រាជធានីភ្នំពេញ ៖ ក្រុមហ៊ុនទិញលក់អេតចាយមួយបានយកសំរាមទៅគរចោលនៅលើដីឡូត៍មួយកន្លែង រួចដុតចោលបង្កទៅជាអគ្គិភ័យឆាបឆេះរាលដាលដល់ព្រៃនៅជុំវិញទីនោះដែលបង្កឱ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះទៅត្រួតពិនិត្យនិងបានហៅរថយន្តពន្លត់អគ្គិភ័យរបស់ស្នងការដ្ឋាននគបាលរាជធានីភ្នំពេញមួយគ្រឿងចេញមកអន្តរាគមន៍បាញ់ពន្លត់ ។ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោងជាង១០ យប់ ថ្ងៃទី ២៧ សីហា ២០១៤ នៅក្នុងដីឡូត៍មួយកន្លែង តាមផ្លូវ៧មករា ស្ថិតក្នុងភូមិប្រណាក់ សង្កាត់ជើងឯក ខណ្ឌដង្កោ ។
ប្រភពព័ត៌មានបានឱ្យដឹងថា ជារៀងរាល់ថ្ងៃគេតែងតែឃើញក្រុមហ៊ុនទិញលក់អេតចាយមួយបានយកសំរាមថង់ប្លាស្ទិច មកគរចោលនៅដីឡូត៍មួយនេះ ហើយមុនពេលកើតហេតុគេឃើញខាងក្រុមហ៊ុនទិញលក់អេតចាយ បានមកចាក់សំរាមគររួចដុតចោលតាំងពីម៉ោង៦ល្ងាច រហូតដល់ម៉ោងជាង១០យប់ ភ្លើងបាញ់ឆេះគំនរសំរាមខាងលើយ៉ាងខ្លាំងបង្កការភ្ញាក់ផ្អើលដល់ប្រជាពលរដ្ឋនិងសមត្ថកិច្ចហៅរថយន្តពន្លត់អគ្គិភ័យមួយគ្រឿងបាញ់ពន្លត់រហូតរលត់ទាំងស្រុងនៅម៉ោងជាង១១យប់ ថ្ងៃដដែល។
ចែករំលែកព័តមាននេះ