រាជធានីភ្នំពេញ ៖ លោកស្រី មូរ សុខហួរ ដែលគណបក្សសង្គ្រោះជាតិជ្រើសរើសសម្រាប់គណៈកម្មការទី៨គឺ គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារបណ្ដុះបណ្ដាល វិជ្ជាជីវៈ និងកិច្ចការនារី មិនបានទទួលការគាំទ្រទេ គឺមានន័យថា បានធ្លាក់ក្នុងការបោះឆ្នោតនៅរដ្ឋសភានាព្រឹកថ្ងៃទី២៧ សីហា ដោយទទួលបានសំឡេងយល់ព្រម៥៦ មិនយល់ព្រម៦៣ និងអនុប្បវាទ៣ ។
ចំណែកលោក យឹម សុវណ្ណ ក៏បានធ្លាក់ពីការបោះឆ្នោតសម្រាប់គណៈកម្មការទី១០ផ្នែកអង្កេត បោសសម្អាតនិងប្រឆាំងអំពើពុករលួយដែរគឺបានទទួលសំឡេងឆ្នោតយល់ព្រម៥៦ មិនយល់ព្រម៦២ និងអនុប្បវាទ៣ មោឃៈ១ ក្នុងចំណោមកូរ៉ុមសភាចំនួន១២២រូប ។ តាមលទ្ធផលគួរឱ្យភ្ញាក់ផ្អើលនេះបង្ហាញថា លោកស្រី មូរ សុខហួរ បានទទួលការយល់ព្រមពីសំឡេងគណបក្សប្រជាជនតែ១សំឡេងប៉ុណ្ណោះ បើបូកសរុបជាមួយសំឡេងគណបក្សលោកស្រី៥៥សំឡេង ។ បន្ទាប់ពីការចេញលទ្ធផលបែបនេះសម្ដេចពញាចក្រី ហេង សំរិន សម្ដេចអគ្គមហាសេនាបតីតេជោ ហ៊ុន សែន លោក សម រង្សុី និងលោក កឹម សុខា ក៏បានជួបជជែកគ្នាភ្លាមក្នុងសាលប្រជុំ ។
សម្ដេចអគ្គមហាពញាចក្រីហេង សំរិន ប្រធានអង្គប្រជុំ បានប្រកាសបិទសម័យប្រជុំរដ្ឋសភាវិសាមញ្ញនីតិកាលទី៥ នាថ្ងៃទី២៧ សីហា ។ នៅពេលប្រកាសបិទសម័យ ប្រជុំរដ្ឋសភាវិសាមញ្ញនីតិកាលទី៥នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលជាអ្នកតំណាងរាស្ត្រមួយរូបពុំបានផ្ដល់អត្ថាធិប្បាយអ្វីទេ ។
ដោយឡែកលោក សម រង្សុី ប្រធានគណបក្សសង្គ្រោះជាតិ និងជាសមាជិករដ្ឋសភានីតិកាលទី៥នេះ បានផ្ដល់អត្ថាធិប្បាយជុំវិញការបោះឆ្នោតជ្រើសតាំងជំនួសនិងបំពេញបន្ថែមសមាជិកគណៈកម្មការនានានៃរដ្ឋសភាដោយបញ្ជាក់ថា ថ្ងៃនេះមានភាពរអាក់រអួលបន្ដិចដោយយើងមានការសោកស្ដាយ តែយើងនឹងជំរុញឱ្យមានដំណោះស្រាយសមស្របនឹងស្មារតីនៃកិច្ចព្រមព្រៀងកាលពីថ្ងៃទី២២ កក្កដា ឆ្នាំ២០១៤ រវាងគណបក្សទាំងពីរ ។ ដោយចង់សំដៅលើបេក្ខភាពដែលបានធ្លាក់ឆ្នោតគឺលោកស្រីមូរ សុខហួរ និងលោក យឹម សុវណ្ណ លោក សម រង្សុី មានប្រសាសន៍ថា ជាសិទ្ធិរបស់គណបក្សសង្គ្រោះជាតិក្នុងការជ្រើសរើសបេក្ខជនប្រធាននៃគណៈកម្មការទាំងពីរ ដែលថ្ងៃនេះពុំបានអនុវត្តឱ្យបានពេញលេញ ពីព្រោះមានភាពរអាក់រអួល តែយើងជឿជាក់ថានឹងមានដំណោះស្រាយសមស្របក្នុងពេលអនាគតដ៏ខ្លីខាងមុខ ។
ទាក់ទងទៅនឹងសំណួរដែលសួរថា តើភាពរអាក់រអួលនេះមានការប៉ះពាល់ដល់កិច្ចព្រមព្រៀងដែរឬទេ ? លោក សម រង្ស៊ី មានប្រសាសន៍ថា យើងខិតខំប្រឹងប្រែងរក្សាស្មារតីចំពោះគណបក្សសង្គ្រោះជាតិ គឺគោរពស្មារតី១០០% ។ គណបក្សសង្គ្រោះជាតិទទូចសុំឱ្យគណបក្សជាដៃគូគោរពស្មារតី១០០%ដែរ ប៉ុន្តែយើងចង់សម្រួលចង់ឱ្យរដ្ឋសភាដំណើរការដើម្បីឈានទៅធ្វើ ហើយបញ្ចប់ការងារដ៏សំខាន់ ដូចជាវិសោធនកម្មរដ្ឋធម្មនុញ្ញ វិសោធនកម្មច្បាប់បោះឆ្នោត ជ្រើសរើសសមាជិកគណៈកម្មាធិការជាតិរៀបចំការបោះឆ្នោត (គ.ជ.ប) ថ្មី និងមានការងារផ្សេងទៀតដូចជាវិសោធនកម្មបទបញ្ជាផ្ទៃក្នុងរដ្ឋសភា ត្រូវពិនិត្យច្បាប់ថ្មីៗមួយចំនួននិងច្បាប់ចាស់ៗដែលបានអនុម័តហើយតើត្រឹមត្រូវឬចន្លោះខ្វះ ការកែប្រែយា៉ងម៉េច ដូច្នេះការងារមានច្រើន ។ ដូច្នេះថ្ងៃនេះយើងបង្ហាញសុច្ឆន្ទៈរបស់យើង ដោយបានបំពេញការងារជ្រើសរើសថ្នាក់ដឹកនាំក្បាលម៉ាស៊ីនថ្មីនៃរដ្ឋសភាតាមបំណង ។
លោក សម រង្ស៊ី បញ្ជាក់ថា ការបោះឆ្នោតមិនគាំទ្រ គឺចេញមកពីគណបក្សប្រជាជនកម្ពុជា ព្រោះយើងគិតតួលេខដែលបេក្ខភាពលោកស្រី មូរ សុខហួរ បេក្ខភាពលោក យឹម សុវណ្ណ គឺបានទទួល៥៦សំឡេង ។ ដូច្នេះខាងគណបក្សប្រជាជនកម្ពុជាបន្ថែមសំឡេងឱ្យយើងមួយ ប៉ុន្តែភាគច្រើនៃគណបក្សប្រជាជនកម្ពុជាជាង៦០ក្នុងករណីនីមួយៗហ្នឹងមិនគាំទ្របេក្ខភាពនេះ ។ លោក សម រង្ស៊ី បន្តថា យើងបានរូបមន្តតែប៉ុណ្ណឹង ដើម្បីឱ្យដំណើរការទៅមុខ តែយើងនឹងទាមទារដើម្បីធ្វើម៉េចឱ្យអនុវត្តឱ្យបានត្រឹមត្រូវឱ្យបានចេញនូវអ្វីដែលយើងគ្រោងទុកពី ដើមទី ។ ខ្ញុំមិនចង់សន្និដ្ឋានដល់កម្រិតលទ្ធផលនេះថា ក្បត់កិច្ចព្រមព្រៀងទេ យើងនៅតែមានជំនឿថា យើងនឹងសម្រេចបាននូវអ្វីដែលយើងចង់បានថា ភាគីទាំងពីរបានបង្ហាញថា ចង់ឱ្យមានការកែទម្រង់ កែលម្អកែតម្រូវអ្វីដែលធ្វើខុសឆ្គងពីមុនដែលមានកង្វះខាត ។ ដូច្នេះយើងចង់រៀបចំការងារហ្នឹង ជាពិសេសការងារបោះឆ្នោតលើកក្រោយឱ្យមានភាពសេរី ត្រឹមត្រូវ យុត្តិធម៌ ត្រូវតែមាន គ.ជ.ប ថ្មី ត្រូវតែមានសមាជិក សមាជិកាថ្មី មានច្បាប់បោះឆ្នោតថ្មី ហើយ គ.ជ.ប នោះមានចែងនៅក្នុងរដ្ឋធម្មនុញ្ញ ជាវិធានការដ៏សំខាន់ដើម្បីធានាការបោះឆ្នោតលើកក្រោយដើម្បីគោរពឆន្ទៈប្រជារាស្ត្រ ៕
ចែករំលែកព័តមាននេះ