• វិនិយោគិនស្ទើរតែ៩នាក់ ក្នុងចំណោម១០នាក់ នៅហុងកុង និងជប៉ុនខ្វះការជឿជាក់លើសោធននិវត្តន៍ជាកាតព្វកិច្ច
• ការខ្វះការជឿជាក់នេះ នាំឲ្យមានការអំពាវនាវឲ្យមានការផ្លាស់ប្ដូរនៅក្នុងប្រព័ន្ធសោធននិវត្តន៍
• មានតែវិនិយោគិន១នាក់ ក្នុងចំណោម៥នាក់ប៉ុណ្ណោះ ដែលទិញគម្រោងចូលនិវត្តន៍មិនមែនកាតព្វកិច្ច
• អាស៊ី គឺជាបណ្ដុំនៃវិនិយោគិនដែលប្រកបអាជីវកម្មចាត់ចែងដោយខ្លួងឯងផ្ទាល់ ហើយមួយភាគធំគឺមិនបានទទួលការប្រឹក្សាយោបល់ប្រកបដោយវិជ្ជាជីវៈនោះទេ។
ហុងកុង ថ្ងៃទី២៦ ខែសីហា ឆ្នាំ២០១៤ ៖ វិនិយោគិនអាស៊ីមិនជឿជាក់ថា សោធននិវត្តន៍ជាកាតព្វកិច្ចរបស់ពួកគេនឹងអាចរ៉ាប់រងទាំងស្រុងលើចំណាយក្រោយពេលចូលនិវត្តន៍របស់ពួកគេនោះទេ ហើយចង់ឃើញមានការផ្លាស់ប្ដូរជាច្រើនទៅលើប្រព័ន្ធសោធននិវត្តន៍ នេះបើយោងតាមការសិក្សាស្រាវជ្រាវថ្មីរបស់ក្រុមហ៊ុនមេនូឡាយហ្វ៍។
បើទោះបីជាសោធននិវត្តន៍ត្រូវបានរំពឹងថា ជាប្រភពប្រាក់ចំណូលមួយក្នុងចំណោមប្រភពបីសំខាន់ៗក្ដី នៅពេលដែលចោទសួរអតិថិជនថាតើពួកគេមានការជឿជាក់ថា ប្រាក់សោធននិវត្តន៍ជាកាតព្វកិច្ចរបស់ពួកគេមានចំនួនគ្រប់គ្រាន់សម្រាប់បំពេញតម្រូវការប្រាក់កាសនៅពេលចូលនិវត្តន៍ដែរឬយ៉ាងណា មានតែ៣៨%ប៉ុណ្ណោះ ដែលអាចផ្ដល់ចម្លើយច្បាស់ថា «បាទ/ចាស៎ គ្រប់គ្រាន់»។ មូលហេតុចម្បងនៃកង្វះការជឿជាក់នេះ គឺទាក់ទងនឹងក្ដីបារម្ភថា ប្រាក់សន្សំពីគម្រោង គឺមិនគ្រប់គ្រាន់សម្រាប់រ៉ាប់រងចំណាយនៅចូលនិវត្តន៍របស់ពួកគេ (៤៣%) ឡើយ។ វិនិយោគិនក៏បារម្ភផងដែរថា ផលចំណេញវិនិយោគនឹងមានកម្រិតទាបជ្រុល ហើយពួកគេមិនអាចព្យាករណ៍ទុកមុនពីអ្វីដែលពួកគេនឹងទទួលបានពីគម្រោងនានា របស់ពួកគេនៅពេលដែលចូលនិវត្តន៍នោះទេ។
អ្វីដែលគួរឲ្យកត់សម្គាល់នោះ គឺនៅតំបន់ដែលគម្រោងចូលនិវត្តន៍ជាកាតព្វកិច្ចត្រូវអនុវត្តក្នុងកម្រិតខ្ពស់បំផុត ការជឿជាក់បែជាមានកម្រិតទាបបំផុតទៅវិញ។ នៅហុងកុង និងតៃវ៉ាន់ វិនិយោគិនរំពឹងថា សោធននិវត្តន៍របស់រដ្ឋ និងរបស់និយោជកអាចរ៉ាប់រងបានចំនួន១៨% នៃប្រាក់ចំណូលចូលនិវត្តន៍របស់ពួកគេ ខណៈនៅចិនដីគោក និងជប៉ុន គឺមានកម្រិតកាន់តែខ្ពស់ជាងនេះទៅទៀតដល់ទៅ៣០% និង៣១% រៀងគ្នា។ ប៉ុន្តែនៅពេលដែលមានការពឹងផ្អែកលើវាដូច្នេះ បញ្ហាក៏លេចចេញឡើងផងដែរ។ វិនិយោគិនសឹងតែ៩នាក់ ក្នុងចំណោម១០នាក់ នៅហុងកុង និងជប៉ុនលើកឡើងពីកង្វះការជឿជាក់របស់ពួកគេលើសោធននិវត្តន៍ជាកាតព្វកចិ្ច។ នៅតៃវ៉ាន់ ៧នាក់ ក្នុងចំណោម១០នាក់ ខ្វះការជឿជាក់ ហើយសូម្បីតែនៅចិនដីគោកដែលមានប្រវត្តិទទួលការគាំទ្រខ្លាំងពីរដ្ឋសម្រាប់អ្នកដែលចូលនិវត្តន៍ក៏ដោយ វិនិយោគិនស្ទើរតែ៣នាក់ ក្នុងចំណោម៥នាក់ខ្វះការជឿជាក់ផងដែរ។
វិនិយោគិនអំពាវនាវឲ្យមានការផ្លាស់ប្ដូរប្រព័ន្ធសោធននិវត្តន៍
នៅទូទាំងតំបន់អាស៊ីមានការអំពាវនាវពីសំណាក់វិនិយោគឲ្យមានការកែលំអរប្រព័ន្ធសោធន៍និត្តន៍ជាកាតព្វកិច្ច។ សំណូមពរចម្បងដែលទទួលបានពីអ្នកចូលរួមធ្វើការស្ទង់មតិ គឺស្នើសុំឲ្យមានការអប់រំពន្យល់បន្ថែមពីការធ្វើផែនការចូលនិវត្តន៍ (៦៥%)។ ការផ្លាស់ប្ដូរផ្សេងទៀត ដែលត្រូវបានស្នើឡើង គឺការបង្កភាពងាយស្រួលបន្ថែមទៀត ក្នុងការដកប្រាក់មុនពេលចូលនិវត្តន៍ និងការផ្ដល់ជម្រើសវិនិយោគកាន់តែច្រើន។ វិនិយោគិនក៏បានបង្ហាញពីការគាំទ្រយ៉ាងមុតមាំចំពោះការបង្កើនកម្រិតនៃវិភាគទាន ប៉ុន្តែពួកគេលើកឡើងថា ពួកគេយល់ថាបន្ទុកនេះគួរតែជាបន្ទុករបស់រដ្ឋាភិបាល ឬ និយោជកក្នុងការធ្វើវិភាគទានក្នុងកម្រិតកាន់តែច្រើនលើផែនការសោធននិវត្តន៍ (៦០%) បើធៀបនឹងពួកគេដែលធ្វើវិភាគទាន (៣០%)។
«សោធននិវត្តន៍ជាកាតព្វកិច្ចជារឿយៗ សម្រាប់វិនិយោគិន គឺជាបទពិសោធន៍ដំបូងនៃការសន្សំប្រាក់ ដោយបង្ខំសម្រាប់អនាគត ដូច្នេះត្រូវមានដំណើរការសិក្សា ដើម្បីស្វែងយល់ពីលក្ខណៈ និងអត្ថប្រយោជន៍នៃផែនការជាកាតព្វកិច្ចរបស់ពួកគេ» នេះបើតាមប្រសាសន៍របស់លោក Robert A. Cook ប្រធាន និងអគ្គនាយកប្រតិបត្តិក្រុមហ៊ុន Manulife Asia ។ «ការដែលវិនិយោគិនទទួលស្គាល់ថា ពួកគេត្រូវការការអប់រំពន្យល់បន្ថែមអំពីការធ្វើផែនការចូលនិវត្តន៍ វាគឺជារឿងល្អ។ យើងលើកទឹកចិត្តឲ្យវិនិយោគិនទាំងអស់ឲ្យមានការទទួលខុសត្រូវផ្ទាល់ខ្លួនកាន់តែខ្ពស់ចំពោះការចូលនិវត្តន៍របស់ខ្លួនឯង និងរៀបចំផែនការសម្រាប់ប្រភពចំណូលផ្សេងៗដែលនឹងជួយគាំទ្រដល់ពួកគេ។ សោធននិវត្តន៍របស់រដ្ឋាភិបាល គឺជាការចាប់ផ្ដើមមួយដ៏ល្អ ប៉ុន្តែដូចដែលវិនិយោគិនបានដឹងហើយថា ប្រាក់នេះគឺមិនគ្រប់គ្រាន់នោះទេ»។
វិនិយោគិនអាស៊ីតិចតួចប៉ុណ្ណោះ ទិញគម្រោងសោធននិវត្តន៍មិនមែនកាតព្វកិច្ច
កង្វះនៃសុទិដ្ឋិនិយមរបស់វិនិយោគិន គឺស្ដែងឲ្យឃើញកាន់តែច្បាស់សម្រាប់សោធននិវត្តន៍ឯកជន ពោលគឺវិនិយោគិនអាស៊ីតែ១/៥ប៉ុណ្ណោះលើកឡើងថាពួកគេបានទិញគម្រោងសោធននិវត្តន៍ ឬផែនការចូលនិវត្តន៍មិនមែនកាតព្វកិច្ច។
ចំណែកឯវិនិយោគិនអាស៊ីវិញរំពឹងថា នឹងពឹងផ្អែកលើប្រភពចំណូលផ្សេងៗនៅអំឡុងពេលចូលនិវត្តន៍ ដូចជាប្រាក់សន្សំ (២៦%) និងផលចំណេញពីការវិនិយោគផ្សេងៗ ដូចជាអចលនទ្រព្យ (១៦%)។ ប៉ុន្តែការស្ទង់មតិនេះ ក៏បានបង្ហាញផងដែរថា វិនិយោគិនអាស៊ីមិនចាត់ចែងកញ្ចប់វិនិយោគរបស់ពួកគេតាមរបៀបដែលនឹងផ្ដល់ផលចំណេញដែលពួកគេត្រូវការមកវិញនោះទេ។ វិនិយោគិនតែ១/៤ប៉ុណ្ណោះលើកឡើងថា ពួកគេពិនិត្យកញ្ចប់វិនិយោគរបស់ពួកគេម្ដងក្នុងមួយត្រីមាស ហើយការផ្លាស់ប្ដូរចំពោះការចាត់ចែងកញ្ចប់វិនិយោគគឺជារឿងមួយកម្រ។
«ការប្រើប្រាស់ផែនការសោធននិវត្តន៍មិនមែនកាតព្វកិច្ចដែលនៅមានកម្រិតទាប និងការយល់ឃើញថាគម្រោងរបស់រដ្ឋាភិបាលមិនមានកម្រិតគ្រប់គ្រាន់ បាធ្វើឲ្យវិនិយោគិនស្វែងរកប្រភពប្រាកចំណូលចូលនិវត្តន៍ផ្សេងៗទៀត» នេះបើយោងតាមប្រសាសន៍របស់លោក Donna Cotter ប្រធានផ្នែកគ្រប់គ្រងទ្រព្យសកម្មនៃក្រុមហ៊ុន Manulife Financial ប្រចាំនៅតំបន់អាស៊ី។ «ប៉ុន្តែវិនិយោគិនត្រូវការការធានាថា ប្រភពប្រាក់ចំណូលជំនួសដែលពួកគេកំពុងពឹងផ្អែកលើ នឹងផ្ដល់ឲ្យវិញនូវផលចំណេញដែលពួកគេរំពឹងទុក និងធានាថា កម្រិតហានិភ័យពាក់ព័ន្ធមិនស្ថិតក្នុងកម្រិតខ្ពស់ពេកនោះទេ ក៏ដូចជាធានាឲ្យបានថា ពួកគេកំពុងចាត់ចែងកញ្ចប់វិនិយោគដែលមានលក្ខណៈចម្រុះមួយដែលនឹងបំពេញតាមតម្រូវការរបស់ពួកគេ»។
ការរៀបចំផែនការហិរញ្ញវត្ថុដោយខ្លួងឯងដែលពេញនិយម; ភាគរយវិនិយោគិនស្វែងរកការប្រឹក្សាយោបល់គឺស្មើនឹងពាក់កណ្ដាលនៃសហរដ្ឋអាមេរិក
វិនិយោគិនអាស៊ីសម្ដែងពីក្ដីបារម្ភពីខ្លួនគេផ្ទាល់នៅពេលដែលនិយាយទាក់ទងនឹងការរៀបចំផែនការចូលនិវត្តន៍ ដោយច្រើនជាងពាក់កណ្ដាល (៥០%) ប្រាប់ត្រង់ថា ពួកគេមិនយល់ពីផែនការសោធននិវត្តន៍របស់រដ្ឋាភិបាលនោះទេ ហើយមានតែ២៥%ប៉ុណ្ណោះ ដែលស្វះស្វែងរកការប្រឹក្សាយោបល់ពីអ្នកប្រឹក្សាហិរញ្ញវត្ថុដែលមានវិជ្ជាជីវៈត្រឹមត្រូវ ដែលនៅមានកម្រិតត្រឹមតែពាក់កណ្ដាលនៅសហរដ្ឋអាមេរិកប៉ុណ្ណោះ។ វិនិយោគិនភាគច្រើន (៦០%) និយមគ្រប់គ្រងចាត់ចែងការវិនិយោគរបស់ពួកគេដោយខ្លួនឯង ហើយមិនបានទទួលការប្រឹក្សាយោបល់ពីអ្នកមានវិជ្ជាជីវៈក្នុងវិស័យនេះ ដូចជាអ្នកប្រឹក្សាហិរញ្ញវត្ថុ ភ្នាក់ងារធានារ៉ាប់រង ឬ បុគ្គលិកធនាគារឡើយ។
តាមលទ្ធផលបង្ហាញឲ្យឃើញថា ជប៉ុនមានភាគរយខ្ពស់ជាងគេបំផុតនៃអ្នកវិនិយោគិនដែលចាត់ចែងអាជីវកម្មដោយខ្លួនឯងផ្ទាល់ (៧៦%) ខណៈឥណ្ឌូនេស៊ី ម៉ាឡេស៊ី និងតៃវ៉ាន់សុទ្ធតែមានកម្រិតលើ៥០%។ ផ្ទុយទៅវិញ វិនិយោគិនស្ទើរតែ៣នាក់ ក្នុងចំណោម៥នាក់ នៅក្នុងតំបន់ពឹងផ្អែកលើក្រុមគ្រួសារ មិត្តភក្ដិ និងសហការីសម្រាប់ការប្រឹក្សាយោបល់លើការរៀបចំផែនការហិរញ្ញវត្ថុ ហើយតិចជាង៥០% ប្រើប្រាស់ប្រព័ន្ធសារព័ត៌មាន។
លោក Donna Cotter ប្រធានផ្នែកគ្រប់គ្រងទ្រព្យសកម្មនៃក្រុមហ៊ុន Manulife Financial ប្រចាំនៅតំបន់អាស៊ី បានបន្ថែមទៀតថា «ទាក់ទងនឹងការធ្វើអាជីវកម្មដោយខ្លួនឯង ការធ្វើផែនការហិរញ្ញវត្ថុអាជីវកម្មបែបនេះ នឹងដំណើរការល្អនៅពេលដែលអ្នកមានចំណេះដឹង/ព័ត៌មានត្រឹមត្រូវ វិធីសាស្ត្រ និងពេលវេលាសម្រាប់អនុវត្ត បើពុំនោះទេ លោកអ្នកនឹងទទួលបានលទ្ធផលមួយដែលមិនមែនជាអ្វីដែលអ្នកសង្ឃឹមចង់បាន ឬដែលមានកម្រិតទាប។ វិនិយោគិនមានកម្រិតយល់ដឹងផ្នែកហិរញ្ញវត្ថុខុសៗគ្នា និងតែងតែកំហិតជម្រើសវិនិយោគរបស់ពួកគេផ្សេងៗគ្នា។ ការធ្វើដូច្នេះបង្កើតឲ្យមានហានិភ័យខ្ពស់នៃការគណនាខុស ឬការមើលរំលងផលិតផលវិនិយោគណាមួយដែលសមស្របសម្រាប់ពួកគេបំផុត។ ការចំណាយពេលពិនិត្យឲ្យបានម៉ត់ចត់ជាមួយអ្នកមានវិជ្ជាជីវៈ គឺជាការចំណាយពេលបានល្អ និងត្រឹមត្រូវ។
សម្រាប់ព័ត៌មានបន្ថែម អំពីការស្ទង់មតិវិនិយោគិន Manulife Investor Sentiment Index សូមចូលទៅកាន់ www.manulife-asia.com ។
Link to VDO of MISI
http://www.manulife-asia.com/
ចែករំលែកព័តមាននេះ