រដ្ឋមន្ត្រីការបរទេសអាមេរិក លោកចន ឃ័ររី ក៏ដូចជាអគ្គលេខាធិការ អ.ស.ប បានសម្តែងការអបអរសាទរចំពោះកិច្ចព្រមព្រៀងឈប់បាញ់គ្នារវាងអុីស្រាអែល និងប៉ាឡេស្ទីននៅជ្រោយហ្គាហ្សាដោយសង្ឃឹមថា បទឈប់បាញ់គ្នានេះនឹងជាបុព្វបទឆ្ពោះទៅរកដំណើរការនយោបាយមួយ ។
ក្នុងចំណោមចំណុចសំខាន់ៗនៃកិច្ចព្រមព្រៀងនោះលាតត្រដាងដោយប្រមុខគណៈប្រតិភូប៉ាឡេស្ទីននៅទីក្រុងគែរ លោក AZZAM AL AHMED រួមមាន បើកផ្លូវសម្រាប់សេចក្តីត្រូវការខាងមនុស្សធម៌ និងស្បៀងសម្រាប់សម្ភារពេទ្យ និងបណ្តាសម្ភារដែលអាចយកមកជួសជុល ប្រព័ន្ធទឹក ភ្លើង និងទូរស័ព្ទចល័ត។ បុ៉ន្តែពុំមានភាពលម្អិតពីលទ្ធភាពនៃការរិតត្បិតការនាំចូលសម្ភារសំណង់ ឬការបើកឡើងវិញការនាំចេញពីជ្រោយហ្គាហ្សា ។
ការលុបចោលការរិតត្បិតសម្រាប់ពួកអ្នកនេសាទប៉ាឡេស្ទីន ក៏មាននិយាយដែរ ដោយការកម្រិតតំបន់នេសាទត្រឹមចម្ងាយ៣ម៉ាយត្រូវអនុញ្ញាតដល់៦ម៉ាយ (១១គីឡូម៉ែត្រ) បន្ទាប់មក១២ម៉ាយមុនពេលលុបចោល ។ចំពោះបញ្ហាកម្រិតព្រំដែនជ្រោយហ្គាហ្សា ជាការទាមទាររបស់អុីស្រាអែលត្រូវលើកទៅពិភាក្សាគ្នានៅទីក្រុងគែរក្នុងការចរចា ក៏ដូចជាការទាមទាររបស់ប៉ាឡេស្ទីនឱ្យបើកព្រលានយន្តហោះឡើងវិញ និងបើកកំពង់ផែសមុទ្រដែរ ។
នៅជ្រោយហ្គាហ្សា ក្រោយកិច្ចព្រមព្រៀងនេះ មេដឹកនាំជាច្រើនរបស់ក្រុមហាម៉ាស់ និងរបស់ក្រុមជីហាដនិយមអ៊ិស្លាមបានបង្ហាញមុខជាសាធារណៈជាលើកដំបូងចាប់តាំងពី៥០ថ្ងៃមកហើយ ។ យោងតាមការិយាល័យសម្របសម្រួលកិច្ចការមនុស្សធម៌របស់ អ.ស.ប OCHA ថា ការវាយលុករបស់អុីស្រាអែលមានឈ្មោះថា របងការពារបណ្តាលឱ្យមនុស្សស្លាប់២.១៤៣នាក់ និងរបួស១១.០០០នាក់នៅជ្រោយហ្គាហ្សា ហើយមនុស្សប្រមាណជា៤៧៥.០០០នាក់រត់ភៀសខ្លួន ។ ផ្ទះសរុប៥៥.០០០ខ្នងរងការប៉ះពាល់ដោយសារការវាយប្រហាររបស់អុីស្រាអែល ក្នុងនោះយ៉ាងតិច១៧.២០០ខ្នងរងការកម្ទេចទាំងស្រុង ឬស្ទើរទាំងស្រុង ៕
ចែករំលែកព័តមាននេះ