រាជធានីភ្នំពេញ ៖ ការប្រកួតកីឡាសូរីន ហ្សីកាំប៉ូ ជ្រើសរើសជើងឯកថ្នាក់ជាតិលើកទី២ប្រចាំឆ្នាំ២០១៤ ដែលជាកម្មវិធីប្រកួតប្រចាំឆ្នាំរបស់ក្រសួងអប់រំយុវជននិងកីឡា បានចាប់ផ្តើមបើកការប្រកួតជាផ្លូវការ នាសៀលថ្ងៃទី២៧ សីហា ក្នុងសាលដំបូលទូកថ្មីនៃពហុកីឡដ្ឋានជាតិ ដែលតាមគម្រោងកម្មវិធីខាងលើ នឹងបញ្ចប់នៅថ្ងៃទី៣០ ខែឆ្នាំដដែល ។
រាជធានីភ្នំពេញ ៖ ការប្រកួតកីឡាសូរីន ហ្សីកាំប៉ូ ជ្រើសរើសជើងឯកថ្នាក់ជាតិលើកទី២ប្រចាំឆ្នាំ២០១៤ ដែលជាកម្មវិធីប្រកួតប្រចាំឆ្នាំរបស់ក្រសួងអប់រំយុវជននិងកីឡា បានចាប់ផ្តើមបើកការប្រកួតជាផ្លូវការ នាសៀលថ្ងៃទី២៧ សីហា ក្នុងសាលដំបូលទូកថ្មីនៃពហុកីឡដ្ឋានជាតិ ដែលតាមគម្រោងកម្មវិធីខាងលើ នឹងបញ្ចប់នៅថ្ងៃទី៣០ ខែឆ្នាំដដែល ។
សម្រាប់ការប្រកួតលើកនេះ មានក្លិបនិងសមាគមចូលរួមចំនួន៥ដូចជា ក្លិបជម្រើសជាតិ, ក្លិបយុវជន, ក្លិបម៉ុងឌីយ៉ាល់, ក្លិបដឺប្លេស និងសមាគមស្មាតឃីដ ខេត្តសៀមរាប និងមានកីឡាករ-កីឡាការិនីចូលរួមសរុបចំនួន៩៤នាក់ ក្នុងនោះកីឡាការិនីមាន២២នាក់ ។ ចំពោះវិញ្ញាសានៃការប្រកួតមាន ៖
វិញ្ញាសាកាតាឯកត្តជនបុរស-នារីមាន២ប្រភេទគឺ ក្របខ័ណ្ឌក១ និងក២ ។ វិញ្ញាសាកាតាគូបុរសសម្តែង២នាក់មាន៣ប្រភេទ គឺ១-កាតាគូបុរស ២-កាតាគូនារី និង៣-កាតាគូចម្រុះបុរស-នារី ។ វិញ្ញាសាប្រយុទ្ធឯកត្តជនបុរស ក្របខ័ណ្ឌក១ ក២ មាន៨ប្រភេទទម្ងន់ក្នុងនោះក្របខ័ណ្ឌក១មាន៤ប្រភេទទម្ងន់គឺទម្ងន់៥៥គីឡូក្រាមចុះក្រោម, ៦០គីឡូក្រាមចុះក្រោម,៦៥គីឡូក្រាមចុះក្រោម និង៦៥គីឡូក្រាមឡើង ។ ក្របខ័ណ្ឌក២ មានទម្ងន់ចាប់ពី៤០គីឡូក្រាមចុះក្រោម ៥០គីឡូក្រាមចុះក្រោម និង៥០គីឡូក្រាមឡើងទៅ ។
ចំពោះផ្នែកនារី ក្របខ័ណ្ឌក១ ក២ មាន៣ប្រភេទទម្ងន់គឺចាប់ពីទម្ងន់៤៤គីឡូក្រាមចុះក្រោម, ៥៣គីឡូក្រាមចុះក្រោម និង៥៣គីឡូក្រាមឡើងទៅ ។ លោក ឡាច ច័ន្ទសុវណ្ណ ប្រធានសហព័ន្ធកីឡាសូរីនហ្ស៊ីកាំប៉ូមានប្រសាសន៍ថា សូរីនហ្ស៊ីកាំប៉ូ ជាប្រភេទកីឡាថ្មីមួយសម្រាប់កម្ពុជា ដែលទើបចូលមកដល់កាលពីឆ្នាំ២០១១កន្លងទៅ ។ ទោះបីវាជាប្រភេទកីឡាថ្មីក៏ពិតមែន ប៉ុន្តែវាជាកីឡាដែលមានសក្តានុពលមួយប្រភេទដែលបានធ្វើឱ្យកម្ពុជាទទួលបានមេដាយមាស ប្រាក់ និងសំរឹទ្ធជាច្រើន ក្នុងការប្រកួតកីឡាស៊ីហ្គេមលើកទី២៦និង២៧ ដែលទើបបញ្ចប់កាលពីឆ្នាំ២០១៣នៅប្រទេសមីយ៉ាន់ម៉ា ។
ចំពោះការរៀបចំការប្រកួតជ្រើសរើសជើងឯកថ្នាក់ជាតិឆ្នាំ២០១៤នេះ ជាឱកាសមួយសម្រាប់កីឡាករ-កីឡាការិនីដែលមានទេពកោសល្យ និងសមត្ថភាពល្អៗប្រកួតប្រជែង និងឈ្វេងយល់ពីកម្រិតបច្ចេកទេសគ្នាទៅវិញទៅមក ។ ជាពិសេសយើងក៏បានគិតគូររួចជាស្រេចក្នុងការប្រកួតកីឡាស៊ីហ្គេមដែលកម្ពុជាទទួលធ្វើជាម្ចាស់ផ្ទះ SEA Games ក្នុងឆ្នាំ២០២៣ខាងមុខ ដោយពេលនេះយើងបានបណ្តុះបណ្តាលថ្នាលជំនាន់ក្រោយល្អៗជាច្រើន ដែលយើងសង្ឃឹមថាពួកគេប្រាកដជាដណ្តើមបានមេដាយជូនជាតិមាតុភូមិជាក់ជាមិនខានឡើយ ៕
ចែករំលែកព័តមាននេះ