ស្ត្រីជាម្តាយគ្រប់រូបគួរស្វែងរកការពិភាក្សាជាមួយអ្នកឯកទេសដើម្បីស្វែងយល់ពីរបៀបនៃការបំបៅដោះកូនឱ្យបានត្រឹមត្រូវ កុំឱ្យមានក្តីវិបត្តិដោយការបំបៅកូនឈ្លក់ទឹកដោះ ព្រោះទារកមានដង្ហើមខ្លី បើកាលណាឈ្លក់ខ្លាំងអាចបណ្តាលឱ្យទារកស្លាប់បាន ។
ធម្មតាស្ត្រីដែលសម្រាលកូនហើយច្រើនតែមានការហេវហត់អស់កម្លាំងដោយសារខ្វះឈាម ឬដោយសារការវះកាត់មានការឈឺចាប់ ដូច្នេះហើយទើបស្ត្រីត្រូវដេកបំបៅកូន ។ ប៉ុន្តែបើសិនជាម្តាយមានសុខភាពល្អ គប្បីអង្គុយឱ្យកូនបៅវិញប្រសើរជាង ព្រោះលក្ខណៈបែបនេះទឹកដោះងាយស្រួលហូរចូលទៅបំពង់រំលាយអាហារ និងមិនងាយហូរចូលទៅបំពង់ខ្យល់ដែលបញ្ឈរនោះទេ ។
ទោះជាដេក ឬអង្គុយ បញ្ហាសំខាន់គឺពឹងផ្អែកទៅលើអនាម័យ និងបច្ចេកទេសក្នុងការបំបៅកូន ។ មុនពេលឱ្យកូនបៅ ត្រូវលាងសម្អាតដោះ និងក្បាលដោះឱ្យបានស្អាតហើយច្របាច់ទឹកដោះចោលបន្តិចជាមុនសិន ទើបឱ្យទារកបៅជាក្រោយ ខ្លាចក្រែងមានមេរោគនៅក្នុងរន្ធក្បាលសុដន់ ។ បើស្ត្រីជាម្តាយដេក ត្រូវផ្តេកផ្អៀង ម្រាមដៃទាំងពីរចាប់ចុងដោះដាក់បញ្ចូលក្នុងមាត់ទារក ហើយច្របាច់ដោះថ្នមៗដើម្បីឱ្យទឹកដោះហូរចូលទៅក្នុងមាត់ទារកបន្តិចសិន បន្ទាប់មកទារកអាចនឹងបឺតជញ្ជក់ដោយខ្លួនឯង ។
ស្ត្រីជាម្តាយត្រូវឱ្យទារកជញ្ជក់ក្បាលដោះចូលជ្រៅទៅក្នុងមាត់ ដើម្បីចៀសវាងការប្រេះនៅជុំវិញចុងដោះ ដោយប្រើម្រាមដៃសង្កត់ដោះមកក្រោមបន្តិច កុំឱ្យប៉ះច្រមុះទារកបណ្តាលឱ្យពិបាកដកដង្ហើម ។ បើអង្គុយឱ្យកូនបៅ ម្តាយគួរអង្គុយសណ្តូកជើង ហើយបីទារកផ្អឹបនឹងដើមទ្រូង ដោយដៃម្តាយត្រូវទ្រក្បាលទារកដើម្បីឱ្យក្បាលដោះចូលក្នុងមាត់់កូនឱ្យបានស៊ប់កុំឱ្យរបេះចេញ និងប្រើម្រាមដៃច្របាច់ចុងដោះស្រាលៗដើម្បីកុំឱ្យទារកជញ្ជក់ខ្លាំងពេក។ បើសិនជាទឹកដោះហូរចេញច្រើនពេក ត្រូវប្រើម្រាមដៃទប់ចុងដោះដោយច្របាច់ក្បាលសុដន់ ក្រែងទារកបៅមិនទាន់បណ្តាលឱ្យឈ្លក់ ។ ពេលបំបៅម្តងៗប្រើពេលតែត្រឹម១០ ទៅ១៥នាទីបានហើយ រួចបីទារកមួយសន្ទុះសិន ទើបដាក់ឱ្យដេក ។
ស្ត្រីជាម្តាយត្រូវចាំថា ទារកដែលបៅឆ្អែតត្រូវដាក់ឱ្យដេកផ្អៀង កុំឱ្យទារកដេកផ្ងារឱ្យសោះ ព្រោះទារកដែលឈ្លក់ទឹកដោះអាចមកពីការបៅឆ្អែត បើកាលណាដេកផ្ងារបង្កឱ្យទឹកដោះហូរចូលបំពង់ខ្យល់អាចបណ្តាលឱ្យឈ្លក់និងស្ទះដង្ហើម បើជួយព្យាបាលពុំទាន់ពេលវេលាទេ ទារកអាចបាត់បង់ជីវិតមានវិប្បដិសារីអស់មួយជីវិត ។ ដូច្នេះដើម្បីចៀសវាងកុំឱ្យទារកឈ្លក់ទឹកដោះ មាតាទាំងឡាយត្រូវតែយកចិត្តទុកដាក់ចំពោះសកម្មភាពកូនឱ្យបានគ្រប់ពេលវេលា ជាពិសេសពេលបំបៅ និងដាក់ឱ្យដេកជាបុព្វហេតុយ៉ាងសំខាន់ ៕
ចែករំលែកព័តមាននេះ