ខេត្តប៉ៃលិន ៖ ព្រៃឈើគឺជាធនធានធម្មជាតិដែលអាចកើតឡើងវិញ ហើយផ្តល់ប្រភពលំនឹងអាកាសធាតុទាក់ទាញទឹកភ្លៀងដ៏សំខាន់បំផុត ដែលមិនអាចខ្វះបាន ដូច្នេះគួរតែអាជ្ញាធរគ្រប់លំដាប់ថ្នាក់យកចិត្តទុកដាក់ថែរក្សាព្រៃឈើឱ្យបានគង់វង់ជានិច្ច បើអស់ព្រៃឈើទៅហើយនៅតំបន់នោះនឹងមានគ្រោះរាំងស្ងួត និងគ្រោះទឹក
ខេត្តប៉ៃលិន ៖ ព្រៃឈើគឺជាធនធានធម្មជាតិដែលអាចកើតឡើងវិញ ហើយផ្តល់ប្រភពលំនឹងអាកាសធាតុទាក់ទាញទឹកភ្លៀងដ៏សំខាន់បំផុត ដែលមិនអាចខ្វះបាន ដូច្នេះគួរតែអាជ្ញាធរគ្រប់លំដាប់ថ្នាក់យកចិត្តទុកដាក់ថែរក្សាព្រៃឈើឱ្យបានគង់វង់ជានិច្ច បើអស់ព្រៃឈើទៅហើយនៅតំបន់នោះនឹងមានគ្រោះរាំងស្ងួត និងគ្រោះទឹកជំនន់កើតឡើងជាមិនខានឡើយ ។ ជាក់ស្តែងព្រៃឈើអភិរក្សមួយកន្លែងស្ថិតនៅតំបន់ភ្នំកេះ ក្នុងភូមិទំនប់ ឃុំស្ទឹងត្រង់ ស្រុកសាលាក្រៅ បច្ចុប្បន្ននេះ ត្រូវបានគេរុករានទន្ទ្រានកាប់ឆ្ការ តាមអំពើចិត្ត ខ្ទេចខ្ទីយកធ្វើជាកន្លែងដាំដំណាំពោត ដាំដំឡូងមី អស់ទៅហើយ តែគេមិនឃើញមានអាជ្ញាណាម្នាក់អើពើចាត់វិធានការថែរក្សានោះទេ បែរជាបណ្តែតបណ្តោយឱ្យនៅសល់តែដីថ្មភ្នំប៉ុណ្ណោះ ។
ប្រភពព័ត៌មានបានឱ្យដឹងថា កាលពីប៉ុន្មានឆ្នាំមុនព្រៃឈើនៅតំបន់ភ្នំកេះនេះ មើលទៅខៀវស្រងាត់ គួរឱ្យចង់គយគន់ ហើយក៏មានសត្វព្រៃដូចជាឈ្លូស ប្រើស ក្តាន់ ជ្រូកព្រៃនិងសត្វចតុបាទ ព្រមទាំងបក្សីផ្សេងៗ មួយចំនួនរស់នៅក្នុងនោះស្រែកយំយ៉ាងរំពងខ្ញៀវខ្ញាផងដែរ ។ ប្រភពបន្តទៀតថា ប៉ុន្តែរហូតមកដល់ពេលនេះ ព្រៃភ្នំដ៏ស្រស់ត្រកាលប្រែក្លាយទៅជាដំបូកត្រងោល ស្ទើរតែអត់ឃើញមានដើមឈើធំមួយដើមទាល់តែសោះ ។ តែបើគេងាកបែរទៅមើលទេសភាពភ្នំប្រទេសជិតខាងវិញ គឺមានពណ៌បៃតងខៀវស្រងាត់គួរឱ្យចង់គយគន់ ថែមទាំងមានភ្លៀងធ្លាក់ឥតដាច់ផងដែរ នេះសបញ្ជាក់ថា ការអត់ព្រៃឈើ និងមានព្រៃឈើគឺមានសភាពខុសប្លែកគ្នាឆ្ងាយណាស់ ។
ប្រជាពលរដ្ឋបានរិះគន់ថា អាជ្ញាធរស្រុកសាលាក្រៅ និងអាជ្ញាធរខេត្ត មិនគួរបណ្តែតបណ្តោយឱ្យប្រជាពលរដ្ឋមួយចំនួនប្រព្រឹត្តបែបនេះទេ ព្រោះថាព្រៃឈើគឺជាអាយុជីវិតរបស់យើង គួរតែយើងដាំបន្ថែមឱ្យបានច្រើន មិនគួរបណ្តោយឱ្យនាំគ្នាកាប់បំផ្លាញដោយគិតយកតែប្រយោជន៍ផ្ទាល់ខ្លួននោះទេ ។
លោក ស្រី មាស សំនាង អភិបាលរងស្រុកសាលាក្រៅបានឱ្យដឹងថាទាក់ទិន ទៅនឹងបញ្ហាប្រជាពលរដ្ឋមួយចំនួននាំគ្នាឡើងកាប់ព្រៃឈើនៅតំបន់ភ្នំកេះនេះ ខាងលោកស្រី បានហាមប្រាមជាញឹកញាប់ ព្រមទាំងប្រកាសផ្សព្វផ្សាយដល់ពួកគាត់ផងដែរ កុំឱ្យលូកដៃទៅប៉ះពាល់ព្រៃឈើតំបន់អភិរក្ស ។ លោកស្រីបន្តទៀតថា តែពួកគេហាក់ដូចជាមិនស្តាប់តាមទាល់តែសោះលុះដល់ពេលស្ងាត់ៗ នាំគ្នាឡើងទៅកាប់ព្រៃលើភ្នំនេះអស់រលីង ហើយនាំគ្នាដាំពោត និងដំឡូងជំនួសវិញ ។ លោកស្រី បញ្ជាក់ទៀតថានៅពេលនេះ អាជ្ញាធរស្រុកសាលា ក្រៅមានវិធានការឱ្យបងប្អូនប្រជាពលរដ្ឋ ដែលជ្រុលកាប់ត្រូវដាំដើមឈើធំៗ ហូបផ្លែឡើងវិញដូចជាស្វាយ ខ្នុរ ជាដើម ព្រោះដើមឈើទាំងនេះអាចទាក់ទាញអាកាសធាតុបានល្អមិនដូចជាដំណាំតូចៗនោះឡើយ រីឯព្រៃឈើដែលនៅសល់មិនអនុញ្ញាតិឱ្យបន្តកាប់ទៀតនោះឡើយបើ សិនជាឃើញពួកគាត់នៅតែប្រព្រិត្តបែបនេះតទៀត នឹងចាត់ការតាមផ្លូវច្បាប់។
ចែករំលែកព័តមាននេះ