អាជ្ញាធរអ៊ុយក្រែនថ្លែងកាលពីថ្ងៃទី២៦ សីហា ថា បណ្តាឧទ្ធម្ភាគចក្រយោធារុស្ស៊ី កាលពីថ្ងៃទី២៥ សីហា បានវាយប្រហារលើប៉ុស្តិ៍ព្រំដែនមួយនៅតំបន់លូហ្គានស្ក៍ ភាគខាងកើតអ៊ុយក្រែន ដោយសម្លាប់ឆ្មាំការពារព្រំដែនអ៊ុយក្រែន៤នាក់ ។ ក្នុងសន្និសីទកាសែតមួយ លោក អានឌ្រីអុីលូឆេនកូ អ្នកនាំពាក្យយោធាអ៊ុយក្រែន គូសបញ្ជាក់ថា ឧទ្ធម្ភាគចក្រប្រយុទ្ធ២គ្រឿងធុន MI-24 របស់កងទ័ពរុស្ស៊ី បានបាញ់គ្រាប់រ៉ុក្កែតលើកងឆ្មាំព្រំដែនអ៊ុយក្រែន ។ ការវាយប្រហារនេះសម្លាប់ឆ្មាំព្រំដែន៤នាក់ ហើយ៣នាក់ទៀតត្រូវរបួស ។
ក្រោយការវាយប្រហារនោះ ការប្រយុទ្ធគ្នាយ៉ាងខ្លាំងក្លាផ្ទុះឡើងនៅតំបន់ព្រំដែនរុស្ស៊ី-អ៊ុយក្រែន ហើយកងកម្លាំងសន្តិសុខអ៊ុយក្រែន អាចរារាំងកងទាហានឈ្លានពានរុស្ស៊ី មិនឱ្យចូលដែនដីអ៊ុយក្រែន ។លោកលូឆេនកូ គូសបញ្ជាក់ផងដែរថា កងទ័ពរដ្ឋាភិបាលចាប់បានទាហានរុស្ស៊ី១០នាក់ នៅតំបន់ដូណេតស្ក៍ ខណៈទាហានទាំងនោះចូលដែនដីអ៊ុយក្រែន ដើម្បីធ្វើអ្វីមួយ ។ក្រសួងការពារប្រទេសរុស្ស៊ីអះអាងថា ទាហានទាំងនោះបំពេញបេសកកម្មល្បាតនៅព្រំដែន ហើយពួកគេអាចឆ្លងចូលព្រំដែនអ៊ុយក្រែនដោយវង្វេង៕
ចែករំលែកព័តមាននេះ