សម្បកកង់ជាគ្រឿងសុវត្ថិភាពពិសេសបំផុតតែមួយគត់របស់រថយន្តពោលគឺវាជាវត្ថុដែលតភ្ជាប់រថយន្តទៅនឹងដងផ្លូវ ហើយគុណសម្បត្តិនៃបច្ចេកវិទ្យាសង្គ្រោះរបស់វា គឺភាពធន់នឹងការជាន់ហ្វ្រាំង ក៏ដូចជាការគ្រប់គ្រងស្ថិរភាពនៃប្រព័ន្ធអេឡិចត្រូនិកដែលមិនអាចធ្វើទៅបានកាលបើសម្បកមិនមានក្រឡាខាំជាប់ល្អជាមួយនឹងផ្លូវថ្នល់ទេនោះ ។ ដូចនេះសូមលើកយកនូវវិធីសាស្ត្រមួយចំនួនដែលលោកអ្នកគួរ ឬពុំគួរអនុវត្តនៅក្នុងការទិញសម្បកកង់ថ្មីដូចតទៅ ៖
ក-កត្តាមិនគួរអនុវត្ត
– កុំចំណាយពេលតិចពេកក្នុងការពិនិត្យមើលសម្បកកង់រថយន្ត ព្រោះថាសម្បកដែលមានតម្លៃទាប រចនាម៉ូដគុណភាពកម្រិតអន់ អាចបណ្តាលឱ្យរយៈចម្ងាយនៃការជាន់ហ្វ្រាំងបញ្ឈប់រថយន្តឆ្ងាយជាងមុន និងការគ្រប់គ្រងម្ចាស់ការក្នុងស្ថានការណ៍បន្ទាន់មានប្រសិទ្ធភាពតិចជាងមុនផងដែរ ។
– កុំចំណាយពេលច្រើនពេក ។ ក្នុងករណីនេះឈ្មោះ យីហោដែលស្ថិតនៅលើសម្បកកង់គឺមានតម្លៃកាន់តែច្រើនសម្រាប់អ្នកហើយ ដើម្បីជាជម្រើសល្អនោះ គឺពិនិត្យមើលយីហោណាមួយ ដែលផ្តល់នូវការរចនាម៉ូដឡើងប្រកបដោយគុណភាពខ្ពស់ និងតម្លៃសមរម្យ និងធ្វើការសម្រេចចិត្តឱ្យបានត្រឹមត្រូវ។
– កុំធ្វើការសន្និដ្ឋានឱ្យតែផលិតផលមកពីរោងចក្រផលិតគ្រឿងបន្លាស់អរីជីណល គឺល្អបំផុត ។ សម្បកកង់ដែលផលិតដោយក្រុមហ៊ុននោះ គឺតម្រូវតែចំពោះរថយន្តដែលដំឡើងនៅរោងចក្រផ្ទាល់ ម្យ៉ាងទៀតការទិញសម្បកកង់ប្រភេទដូចគ្នានេះ យកមកផ្លាស់ប្តូរក៏ពុំមែនជាជម្រើសល្អបំផុតដែរ ។ ក្រៅពីនេះមានរោងចក្រផលិតជាច្រើនដែលគេរចនាឡើងផ្តល់នូវបច្ចេកវិទ្យាធន់នឹងការប្រើប្រាស់បានគ្រប់ស្ថានភាពផ្លូវ និងរដូវកាល ។ ដូច្នេះលោកអ្នកគួរសង្កេតមើលដោយយកចិត្តទុកដាក់បន្តិច ទើបជាការល្អ ។
ខ-កត្តាគួរអនុវត្ត
– ចូរជ្រើសយកទីតាំងចែកចាយលក់សម្បកកង់ឱ្យបានត្រឹមត្រូវ ៖ នៅពេលសម្បកកង់ដល់អាយុកាលផ្លាស់ប្តូរថ្មី មានម្ចាស់រថយន្តជាច្រើនតែងតែសុើបសួរជាង ឬអ្នកលក់ថាតើយីហោណាមួយដែលអាចទទួលយកបាន ។ កត្តានេះឈ្មួញចែកចាយភាគច្រើន គឺគាត់ធ្វើការណែនាំពីយីហោ និងប្រសិទ្ធភាពបើកបរលើលក្ខខណ្ឌផ្លូវ និងអាកាសធាតុ ក៏ដូចជាតម្លៃទីផ្សារផងដែរដល់អ្នក ។ ដូចនេះវាជាជម្រើសល្អសម្រាប់លោកអ្នកក្នុងការរើសយកទីតាំងណាមួយដែលផ្តល់អត្ថប្រយោជន៍ច្រើន ។
– ចូរជឿជាក់នូវអ្វីដែលជាការរំពឹងទុក ៖ សម្បកកង់ក៏ដូចជាចំណុចជាច្រើនដែលពាក់ព័ន្ធនឹងអាយុកាលរបស់វា គឺសុទ្ធសឹងតែជាអ្វីដែលអ្នកគួរលើកឡើង និងចោទសួរជាមួយនឹងអ្នកលក់ដើម្បីឱ្យប្រាកដនូវអ្វីដែលជាការរំពឹងទុករបស់អ្នក ។
– ចូរទិញសម្បកកង់ម្តង៤ ទាំងមុខទាំងក្រោយ ៖ ជាទូទៅសម្បកកង់ថ្មីមានប្រសិទ្ធភាពខាំជាប់នឹងផ្លូវប្រសើរជាងសម្បកចាស់ ឬប្រើអស់ប៉ុន្មានគីឡូម៉ែត្រហើយនោះ ។ វាគឺជាអ្វីដែលល្អបំផុតក្នុងការផ្លាស់ប្តូរសម្បកកង់ទាំង៤ ក្នុងពេលតែមួយ ប៉ុន្តែប្រសិនបើលោកអ្នកចាំបាច់ត្រូវតែប្តូរវាជាគូៗនោះ ត្រូវដាក់កង់ថ្មីនៅផ្នែកខាងក្រោយ ។ ធ្វើបែបនេះនឹងជួយដល់រថយន្តផ្តល់នូវលំនឹងបានល្អ និងអាចប៉ាន់ប្រមាណទុកបាននៅក្នុងដំណើរការកាច់ចង្កូតបត់ភ្លាមៗ ។ ចូរចងចាំថា មិនត្រូវប្តូរសម្បកកង់តែមួយឡើយ ប្រសិនបើសម្បកនោះខូច ឬមិនអាចជួសជុលបាន ៕
ចែករំលែកព័តមាននេះ