សេតវិមានគូសបញ្ជាក់កាលពីថ្ងៃទី២៦ សីហាថា ជនជាតិអាមេរិកម្នាក់សង្ស័យជាជនជីហាដជ្រុលនិយមសមាជិកក្រុមរដ្ឋអ៊ិស្លាម បានស្លាប់ក្នុងការប្រយុទ្ធគ្នានៅស៊ីរី ។ក្នុងសេចក្តីប្រកាសខ្លីមួយ អ្នកនាំពាក្យរបស់ក្រុមប្រឹក្សាសន្តិសុខជាតិអាមេរិក NSC លោកស្រី CAITLIN HAYDEN និយាយថា យើងបានដឹងពីវត្តមាននៅស៊ីរីរបស់ជនជាតិអាមេរិកឈ្មោះ DOUGLAS MCAUTHUR MCCAIN ហើយយើងអាចបញ្ជាក់ថា ជននេះស្លាប់ហើយ ។
លោកស្រី HAYDEN មានប្រតិកម្មតបចំពោះព័ត៌មាននានាផ្សាយដោយទូរទស្សន៍ NBC និង CNN ដែលថា លោក MCCAIN បានស្លាប់កាលពីចុងសប្តាហ៍កន្លងមកនេះ ពេលមានការប៉ះទង្គិចគ្នាដោយអាវុធរវាងបណ្តាក្រុមឧទ្ទាមស៊ីរីដែលប្រកួតប្រជែងគ្នា ។ យោងតាម NBC ថា បុរសអាមេរិកនេះស្ថិតក្នុងក្រុមយុទ្ធជនជីហាដបរទេស៣នាក់ក្នុងជួរក្រុមរដ្ឋអ៊ិស្លាម ហើយពួកគេទាំង៣នាក់ត្រូវស្លាប់ក្នុងការប្រយុទ្ធនោះ ។
លោកស្រី HAYDEN ថ្លែងទៀតថា យើងបន្តប្រើប្រាស់រាល់មធ្យោបាយដែលយើងមានដើម្បីបញ្ចុះបញ្ចូលមនុស្សកុំឱ្យទៅកាន់បរទេសដើម្បីធ្វើជីហាដហិង្សា និងដើម្បីតាមដានពួកអ្នកដែលវិលត្រឡប់មកវិញ ។យោងតាមក្រសួងការបរទេសសអាមេរិកថា មានជនជីហាដបរទេសប្រមាណជា១២.០០០នាក់មកពីប្រទេស៥០ បានទៅកាន់ប្រទេសស៊ីរីតាំងពីចាប់ផ្តើមជម្លោះនៅទីនោះកាលពីជាង៣ឆ្នាំមុន ក្នុងនោះក៏មានជនជាតិអាមេរិកមួយចំនួនតូចដែរ ។
បណ្តាអ្នកទទួលខុសត្រូវអាមេរិកធ្លាប់បានអះអាងកាលពីសប្តាហ៍មុនថា មានជនជាតិអាមេរិកជាង១០០នាក់បានចេញទៅប្រយុទ្ធនៅស៊ីរី ឬបុ៉នប៉ងធ្វើបែបនេះ ៕
ចែករំលែកព័តមាននេះ