ខេត្តកំពត ៖ នារីម្នាក់ត្រូវជនមិនស្គាល់អត្តសញ្ញាណជិះម៉ូតូដេញតាមប៉ុនប៉ងចាប់រំលោភ តែមិនបានសម្រេចដោយសារនាងរើបម្រះរួចទូរស័ព្ទប្តឹងសមត្ថកិច្ចធ្វើឱ្យជនសង្ស័យភ័យស្លន់ស្លោដាក់មេប្រូចរត់ចោលម៉ូតូបាត់ស្រមោល។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៧យប់ ថ្ងៃទី២៣ សីហា ២០១៤ នៅភូមិរំពើន ឃុំស្តេចគង់ខាងលិច ។
ជនសង្ស័យមិនត្រូវបានស្គាល់អត្តសញ្ញាណទេ ចំណែកនារីរងគ្រោះអាយុ១៧ឆ្នាំ រស់នៅភូមិព្រៃតាព្រឹត ឃុំស្តេចគង់ខាងលិច ។
លោកអនុសេនីយ៍ទោង៉ែត វ៉ាត នាយនគរបាលប៉ុស្តិ៍ស្តេចគង់ខាងលិចបានឱ្យដឹងថា មុនពេលកើតហេតុនារីរងគ្រោះបានជិះម៉ូតូម៉ាកឌ្រីមC 125 ពណ៌ខ្មៅមួយគ្រឿងតាមបណ្តោយផ្លូវលំក្រាលក្រួសក្រហមមួយក្នុងទិសដៅពីត្បូងទៅជើង លុះជិះមកដល់ចំណុចស្ងាត់គ្មានផ្ទះប្រជាពលរដ្ឋនៅចំណុចភូមិរំពើនស្រាប់តែមានជនសង្ស័យម្នាក់ជិះម៉ូតូឌ្រីមC125 ស៊េរី២០១១ ពណ៌ខ្មៅតាមពីក្រោយនាង ហើយបើកម៉ូតូមកស្ទាក់ពីមុខធ្វើឱ្យនាងបន្តដំណើរទៅមុខលែងកើត ពេលនោះជនសង្ស័យក៏បានស្ទុះមកចាប់អូសដៃនាងចុះក្នុងសន្ទូង ហើយផ្តួលនាងបម្រុងចាប់រំលោភក៏ត្រូវនារីរងគ្រោះតដៃវិញ ហើយរើបម្រះរួចទូរស័ព្ទប្តឹងនគរបាលឱ្យជួយអន្តរាគមន៍ ពេលនោះជនសង្ស័យភ័យពេកបានរត់ដាក់មេប្រូចចោលម៉ូតូបាត់ស្រមោលតែម្តង។
លោកអនុសេនីយ៍ទោ បន្តថា នៅកន្លែងកើតហេតុ នគរបាលបានរកឃើញកន្សែងមួយ និងម៉ូតូដែលជនសង្ស័យជិះពាក់ស្លាកលេខឧត្តរមានជ័យ២A១៦១៧ និងស្បែកជើងផ្ទាត់មួយគូ។ ពេលនេះនគរបាលស្រុកបន្ទាយមាសកំពុងទាក់ទងទៅនគរបាលប៉ុស្តិ៍ផ្សេងៗទៀតឱ្យជួយអន្តរាគមន៍តាមចាប់ខ្លួនជនសង្ស័យ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ