ខេត្តកំពង់ធំ ៖ បច្ចុប្បន្ននេះបន្ទាប់ពីឈើក្រញូងធ្លាក់ហាងឆេងហើយកន្លងមកសមត្ថកិច្ចជំនាញខេត្តកំពង់ធំ ក្រោមការបញ្ជាផ្ទាល់ពីលោកអភិបាល និងជាប្រធានគណៈបញ្ជាការឯកភាពខេត្ត នោះចុះធ្វើការបង្ក្រាបបទល្មើសឈើប្រណីត បានគួរឲ្យកត់សម្គាល់ ក៏ប៉ន្តែមួយរយៈពេលនេះលទ្ធផល នៃកិច្ចប្រតិបតិ្តបទល្មើសហាក់បីដូចជាស្ងាត់ ហើយក៏មិនមែនបានសេចក្តីថាគ្មានបទល្មើសនោះទេគឺនៅតែមានដដែលហ្នឹង។ ឥឡូវនេះឈើក្រញូងចាប់ផ្តើមមានហាងឆេងឡើងវិញហើយ ទោះបីរាជរដ្ឋាភិបាលដាក់បទបញ្ជាឲ្យមន្ត្រីជំនាញរួមសហការគ្នា ជាមួយស្ថាប័នពាក់ព័ន្ធ ទប់ស្កាត់ការធ្វើចរាចរណ៍ជួញដូរឈើក្រញូង ការចែកចាយ និងការទទួលទិញស្តុកឈើប្រណីត ទុកដោយគ្មានច្បាប់អនុញ្ញាតិយ៉ាងតឹងរឹងយ៉ាងណាក៏ដោយ ក៏នៅតែមានមន្ត្រីជំនាញ និងសមត្ថកិច្ចមួយចំនួន ដោយសារតែប្រាក់អូសទាញ បានបើកដៃឲ្យពួករកស៊ីបទល្មើសឈើគ្រញូង និងឈើប្រណីតកំពុងតែសំរុកដឹកយ៉ាងគគ្រឹកគគ្រេង ទាំងថ្ងៃទាំងយប់ ទៅកាន់ព្រំប្រទល់ប្រទេសវៀតណាម។
ពាក់ព័ន្ធនិងការប្រព្រឹត្តអំពើខាងលើនេះប្រជាពលរដ្ឋនិយាយរិះគន់ទៅលើ លោកអនុសេនីយ៍ត្រី មី សារុំ ថាអាងខ្លួនជាមន្ត្រីយោធានៅក្នុងតំបន់សឹករងស្រុកសន្ទុក ខេត្តកំពង់ធំ តែបែយកតួនាទីរបស់ខ្លួនដើរធ្វើព្យុះធ្វើភ្លៀង រកស៊ីខ្លួនឯងក៏រក ដេញរថយន្តក៏ដេញ កាងរថយន្តដឹកឈើក៏កាង ។ សព្វថ្ងៃរថយន្តរបស់ខ្លួនម៉ាកឡិចស៊ីសកូនកាត់RX300 ពណ៌ខ្មៅ ពាក់ស្លាកលេខភ្នំពេញ 2N-8494 ចតរងចាំដេញតាមប្រម៉ាញ់យកលុយពីរថយន្តដឹកឈើណាដែលមិនបានបង់លុយឲ្យគេ ហើយថែមទាំងកាងរថយន្តឈើទៀតផង ជាក់ស្តែងកាលពីយប់២២ ខែសីហា ឆ្នាំ២០១៤ លោកអនុសេនីយ៍ត្រី មី សារុំ រូបនេះ បានធ្វើសកម្មភាពកាងរថយន្តដឹកឈើប្រណីត១គ្រឿងម៉ាកឡិចស៊ីស៤៧០ ពណ៌ខ្មៅគ្មានស្លាកលេខដឹកឈើប្រណីតចេញមកពីខេត្តព្រះវិហារ រថយន្តនោះត្រូវបានគេស្គាល់ថា គឺជាកម្មសិទ្ធរបស់ឈ្មោះ ចាន់ គឹមហីន ជាមន្ត្រីយោធានៅកងពលលេខ៣ប្រចាំខេត្តព្រះវិហារ ដែលត្រូវជាកូនប្រសាររបស់លោកវរៈសេនីយ៍ឯក ឈុត ពិរាជ មេបញ្ជាការរងកងរាជអាវុធហត្ថខេត្តកំពង់ធំ ដែលតែងតែធ្វើសកម្មភាពរកស៊ីដឹកឈើចេញពីខេត្តព្រះវិហារ ឆ្លងកាត់ខេត្តកំពង់ធំ ហើយតែងឲ្យឈ្មោះមី សារុំ កាងរថយន្តដឹកឈើរបស់ខ្លួន ចាប់ពីទឹកដីស្រុកកំពង់ស្វាយ ឆ្លងកាត់ក្រុងស្ទឹងសែន ស្រុកសន្ទុកនិងស្រុកបារាយណ៍ រហូតដល់ព្រំប្រទល់ខេត្តកំពង់ចាមទើបចប់ភារកិច្ចខ្លួន។
ពាក់ព័ន្ធនឹងករណីខាងលើនេះដែរលោក វរសេនីយ៍ត្រី យេត ហុន មេបញ្ជាការតំបន់សឹករងស្រុកសន្ទុកប្រាប់ថាក្នុងនាមលោកជាមេរូបលោកមិនបានដឹងនោះទេពីបញ្ហារឿងនេះលោកគ្រាន់តែដឹងថាពីមុនមក ឈ្មោះ មី សារុំ ធ្លាប់រកស៊ីឈើមែន រូបលោកក៏បានហៅមកណែនាំឲ្យឈប់ប្រព្រឹត្តរួចហើយដែរ ហើយក៏លោកព្រះរាជអាជ្ញាធ្លាប់ហៅ ឈ្មោះរបស់វាឲ្យជួយអន្តរាគមន៍តាមចាប់រថយន្តដឹកឈើផងដែរ ចំណែកលោក ឧត្តមសេនីយ៍ត្រី សោម ស៊ុន មេបញ្ជាការតំបន់សឹករងកំពង់ធំ មានប្រសាសន៍ប្រាប់តាមទូរស័ព្ទថារូបលោកជាប់ទៅប្រជុំនៅភូមិភាគ ទើបតែត្រឡប់មកវិញ ពុំបានដឹងនោះទេពីបញ្ហាខាងលើនេះ ហើយក៏គ្មានអ្នកណារាយការណ៍ជូនរូបលោកដែរ លោកនិងចាត់ការឲ្យគេហៅឈ្មោះ មី សារុំ មកសាកសួរជុំវិញរឿងខាងលើនេះ។
រីឯលោក វរសេនីយ៍ឯក ឈុត ពិរាជ មេបញ្ជាការរងកងរាជអាវុធហត្ថខេត្តកំពង់ធំ ដែលត្រូវជាឪពុកក្មេករបស់ឈ្មោះ ចាន់ គឹមហីន ជាមន្ត្រីយោធា និងជាម្ចាស់រថយន្តឡិចស៊ីស៤៧០ ពណ៌ខ្មៅគ្មានស្លាកលេខនោះពុំអាចសុំការបំភ្លឺបានទេ ព្រោះទូរស័ព្ទចូលហើយតែគ្មានអ្នកទទួល។
ចែករំលែកព័តមាននេះ