អ្នកជំងឺជំងឺទឹកនោមផ្អែមប្រឈមនឹងជំងឺផ្សេងៗជាច្រើនទៀតយាយីចំពោះរាងកាយ បើពុំមានការព្យាបាលឱ្យបានត្រឹមត្រូវតាមវេជ្ជសាស្ត្រទេ និងបរិមាណជាតិស្ករនៅក្នុងឈាមក៏កាន់តែឡើងខ្ពស់ ។ ការគ្រប់គ្រងបរិមាណជាតិស្ករក្នុងឈាមឲ្យស្ថិតក្នុងកម្រិតធម្មតានោះគឺជារឿងសំខាន់សម្រាប់អ្នកជំងឺទឹកនោមផ្អែម ។ ការគ្រប់គ្រងជាតិស្ករបានល្អ អាចជួយពន្យារការចម្លងមេរោគមកលើកែវភ្នែក ។
ជំងឺទឹកនោមផ្អែមអាចបណ្តាលឲ្យមានផលប៉ះពាល់ចំពោះកែវភ្នែក ហើយក្នុងករណីធ្ងន់ធ្ងរអ្នកជំងឺអាចឈានទៅពិការភ្នែក ។ ដូច្នេះអ្នកជំងឺទឹកនោមផ្អែមគួរតែទៅពិភាក្សាជាមួយគ្រូពេទ្យភ្នែកឲ្យបានត្រឹមត្រូវ ដើម្បីតាមដាននូវភាពខុសប្រក្រតីរបស់ភ្នែកដែលបណ្តាលមកពីជំងឹទឹកនោមផ្អែមយ៉ាងហោចណាស់ឱ្យបាន១ឆ្នាំម្តង ។
តាមការសិក្សាបានឲ្យដឹងថា អ្នកជំងឺដែលមានប្រវត្តិកើតជំងឺទឹកនោមផ្អែមជាង១០ឆ្នាំមកហើយនោះ ជំងឺនេះនឹងអាចរាលដាលប៉ះពាល់លើកែវភ្នែកដែលតាមការប៉ាន់ប្រមាណក្នុងចំណោមមនុស្ស១០០នាក់អាចប៉ះពាល់ភ្នែកដល់ទៅ៥០នាក់ ។ ដូច្នេះទោះបីជាអ្នកជំងឺទឹកនោមផ្អែមទទួលបានការព្យាបាលយ៉ាងល្អហើយក៏ដោយ ក៏គួរតែទៅពិនិត្យសន្ទះកញ្ចក់ភ្នែកជាប្រចាំផង ។
កាលមានជាតិស្ករខ្ពស់នៅក្នុងសរសៃឈាមជាហេតុបង្កឱ្យកកស្ទះសរសៃឈាមតូចៗធ្វើឲ្យកែវភ្នែកខ្វះឈាមចិញ្ចឹមភ្នាសសរសៃឈាម ។ ការស្ទះសរសៃឈាមនៅក្នុងកញ្ចក់ភ្នែកបានធ្វើឲ្យបែកសរសៃឈាមដែលនៅក្នុងដំណាក់កាលដំបូងគេសង្កេតឃើញត្រឹមតែលេចចេញនូវចំណុចតូចអ្នកជំងឺមិនបានដឹងពីការប្រែប្រួលក្រសែភ្នែកទេ ព្រោះឈាមដែលហូរចេញមក មិនទាន់បាំងមណ្ឌលនៃការមើលឃើញនៅឡើយ។ បន្ទាប់ពីទឹករងៃហូរចេញមកហើយបានទៅប្រមូលផ្តុំនៅត្រង់បរិវេណនៃមណ្ឌលកញ្ចក់ភ្នែក ធ្វើឲ្យការមើលឃើញត្រូវចុះខ្សោយយ៉ាងឆាប់រហ័ស ។
កាលដែលសរសៃឈាមតូចៗរបស់សន្ទះកញ្ចក់ភ្នែកកកស្ទះធ្វើឲ្យសរសៃប្រសាទភ្នែកខ្វះឈាមមកចិញ្ចឹមនោះ រាងកាយក៏បង្កើតសរសៃឈាមមកជំនួសត្រង់បរិវេណសន្ទះកញ្ចក់ភ្នែកដែលខ្វះឈាមនោះ ។ សរសៃឈាមថ្មីទាំងនេះមានលក្ខណៈជាបណ្ដុំគ្មានរបៀបឆាប់បែកធ្លាយហូរឈាមទៅកកក្នុងគ្រាប់ភ្នែកខ្លាំងណាស់ ។ ដោយសារតែមានផលប៉ះពាល់ទាំងនេះហើយ ទើបជំរុញឲ្យអ្នកជំងឺទឹកនោមផ្អែមគួរទៅជួបជាមួយគ្រូពេទ្យ ដើម្បីពិនិត្យនិងការពារភ្នែកកុំឲ្យឈានដល់ដំណាក់កាលធ្ងន់ធ្ងរ ៕
ចែករំលែកព័តមាននេះ