រាជធានីភ្នំពេញ ៖ អ្នកលេងស្នៀតជើងមកពីក្លិបកងពលតូចលេខ៧០ ហេង វិឆ័យ បានណាត់ជួបអ្នកលេងស្នៀតកណ្តាប់ដៃ សរ រាជសីហ៍ មកពីក្លិបមោងឫស្សីខេត្តបាត់ដំបង ប្រកួតសាកកម្លាំងគ្នាម្តងទៀតនៅលើសង្វៀនទូរទស្សន៍រាជធានីភ្នំពេញបុ៉ស្តិ៍លេខ៣ នាថ្ងៃអាទិត្យ ទី៣១ សីហា ខាងមុខនេះ ។ ហេង វិឆ័យ និងសរ រាជសីហ៍ ធ្លាប់ជួបប្រកួតគ្នាម្តងរួចមកហើយកាលពីជាងមួយខែមុន ដែលកាលណោះ សរ រាជសីហ៍ ជាអ្នកឈ្នះក្នុងស្ថានភាពលំបាកបំផុត ទើបលើកនេះ ហេង វិឆ័យ ណាត់ជួបដើម្បីសងសឹកវិញ បុ៉ន្តែមិនដឹងថា បានសម្រេចឬអត់នោះឡើយ ។
ហេង វិឆ័យ គឺជាអ្នកប្រដាល់ដែលពូកែខាងប្រើស្នៀតជើង ដោយចលនានៃការទាត់ចេញរបស់គេមិនត្រឹមតែមានភាពរហ័សរហួនបុ៉ណ្ណោះទេ ថែមទាំងពោរពេញទៅដោយកម្លាំងខ្លាំងទៀតផង ។ ចំណែកសរ រាជសីហ៍ ពូកែខាងប្រើស្នៀតកណ្តាប់ដៃផ្តួលគូប្រកួត និងមានចិត្តសឿងគួរសម ។ ជួបគ្នាលើកនេះ ហេង វិឆ័យ បានសន្យាថា លែងទុកឱកាសឱ្យសរ រាជសីហ៍ ទៀតហើយ។ ទោះបីយ៉ាងណា សំអាងលើប្រវត្តិធ្លាប់ឈ្នះបានម្តង ទើបលើកនេះ សរ រាជសីហ៍ នៅតែមានជំនឿចិត្តឈ្នះច្រើនជាង ។
ក្រៅពីគូជក់ចិត្តនេះទៅ នៅលើសង្វៀនដដែល កីឡាករអាំង សំអាត មកពីក្លិបតាព្រហ្មមានជ័យ នឹងជួបប្រកួតជាមួយកីឡាករម៉ន វិរៈ មកពីក្លិបការិយាល័យទី៥ កងទ័ពជើងគោកព្រែកឯងកីឡា ។
កីឡាករពុធ សំអូន មកពីក្លិបពុទ្ធសេរីវង្សព្រែកតាទែន ជួបប្រកួតជាមួយកីឡាករយ៉ន វិចិត្រ មកពីក្លិបទ័ពពិសេសឆត្រយោង៩១១ ។ កីឡាករអាន មុន្នី មកពីសមាគមយុវជនកម្ពុជាខណ្ឌមានជ័យ ជួបប្រកួតជាមួយកីឡាករសោម វិឆ័យ មកពីក្លិបសាលវ័ន្តកីឡា និងកីឡាករសេន កុសល មកពីក្លិបមោងឫស្សីខេត្តបាត់ដំបង ជួបប្រកួតជាមួយកីឡាករគង់ ហួរ មកពីសមាគមកីឡាប្រដាល់នៃកងយោធពលខេមរភូមិន្ទ ៕
ចែករំលែកព័តមាននេះ