នាងប៉េត្រា គ្វីតូវ៉ា កំពុងបោះជំហានឆ្ពោះទៅរកការឈ្នះពានក្របខ័ណ្ឌធំជាលើកទី២ ប្រចាំរដូវកាល ខណៈកាលពីថ្ងៃអង្គារ ទី២៦ សីហា នៅឯទីលាន Flushing Meadows ស្ថិតក្នុងទីក្រុងញូវយ៉ក នាងបានបំបាក់កីឡាការិនីបារាំង Kristina Mladenovic ក្នុងជុំទី១ ក្របខ័ណ្ឌ US Open ។
ម្ចាស់ពានក្របខ័ណ្ឌ Wimbledon ឆ្នាំ២០១៤ រូបនេះ បានឈានជើងចូលប្រកួតក្នុងក្របខ័ណ្ឌ US Open លើកនេះក្នុងជំនឿចិត្តមួយយ៉ាងខ្ពស់ ពោលគឺបន្ទាប់ពីរូបនាងដណ្តើមបានព្រានព្រឹត្តិការណ៍កម្តៅសាច់ដុំ New Haven Open កាលពីសប្តាហ៍កន្លងទៅ ។ នៅជុំបន្ទាប់ នាងនឹងប៉ះជាមួយកីឡាការិនីមិត្តរួមជាតិ Petra Cetkovska ។
ចំណែកជ័យលាភីលេខ២ ក្របខ័ណ្ឌ Australian Open ឆ្នាំ២០១៤ នាង Dominika Cibulkova ត្រូវហាលអាវត្រឡប់ទៅផ្ទះវិញ បន្ទាប់ពីបរាជ័យក្រោមថ្វីដៃកីឡាការិនីវ័យ១៥ឆ្នាំ ម្ចាស់ផ្ទះ Catherine Bellis ក្នុងលទ្ធផល៦-១, ៤-៦ និង៦-៤ ។ បើគិតពីឆ្នាំ១៩៩៦មក Bellis ជាកីឡាការិនីវ័យក្មេងដំបូងគេដែលបានយកឈ្នះកីឡាការិនីលំដាប់ទី១២ របស់កម្មវិធីដូចជានាង Cibulkova នេះ ។
កីឡាការិនីកាណាដា Eugenie Bouchard ដែលត្រូវនាងគ្វីតូវ៉ា បំបាក់កាលពីប្រកួតក្នុងវគ្គផ្តាច់ព្រ័ត្រក្របខ័ណ្ឌ Wimbledon មិនជួបនឹងសំណាងអាក្រក់ដូចជានាង Cibulkova ឡើយ។ នាងបានឈានចូលទៅជុំបន្ត ក្រោយពីយកឈ្នះកីឡាការិនីបេឡារុស Olga Govortsova នៅទីលាន Louis Armstrong ក្នុងលទ្ធផល៦-២ និង៦-១ ។ នាងនិយាយថា ៖ «ខ្ញុំសប្បាយចិត្តខ្លាំងណាស់ដែលបានឈ្នះការប្រកួតនៅថ្ងៃនេះ ។ ខ្ញុំនឹងរក្សាឱ្យបាននូវជ័យជម្នះនេះសម្រាប់សប្តាហ៍បន្តបន្ទាប់ទៀត ។ ខ្ញុំចូលចិត្តប្រកួតក្នុងព្រឹត្តិការណ៍ Grand Slam» ។
ឯអតីតកីឡាការិនីលំដាប់ទី១ ពិភពលោក អាណា អីុវ៉ាណូវិក ក៏បានឡើងទៅជុំបន្តផងដែរក្រោយពីឈ្នះកីឡាការិនីអាមេរិក Alison Riske ក្នុងលទ្ធផល៦-៣ និង៦-០ ។ សម្រាប់រដូវកាលឆ្នាំ២០១៤នេះ នាងអុីវ៉ាណូវិច ដណ្តើមបានពានជើងឯកចំនួន៣កម្មវិធីរួចមកហើយ។ អ្វីដែលពិសេសបំផុតនោះ គឺនាងធ្លាប់បានផ្តួលស៊េរីណា វីលៀម ក្នុងជុំទី៤ នៃក្របខ័ណ្ឌ Australian Open ផងដែរ ។ នាងនិយាយថា ៖ «ឆ្នាំកន្លងទៅ មានការផ្លាស់ប្តូរគួរឱ្យភ្ញាក់ផ្អើលមួយសម្រាប់ខ្ញុំ ។ ខ្ញុំរៀនសូត្របានច្រើនពីខ្លួនឯងពីគោលដៅ» ៕
ចែករំលែកព័តមាននេះ