ប្រធានាធិបតីអ៊ុយក្រែន លោក ប៉េត្រូ ប៉ូរ៉ូឆេនកូ បានសន្យាកាលពីយប់ថ្ងៃទី២៦ មក២៧ សីហា ក្រោយពីជួបពិភាក្សាទល់មុខគ្នាជាមួយប្រធានាធិបតីរុស្ស៊ី លោកវ្ល៉ាឌីមៀរ ពូទីន នៅទីក្រុងមីនស្ក៍ ប្រទេសបេឡារុស ថានឹងធ្វើការក្នុងគោលបំណងស្វែងរកឱ្យបានឆាប់រហ័សតាមដែលអាចធ្វើទៅបាននូវកិច្ចព្រមព្រៀងឈប់បាញ់គ្នាមួយ ជាមួយពួកបំបែកខ្លួននិយមនៅភាគខាងកើតប្រទេស ។
លោកពូទីន ក៏វិនិច្ឆ័យដែរថា ការជួបទល់មុខគ្នានោះជាលើកដំបូង រវាងមេដឹកនាំទាំងពីរ ក្រោយពីជួបគ្នាកាលពីថ្ងៃទី៦ មិថុនា នៅន័រម៉ង់ឌី ប្រទេសបារាំងមក មានលក្ខណៈវិជ្ជមាន ។
ទោះបីយ៉ាងណា លោក ពូទីន បញ្ជាក់ថា លោកជំរុញឱ្យក្រុងគៀវ មានការស្រុះស្រួលគ្នាជាមួយពួកបះបោរលើបណ្តាលក្ខខណ្ឌនៃបទឈប់បាញ់គ្នាជាយថាហេតុមួយ ។ លោកបញ្ជាក់ថា ក្រុងមូស្គូពុំធ្វើអន្តរាគមន៍ដោយផ្ទាល់ក្នុងការចរចាឡើយ ។ប្រធានាធិបតីរុស្ស៊ីថ្លែងទៅកាន់សារព័ត៌មាន នាថ្ងៃទី២៧ សីហា ថា យើងពុំបានពិភាក្សាគ្នាលើបញ្ហានោះដោយស៊ីជម្រៅឡើយ ហើយរុស្ស៊ីពុំអាចពិភាក្សាដោយស៊ីជម្រៅលើបណ្តាលក្ខខណ្ឌនៃបទឈប់បាញ់គ្នាមួយ និងបណ្តាកិច្ចព្រមព្រៀងរវាងក្រុងគៀវ ដូណេតស្ក៍ និងលូហ្គានស្ក៍ ដែរ ។ លោកសង្កត់ធ្ងន់ថា ពុំមែនយើងជាអ្នកធ្វើទេ គឺអ៊ុយក្រែន ។ លោកបន្តថា យើងគ្រាន់តែ អាចចូលរួមចំណែកបង្កើតបរិយាកាសជឿទុកចិត្តគ្នាមួយសំដៅបង្កើតដំណើរការនៃការចរចា ហើយនោះជាយោបល់ចាំបាច់បំផុតរបស់ខ្ញុំ ។
ចំណែកប្រធានាធិបតីអ៊ុយក្រែន ក្នុងសេចក្តីប្រកាសមួយថ្លែងថា ផែនការមួយនឹងរៀបចំដើម្បីឱ្យមានបទឈប់បាញ់គ្នាមួយ ដោយឆាប់រហ័សតាមដែលអាចធ្វើទៅបាន ហើយត្រូវមានលក្ខណៈទេ្វភាគី ។ លោកបន្តថាការចរចា ពិតជាលំបាក ហើយស្មុគស្មាញ ។
និយាយរួមមក ការជួបគ្នានៅទីក្រុងមីនស្ក៍ រវាងមេដឹកនាំទាំង២ បានបញ្ចប់ដោយពុំសម្រេចបានលទ្ធផលអ្វីក្រៅពីការកត់សម្គាល់ថាវិជ្ជមាន តែពុំមានការនិយាយថា តើពួកឧទ្ទាមស្និទ្ធរុស្ស៊ីនឹងព្រមទទួលយកគំនិតនៃបទឈប់បាញ់គ្នា ហើយថាតើលើវិធីសាស្ត្រអ្វីខ្លះ ដែលពួកឧទ្ទាមអាចយល់ព្រមឡើយ ។
ដោយបញ្ជាក់ថា នោះជាកិច្ចការផ្ទៃក្នុងរវាងអ៊ុយក្រែន និងអ៊ុយក្រែន លោកពូទីន បានលើកពីចំណុចសំខាន់មួយក្នុងចំណោមចំណុចនៃការខ្វែងគំនិតគ្នា គឺការចោទប្រកាន់របស់ក្រុងគៀវ ដែលថារុស្ស៊ីបញ្ជូនអាវុធ និងពួកយុទ្ធជនកាត់តាមព្រំដែន ។
ប្រការគួរឱ្យកត់សម្គាល់មួយគឺ ពេលជួបគ្នាប្រធានាធិបតីទាំង២ បានចាប់ដៃគ្នាយ៉ាងណែន ។ មុនពេលជួបពិភាក្សាទល់មុខគ្នារយៈពេលដល់ទៅ២ម៉ោង លោក ប៉ូរ៉ូឆេនកូ និងលោកពូទីន បានចូលរួមពិភាក្សារយៈពេល៦ម៉ោង ជាមួយតំណាងរបស់សហភាពអឺរ៉ុប និងមេដឹកនាំបេឡារុស និងកាហ្សាក់ស្ថាន ។
ការជួបគ្នានោះមានគោលដៅ ជាពិសេសបញ្ចប់ជម្លោះរយៈពេល៦ខែមកហើយនៅអ៊ុយក្រែនដែលបំពុលទំនាក់ទំនងរវាងរុស្ស៊ី និងបណ្តាប្រទេសលោកខាងលិច ហើយបណ្តាលឱ្យមនុស្សស្លាប់ជាង២.២០០នាក់រួចហើយ ។ មានសញ្ញាល្អក្នុងការពិភាក្សាគ្នា ដោយលោកពូទីន ថ្លែងថា លោកបានព្រមព្រៀងជាមួយសមភាគីអ៊ុយក្រែន ដើម្បីបើកធ្វើការចរចាឡើងវិញ លើបញ្ហាឧស្ម័នដ៏ចម្រូងចម្រាស់៕
ចែករំលែកព័តមាននេះ