រាជធានីភ្នំពេញ ៖ បុរសម្នាក់ត្រូវគេស្គាល់ឈ្មោះ សំ ជីវន្គ័ ជាតារាសម្តែង និងអ្នកលេងភ្លេង បានបើករថយន្តមួយគ្រឿងមកឈប់នៅចិញ្ចើមផ្លូវដេកក្នុងរថយន្ត ហើយត្រូវជនមិនស្គាល់មុខឆ្លៀតឱកាសបន្លំលួចយករបស់មានតំលៃក្នុងរថយន្តទៅបាត់អស់គ្មានសល់ ។ ហេតុការណ៍នេះបង្កឱ្យមានការភ្ញាក់ផ្អើលកាលវេលាម៉ោង២ និង៤០នាទីអធ្រាត្រ ឈានចូលថ្ងៃទី២៧ សីហា នៅចំណុចផ្លូវបេតុងភ្នំពេញថ្មី(១៩៨៦) ក្នុងសង្កាត់ភ្នំពេញថ្មី ខណ្ឌសែនសុខ ។
ប្រភពព័ត៌មានបានឲ្យដឹងថា មុនពេលកើតហេតុគេបានឃើញបុរសម្នាក់បើករថយន្តមួយគ្រឿងម៉ាកហុងដា ហ្វិត ពណ៌ស ពាក់ស្លាក់លេខ បណ្តោះអាសន្ន ៥៥៣២ ក្នុងទិសដៅពីលិចទៅកើត ខណៈមកដល់ចំណុចខាងលើស្រាប់តែឈប់រថយន្តដេកលង់លក់នៅក្នុងរថយន្តរបស់គេប្រមាណកន្លះម៉ោង ខណៈពេលបុរសនោះកំពុងដេកលង់លក់មានជនសង្ស័យពីរនាក់ជិះម៉ូតូមួយគ្រឿងមិនស្គាល់ម៉ាក បានឈប់ម៉ូតូក្បែររថយន្តធ្វើដូចជាមនុស្សស្គាល់គ្នាចឹង រួចជនសង្ស័យទាំងពីរនេះបានបើកទ្វាររថយន្តឆែករករបស់មានតំលៃនៅក្នុងរថយន្តអស់ ហើយក៏ឡើងជិះម៉ូតូគេចខ្លួនបាត់តែម្តង ។
ប្រភពដដែលបន្តទៀតថា ឃើញដូចនេះពួកគាត់ក៏បានរាយការណ៏ទៅសមត្ថកិច្ចមូលដ្ឋានឲ្យជួយមកអន្តរាគម៍នៅកន្លែងកើតហេតុ និងបានដាស់បុរសដែលដេកក្នុងរថយន្តនោះឲ្យភ្ងាក់ឡើង ទើបនិយាយប្រាប់សមត្ថកិច្ចថា គេបានបាត់ទូរសព្ទ័ និងអាយផេត រួមទាំងកាបូបលុយអស់ហើយ មិនដឹងធ្វើយ៉ាងម៉េចទេ ។ សមត្ថកិច្ចក៏ដឹងដែរថា បុរសនេះឈ្មោះ សំ ជីវន្គ័ អាយុ៣២ឆ្នាំ ជាតារាសំដែង និងអ្នកលេងភ្លេង ស្នាក់នៅសង្កាត់ទួលសង្កែ ខណ្ឌឬស្សីកែវ ។ តារាសម្តែងរូបនេះត្រូវបានមិត្តភក្តិមកទទួលយកទៅផ្ទះវិញ ព្រោះគាត់មិនអាចបន្តដំណើរដោយខ្លួនឯងបានទេ៕
ចែករំលែកព័តមាននេះ