បទឈប់បាញ់គ្នាថ្មីបានចូលជាធរមាននៅហ្គាហ្សាពីថ្ងៃ២៦ សីហា វេលាម៉ោង១៩ ម៉ោងក្នុងស្រុកទៅ បន្ទាប់ពីកិច្ចព្រមព្រៀងមួយត្រូវបានចុះហត្ថលេខារវាងអីុស្រាអែល និងបណ្តាក្រុមប៉ាឡេស្ទីន ក្នុងនោះមានទាំងក្រុមហាម៉ាស់ផង តាមរយៈកិច្ចចរចាដែលមានអេហ្ស៊ីបជាអាជ្ញាកណ្តាល ។
នាវេលាម៉ោង១៩ ថ្ងៃទី២៦ សីហា ពួកសកម្មប្រយុទ្ធប៉ាឡេស្ទីនបាននាំគ្នាបាញ់ទៅលើអាកាសដើម្បីអបអរសាទរចំពោះការប្រកាសតាមប្រដាប់បំពងសំឡេង តាមព្រះវិហារអ៊ិស្លាមទាំងឡាយពីជ័យជម្នះនៃការតស៊ូរបស់ប៉ាឡេស្ទីន ។ តាមដងវិថីទាំងឡាយនៅហ្គាហ្សា គេឮសូរការចុចស៊ីប្លេយ៉ាងកងរំពង ហើយបណ្តារថយន្តបានរត់ដោយបើកភ្លើង ។
នាល្ងាចថ្ងៃទី២៦ សីហានោះ ប្រធានាធិបតីប៉ាឡេស្ទីនលោកម៉ាមូដអាប់បាស់ បានប្រកាសពីកិច្ចព្រមព្រៀងឈប់បាញ់គ្នាមួយចុះហត្ថលេខានៅទីក្រុងគែរ រវាងអុីស្រាអែល និងប៉ាឡេស្ទីន ដែលកិច្ចព្រមព្រៀងនេះចូលជាធរមានចាប់ពីម៉ោង១៩ ម៉ោងក្នុងស្រុកទៅនៅជ្រោយហ្គាហ្សា។លោកអាប់បាស់ បានធ្វើសេចក្តីថ្លែងការណ៍ខ្លីមួយផ្សាយតាមទូរទស្សន៍ផ្លូវការប៉ាឡេស្ទីន ដោយក្នុងសេចក្តីថ្លែងការណ៍នោះលោកគូសបញ្ជាក់ថា កិច្ចព្រមព្រៀងឈប់បាញ់គ្នារយៈពេលយូរមួយត្រូវបានចុះហត្ថលេខាហើយនៅក្រុងគែរ ។ ខ្ញុំចង់ប្រាប់ថា បណ្តាមេដឹកនាំប៉ាឡេស្ទីនបានទទួលយកការអំពាវនាវរបស់អេហ្ស៊ីប ឱ្យមានបទឈប់បាញ់គ្នាទាំងស្រុង និងជាអចិន្ត្រៃយ៍ និងថា ចាប់ពីពេលនេះទៅយើងចាប់ផ្តើមឆ្លើយតបតាមសំណើ និងសេចក្តីត្រូវការទាំងឡាយរបស់ប្រជាជនយើងនៅហ្គាហ្សា ។
ចាប់ពីថ្ងៃទី៨ កក្កដាមក អុីស្រាអែលបានបើកធ្វើប្រតិបត្តិការយោធាដោយទ្រង់ទ្រាយមួយទាំងជើងអាកាស ទាំងជើងគោក និងជើងទឹកប្រឆាំងបណ្តាក្រុមសកម្មប្រយុទ្ធប៉ាឡេស្ទីននៅជ្រោយហ្គាហ្សា ។ រយៈពេល៥០ថ្ងៃនៃសង្គ្រាមជនប៉ាឡេស្ទីនស្លាប់ជាង២.១០០នាក់ ហើយខាងអុីស្រាអែលស្លាប់៧០នាក់ រួចជ្រោយហ្គាហ្សារងការកម្ទេចធ្ងន់ធ្ងរបំផុត ៕
ចែករំលែកព័តមាននេះ