រាជធានីភ្នំពេញ ៖ ប្រជាពលរដ្ឋសហការជាមួយសមត្ថកិច្ចខណ្ឌចំការមនបានធ្វើការដេញស្ទាក់ចាប់បានរថយន្តកាមរីមួយគ្រឿងធ្លាក់កាងមុខ ព្រោះសង្ស័យជាប់ពាក់ព័ន្ធនឹងគ្រោះថ្នាក់ចរាចរណ៍ហើយបើករត់គេច ។ រថយន្តខាងលើត្រូវសមត្ថកិច្ចស្ទាក់ចាប់បាននៅវេលាម៉ោង ៨និង៤០នាទីយប់ ថ្ងៃទី២៧ សីហា ២០១៤នៅចំណុចផ្លូវ១៦៣ កែងនិងផ្លូវ៤៣២ ស្ថិតក្នុងសង្កាត់ទួលទំពូង២ ខណ្ឌចំការមន ។
បើតាមបុរសឈ្មោះ ផាន់ នី ជាជាងបាញ់ឆ្នាំរថយន្តនិងជាអ្នកបើករថយន្តខាងលើបានឱ្យដឹងថា នៅមុនពេលកើតហេតុរូបគាត់បានបើករថយន្តកាមរី ពណ៌ទឹកប្រាក់ មួយគ្រឿង ពាក់ស្លាកលេខភ្នំពេញ2S-7435 ដោយធ្វើដំណើរចេញពីម្តុំផ្សារ ប៉េងហេង តាមផ្លូវលេខ៣៣១ ក្នុងទិសដៅពីត្បូងទៅជើង ខណៈមកដល់មុខផ្សារប៉េង ហេង ក៏មានម៉ូតូហុងដាឌ្រីម សេ១២៥ មួយគ្រឿងមិនចាំស្លាកលេខបានបើកបញ្ច្រាសផ្លូវមកបុករថយន្តរបស់គាត់ ពេលនោះដោយសារពុំមានរបួសធ្ងន់គ្រាន់តែរលាត់ស្បែកតិចតួច អ្នកបើកម៉ូតូបានលើកម៉ូតូជិះចេញបាត់ទៅ ។ ចំណែករូបគាត់មិនដឹងថាធ្លាក់កាងរថយន្តនោះទេ រួចក៏បើករថយន្តបន្តទៅមុខទៀតក៏ត្រូវសមត្ថកិច្ចនិងប្រជាពលរដ្ឋដេញចាប់តែម្តង។
ក្រោយពេលសមត្ថកិច្ចធ្វើការសាកសួរបុរសបើករថយន្តធ្លាក់កាងខាងលើមក សមត្ថកិច្ចក៏បានសម្រេចថា និងរក្សាទុករថយន្តនេះនៅនិងអធិការដ្ឋានខណ្ឌចំការមនសិន ព្រោះថាបុរសខាងលើនិយាយមិនសូវច្បាស់លាស់ ហើយមានជាតិស្រវឹងក្នុងខ្លួនច្រើនផង ។
ចែករំលែកព័តមាននេះ