដហែជាក្បួនដើរទៅកាន់រដ្ឋសភាជាតិ ជាបន្ដទៀត ។ អ្នកកើតទុក្ខមិនសុខចិត្ដទាំងនោះបាននាំគ្នាដើរដោយមានកាន់បដា ខ្លះកាន់រូបផ្ទះដែលធ្វើពីឫស្សី ខ្លះទៀតកាន់រូបថតលោក កែប ជុតិមា អតីតអភិបាលរាជធានីភ្នំពេញ និងបច្ចុប្បន្នជាអ្នកតំណាងរាស្ដ្រមណ្ឌលភ្នំពេញ ។ នៅក្នុងដៃ ពួកគេឃើញមានកាន់ថង់ពងទាជាច្រើនគ្រាប់ផងដែរ ។
ក្បួនរបស់ក្រុមបាតុករទាំងនោះដែលមើលទៅឃើញសុទ្ធតែជាស្ដ្រីភេទមុខដដែលៗ ដូចជាអ្នកស្រី ទេព វន្នី អ្នកស្រី យ៉ោម បុប្ផា និងស្ដ្រីចាស់ស្ទើរជរាម្នាក់ផងជាអ្នកនាំមុខ ជាអ្នកបញ្ជាត្រូវបានកម្លាំងសន្ដិសុខខណ្ឌ និងនគរបាលខណ្ឌចំការមនបញ្ចេញសាច់ដុំធំៗរារាំងនៅលើកំណាត់ផ្លូវមុខរដ្ឋសភា មួយកំណាត់ដោយមិនអនុញ្ញាតឱ្យចូលទៅដល់ខ្លោងទ្វាររដ្ឋសភាឡើយ ព្រោះសមាជិកសភាកំពុងប្រជុំ ។ ការរារាំងរបស់កម្លាំងមានសមត្ថកិច្ចក្នុងពេលនោះ ក៏មានការរុញច្រានទៅវិញទៅមកយកឈ្នះរៀងខ្លួន ដែលខ្លះត្រូវសមត្ថកិច្ចច្រាន និងចាប់សែងចេញពីផ្លូវផងដែរ ។ អាជ្ញាធរការពារសន្ដិសុខបានរារាំងដោយរនាំងដែក ព្រមទាំងប្រដាប់ដោយខែលនិងដំបងក្នុងដៃ ។ ពេលរារាំងការព្យាយាមសម្រុកចូលទៅខាងមុខរដ្ឋសភាមិនបានដូចបំណង ក្រុមស្ដ្រីដ៏អង់អាចទាំងនោះបានស្រែកដោយចោទថា រាជរដ្ឋាភិបាលមានភាពអយុត្ដិធម៌ក្នុងការដោះស្រាយទំនាស់ដីធ្លី និងផ្ទះសម្បែងរបស់ពួកគាត់ ព្រមទាំងប្រើពាក្យអាក្រក់ៗជាច្រើនទៀត ។
មិនតែប៉ុណ្ណោះ ក្រុមស្ដ្រីដែលទំនងដូចអត់ចេះខ្លាចច្បាប់ អត់ចេះខ្លាចអ្នកមានអំណាចទាំងនោះបានលើកបង្ហាញរូបថតរបស់លោក កែប ជុតិមា អតីតអភិបាលរាជធានីភ្នំពេញ និងបានស្រែកថា មកពីពួកគាត់ចាញ់បោកលោកម្នាក់នេះ ទើបបានជាពេលនេះ ពួកគាត់គ្មានផ្ទះ ធ្លាក់ខ្លួននិងរស់នៅយ៉ាងវេទនារាល់ថ្ងៃនេះ ។ ក្នុងពេលនោះដែរ ពួកគេចាប់ផ្ដើមបញ្ចេញកំហឹងដោយគ្មានអ្នកណាអាចជួយទប់បានឡើយ ដែលក្នុងពេលនោះស្ដ្រីម្នាក់លើករូបថតលោក កែប ជុតិមា បង្ហាញពីមុខ ឯអ្នកដទៃទៀតក៏បានសម្ដែងកំហឹងនាំគ្នាយកពងទាជាច្រើនគ្រាប់គប់លើរូបថតរបស់លោក ដែលពងទាខ្លះត្រូវរូបថតបែកខ្ចាយ ពងទាខ្លះត្រូវក្បាលនិងត្រូវមុខអ្នកកាន់រូបថត បណ្ដាលឱ្យបែកធ្លាក់ខ្ចាយពាសពេញដី និងពេញមុខមាត់អ្នកកាន់ផងដែរ ។
ក្រុមបាតុករទាំងនោះត្រូវបានកម្លាំងអាជ្ញាធរមូលដ្ឋានធ្វើការរុញច្រាន និងខ្លះទៀតត្រូវបានចាប់លើកសែងចេញ ក្រោយពេលដែលមានការនិយាយអង្វរឱ្យធ្វើការផ្លាស់ប្ដូរទីតាំងតវ៉ាមិនបាន ព្រោះមិនចង់ឱ្យមានការរំខានដល់សម័យប្រជុំក្នុងរដ្ឋសភា ដែលការហាមឃាត់នេះ ហាក់បីដូចជាមិនមានការយោគយល់គ្នាឡើយរវាងអាជ្ញាធរមូលដ្ឋាននិងបាតុករ ៕
ចែករំលែកព័តមាននេះ