ខេត្តប៉ៃលិន ៖ ក្រោមជំនួយឧបត្ថម្ភពីអគ្គនាយកដ្ឋាននៃក្រសួងមហាផ្ទៃ អគារពន្ធនាគារខេត្តប៉ៃលិន ដែលមានបណ្តោយ៨០ម៉ែត្រ គុណនឹងទទឹង៧០ម៉ែត្រ រហូតមកដល់ព្រឹកថ្ងៃទី២៣ ខែសីហា ២០១៤នេះ ត្រូវបានគេសាងសង់ រួចរាល់ប្រហែល៨០ភាគរយហើយ ក្នុងនោះមានបន្ទប់សម្រាប់អ្នកទោស បន្ទប់បណ្ណាល័យសម្រាប់ដាក់សំណុំឯកសារផ្សេងៗ និងបន្ទប់សម្រាប់អនុរក្សស្នាក់នៅជាដើម ដោយមានទីតាំងនៅភាគខាងត្បូងផ្លូវជាតិលេខ៥៧ ចំងាយប្រហែល៧គីឡូម៉ែត្រពីក្រុងប៉ៃលិន ស្ថិតនៅភូមិទឹកចេញ ឃុំស្ទឹងកាច់ ស្រុកសាលាក្រៅ ហើយការសាងសង់នេះមានរយៈពេលជាង៣ខែកន្លងមកហើយ ។
សូមបញ្ជាក់ថា ពន្ធនាគារដែលអាជ្ញាធរដាក់អ្នកទោសបណ្តោះអាសន្ននៅក្នុងរោងកុនចាស់ ស្ថិតក្នុងភូមិបឌិននៀវ សង្កាត់ប៉ៃលិន ក្រុងប៉ៃលិន ហើយរហូតមកដល់ឆ្នាំ២០១៤នេះ មានអ្នកទោសសរុបទាំងអស់ជាង១០០នាក់ ។
ប្រភពព័ត៌មានពីលោក សុខ សារូ អាយុ៤៩ឆ្នាំ ជាអនុប្រធានពន្ធនាគារខេត្ត បានរៀបរាប់ឱ្យដឹងថា អគារពន្ធនាគារទាំងមូលនេះ ទទួលការឧបត្ថម្ភពីអគ្គនាយកដ្ឋាន នៃក្រសួងមហាផ្ទៃ ការសាងសង់នេះខាងលោកជួលជាងមកពីខាងក្រៅខ្លះ និងប្រើឱ្យអ្នកទោសធ្វើការនៅទីនោះមួយចំនួនផងដែរ ដោយបញ្ហាការងារនេះ គឺចង់បង្ហាត់បង្រៀនឱ្យពួកគាត់ចេះធ្វើការងារបច្ចេកទេសក្នុងការសាងសង់មួយចំនួន លុះពេលចេញពីពន្ធនាគារទៅរស់នៅក្នុងក្រុមគ្រួសាររបស់ខ្លួន អាចមានជំនាញមួយផងដែរ ។លោកបានបន្តទៀតថា ចំពោះការងាររបស់ពួកគេគឺមិនមែនឱ្យធ្វើចាប់ពីថ្ងៃច័ន្ទ រហូតដល់ថ្ងៃអាទិត្យ នោះទេ គឺជួនកាលឱ្យធ្វើនៅថ្ងៃច័ន្ទរហូតដល់ថ្ងៃសុក្រ ហើយជួនកាលទៀត បើមានធ្លាក់ភ្លៀងគឺឱ្យពួកគេឈប់សម្រាកដែរ ហើយការហូបចុកគឺគ្រប់គ្រាន់មិនខ្វះទេ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ