ខេត្តពោធិ៍សាត់ ៖ អាជីវកម្មបូមខ្សាច់ចំនួន០៧កន្លែងក្នុងស្ទឹងពោធិ៍សាត់ចាប់ពីសង្កាត់លលកស ក្រុងពោធិ៍សាត់ដល់ ឃុំបាក់ចញ្ចៀន និងឃុំសំរោង ស្រុកភ្នំក្រវាញ ដែលអាជ្ញាប័ណ្ណផុតសុពលភាពហើយម្ចាស់អាជីវកម្មនីមួយៗមិនព្រមទៅសុំច្បាប់បន្តពីក្រសួងជំនាញនោះ បានត្រូវផ្អាកសកម្មភាពបណ្ដោះអាសន្នមួយរយៈសិន ដោយរង់ចាំមានគោលការណ៍ជាថ្មីពីគណៈកម្មាធិការគ្រប់គ្រងធនធានខ្សាច់ទើបឲ្យដំណើរការឡើងវិញ។
កាលពីថ្ងៃទី២៣ ខែសីហា ឆ្នាំ២០១៤ កន្លងទៅថ្មីៗនេះក្រុមការងាររបស់លេខាធិការដ្ឋាននៃគណៈកម្មាធិការគ្រប់គ្រងធនធានខ្សាច់បានចុះធ្វើអធិការកិច្ចលើការធ្វើអាជីវកម្មខ្សាច់នៅតាមដងស្ទឹងពោធិ៍សាត់ប៉ែកខាងលើក្នុងសង្កាត់លលកស ឃុំបាក់ជញ្ចៀននិងឃុំសំរោង ។ បន្ទាប់ពីពិនិត្យឃើញអាជ្ញាប័ណ្ណផុតសុពលភាពក្រុមការងារក៍បានធ្វើការផ្អាកសកម្មភាពអាជីវកម្មបូមខ្សាច់ចំនួន០៧កន្លែង។
មន្ត្រីមន្ទីរធនធានទឹក និងឧតុនិយមខេត្តពោធិ៍សាត់បញ្ជាក់ថា ការផ្អាកអាជីវកម្មខ្សាច់នេះ ជាវិធានការណ៍របស់ក្រសួងធនធានទឹក និងឧតុនិយមទាំងការធ្វើអាជីវកម្មខ្សាច់បក និងតាមដងស្ទឹង ចាប់ពីថ្ងៃទី២៣នេះតទៅ ដោយរង់ចាំមានវិធានការជាថ្មីពីគណៈកម្មាធិការគ្រប់គ្រងធនធានខ្សាច់សិន។ ក្នុងករណីអាជីវករទាំងអស់នៅតែប្រព្រឹត្តទាំងការបូម ការបកយកខ្សាច់ និងការដឹកជញ្ជូន គណកម្មាធិការនឹងធ្វើការរឹបអូសយកនូវគ្រប់មធ្យោបាយទាំងអស់ បញ្ជូនទៅតុលាការហើយបដិសេធឫលុបចោលនូវទីតាំងមួយចំនួនដែលបាននិងកំពុងស្នើរសុំនិងទីតាំងដែលមានគោលការណ៍រួចហើយ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ