ខេត្តបន្ទាយមានជ័យ ៖ ដោយពិនិត្យឃើញពីការលំបាករបស់គ្រួសារសពលោកតា ឡុន កើយ អាយុ៦៧ឆ្នាំ នៅភូមិតាឡី ឃុំគោករមៀត ស្រុកថ្មពួក ដែលស្លាប់ដោយសារជាន់មីន កាលពីព្រឹកថ្ងៃទី២៥ សីហា ២០១៤ លោកឧត្តមសេនីយ៍ អាត់ ខែម ស្នងការនគរបាលខេត្តបន្ទាយមានជ័យ បានឲ្យក្រុមការងារនាំយកអំណោយជាគ្រឿងឧបភោគ បរិភោគ និងថវិកា ដែលជាអំណោយរបស់លោកឧបនាយករដ្ឋមន្ត្រី កែ គឺមយ៉ាន ប្រធានអាជ្ញាធរជាតិប្រយុទ្ធគ្រឿងញៀន និងជាប្រធានក្រុមការងារថ្នាក់ជាតិ ចុះជួយខេត្តបន្ទាយមានជ័យ យកទៅឧបត្ថម្ភក្នុងកម្មវិធីបុណ្យសព លោកតា ឡុន កើយ នៅភូមិតាឡី ឃុំគោករមៀត ។
តាមការឲ្យដឹងពីលោកឈុំ ផាន់ មេភូមិតាឡី បានឲ្យដឹងតាមទូរស័ព្ទនៅព្រឹកថ្ងៃទី២៦ សីហានេះថា លោក ឡុន កើយ មានប្រពន្ធឈ្មោះផាន់ ភួយ អាយុ៦២ឆ្នាំ ពិការស្វិតជើងទាំង២ដើរទៅណាមកមិនរួច គាត់មានជីវភាភក្រីក្រ ថែមទាំងចិញ្ចឹមចៅចំនួន៣នាក់ដែលម្តាយស្លាប់នៅឯប្រទេសថៃ ចំណែកឪពុកគេមានប្រពន្ធទៀត។
គួររំលឹកថា លោកតា ឡុន កើយ បានស្លាប់ដោយសារជាន់មីនប្រភេទ K58 ផលិតនៅប្រទេសសូវៀត កាលពីវេលាម៉ោង២ និង២០នាទីរសៀល ថ្ងៃទី២៤ សីហា ២០១៤ ខណៈពេលលោកតាទៅជីកទំពាំងនៅចន្លោះបង្គោលសីមា ២៨ -២៩ នៅជិតអូរព្រំដែន កម្ពុជា-ថៃ ចម្ងាយ៣០ម៉ែត្រ ស្ថិតក្នុងភូមិសាស្ត្រភូមិប្រាសាទត្បែង ឃុំបន្ទាយឆ្មារ ស្រុកថ្មពួក៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ