រាជធានីភ្នំពេញ ៖ ធី តុងហ៊ី មកពីក្លិបសាលវ័ន្តកីឡា ជួប នេន វណ្ណា មកពីក្លិបកងពលធំអន្តរាគមន៍លេខ៣ព្រះវិហារ លើកនេះត្រូវការឈ្នះដើម្បីទទួលបាន៣ពិន្ទុបន្ថែមទៀត ។ ការជួបគ្នារវាង ធី តុងហ៊ី និង នេន វណ្ណា នៅក្នុងព្រឹត្តិការណ៍ប្រកួតប្រដាល់វគ្គជម្រុះវិលជុំឈានទៅដណ្តើមខ្សែក្រវាត់ស្រាបៀរភ្នំពេញនៅលើសង្វៀន CTN នាថ្ងៃព្រហស្បតិ៍ ទី២៨ សីហា ស្អែកនេះ បានធ្វើឱ្យមានការចាប់អារម្មណ៍យា៉ងខ្លាំងពីសំណាក់អ្នកទស្សនា ។
គូនេះឆ្លងកាត់ការប្រកួតបានចំនួន៣លើក ប៉ុន្តែលទ្ធផលមិនដូចគ្នាទេ ។ ធី តុងហ៊ី ប្រកួត៣លើកឈ្នះ២លើកចាញ់១លើក ចំណែក នេន វណ្ណា ឈ្នះទាំង៣លើក ទើបលើកនេះ ធី តុងហ៊ី ប្តេជ្ញាយកឈ្នះឱ្យទាល់តែបាន ។ ចំណែក នេន វណ្ណា មិនហ៊ានសន្យាទុកមុនពីរឿងចាញ់-ឈ្នះឡើយ ដោយគេឱ្យរង់ចាំមើលការប្រកួតជាក់ស្តែងវិញ ។ រវាង ធី តុងហ៊ី និងនេន វណ្ណា សុទ្ធតែជាអ្នកប្រដាល់ដែលមានបទពិសោធន៍ប្រកួតនៅលើសង្វៀនយូរក្រែលដូចគ្នា និងមានផ្លែកែងនិងជង្គង់ល្អដូចគ្នាទៀត ។ ប៉ុន្តែ ធី តុងហ៊ី ទន់ជ្រាយខាងកម្លាំងចលនាវាយចេញរាងយឺតយ៉ាវបន្តិច និងចូលចិត្តវាយជាប្រយោលច្រើនជាងចូលកៀក ។
ការប្រើស្នៀតជើងស្ទាត់ជំនាញជាងការប្រើស្នៀតកណ្តាប់ដៃ ។ ចំណែក នេន វណ្ណា វិញ មិនត្រឹមតែចលនាវាយចេញមានភាពរហ័សរហួនប៉ុណ្ណោះទេ បើនិយាយពីចិត្តវិញគឺសឿងខ្លាំងណាស់ ។ លោក ឡៅ វុទ្ធី ដែលជាគ្រូបង្វឹករបស់ នេន វណ្ណា បានឱ្យដឹងថា ការប្រកួតលើកនេះលោកមានការជឿជាក់លើកូនសិស្សលោក ប៉ុន្តែលោកគិតថា ធី តុងហ៊ី ក៏ជាជើងខ្លាំងម្នាក់ដែលមិនងាយយកឈ្នះបានដោយងាយនោះឡើយ ។ សម្រាប់ទស្សនៈអ្នកដែលធ្លាប់តាមដានការប្រកួតភាគច្រើនយល់ឃើញថា គូនេះមិនអាចមើលស្រាលលើខាងណាម្នាក់បានឡើយ ដោយសារល្បិចប្រយុទ្ធនៅលើសង្វៀនរបស់ពួកគេគឺល្អម្យា៉ងម្នាក់ ។
ចំណែក វីវ៉ា បាចា មកពីក្លិបមហិទ្ធិរិទ្ធតាដំបងដែក ជួប ម៉ាប់ ឆៃយ៉ា មកពីក្លិបខ្លារខិនមានឫទ្ធិ មិនសូវទទួលបានការចាប់អារម្មណ៍ពីសំណាក់ទស្សនិកជនប៉ុន្មានឡើយ ។ ៣ប្រកួតកន្លងមករបស់ពួកគេទទួលបានតែការបរាជ័យដូចគ្នា ដូច្នេះការប្រកួតលើកនេះទោះចាញ់ឬឈ្នះមិនសំខាន់នោះទេ ព្រោះពួកគេមិនអាចគេចផុតពីការជ្រុះចេញពីវគ្គនេះបានឡើយ ៕
ចែករំលែកព័តមាននេះ