ខេត្តកំពង់ចាម ៖ ដោយមានការភ្ញាក់រលឹកខ្ពស់ ប្រជាពលរដ្ឋនៅភូមិពោធិ និងភូមិស្វាយ ឃុំស្វាយពោធិស្រុកស្រីសន្ធរ បានយកប្រដាប់ឆក់ត្រីចំនួន៩គ្រឿង មកប្រគល់ជូនដល់នគរបាលប៉ុស្តិ៍រដ្ឋបាលឃុំស្វាយពោធិ ។ ពិធីនេះត្រូវបានធ្វើឡើង នៅវេលាម៉ោង៨ព្រឹក ថ្ងៃទី២៣ សីហា ២០១៤ ដោយសមត្ថកិច្ចអបអរសាទរ នឹងធ្វើឲ្យបទល្មើសនេសាទត្រីខុសច្បាប់ ត្រូវបានកាត់កន្ថយមួយកំរិតផងដែរ ។
លោកវរសេនីយ៍ត្រី ខេង ស្រេង អធិការនគរបាលស្រុកស្រីសន្ធរ ប្រាប់ឲ្យដឹងថា រូបលោកធ្លាប់បានចុះទៅដល់ឃុំស្វាយពោធិ ដោយបានធ្វើការផ្សពផ្សាយដល់ប្រជាពលរដ្ឋ ក្នុងមូលដ្ឋានដែលកំពុងប្រព្រិត្តិនូវបទល្មើសនេសាទឆក់ត្រីដោយខុសច្បាប់ សូមបញ្ឈប់ជាបន្ទាន់ ហើយយកឧបករណ៍ទាំងនោះមកប្រគល់ជូនដល់សមត្ថកិច្ច មិនមានយកទោសអ្វីឡើយ ។
លោកវរសេនីយ៍ត្រី ខេង ស្រេង អធិការនគរបាលស្រុកស្រីសន្ធរ បានប្រាប់បន្តថា ក្រោយមកនៅព្រឹកថ្ងៃទី២៣ សីហា ២០១៤ ប្រជាពលរដ្ឋដែលមានការភ្ញាក់រលឹកខ្ពស់ចំនួន៨នាក់ រស់នៅឃុំស្វាយពោធិបានយកដុំឆក់ត្រីចំនួន៩ គ្រឿង មកប្រគល់ជូនដល់កម្លាំងប៉ុស្ត៏រដ្ឋបាលឃុំស្វាយពោធិ ។ ជាមួយនោះរូបលោកសូមឲ្យអ្នកផ្សេងទៀត ដែលមានឧបករណ៍ឆក់នេះ សូមយកមកប្រគល់ជូនសមត្ថកិច្ចបន្តទៀតក្នុងស្មារតីភ្ញាក់រលឹក តែដឹងឮហើយនូវតែប្រព្រិត្តិទង្វើខុសច្បាប់នោះ ។ គឺមិនអត់អោនឲ្យទេនឹងត្រូវចាប់ខ្លួនបញ្ជូនទៅកាន់សាលាដំបូងខេត្ត ចាត់វិធានការតាមច្បាប់ ។
សូមបញ្ជាក់ថាលោកអនុសេនីយ៍ទោ ចាន់ សុផល នាយប៉ុស្តិ៍រដ្ឋបាលឃុំស្វាយពោធិ បានចុះទៅឃ្លាំមើលបទល្មើសនេសាទខុសច្បាប់ ត្រង់ចំណុចបឹងកញ្ចាប់ដែលមានព្រំប្រទល់ ជាមួយស្រុកខ្សាច់កណ្តាលខេត្តកណ្តាលនិងស្រុកស្រីសន្ធរ ខេត្តកំពង់ចាម ។ កាលពីព្រឹកថ្ងៃទី២០ មិថុនា កន្លងទៅត្រូវបានក្រុមឆក់ត្រីដែលមានគ្នាចំនួន៤នាក់ព្រួតវាយសម្លាប់ ដោយមានមិននរណាដឹងនោះទេ ហើយបានបង្កឲ្យមានការភ្ញាក់ផ្អើលរហូតដល់លោកឧត្តមសេនីយ៍ត្រី បែន រ័ត្ន ស្នងការនគរបាលខេត្តដឹកនាំកម្លាំងចុះរកដោយសហការជាមួយនឹងប្រជាពលរដ្ឋរាប់រយនាក់ តាមស្វែងរកសពនាយប៉ុស្តិ៍រូបនេះ តែរកមិនឃើញសោះ រហូតដល់ជាង២០ថ្ងៃ ទើបរកឃើញដោយនៅសល់តែគ្រោងឆ្អឹងប៉ុណ្ណោះ ។ បន្ទាប់មកជនសង្ស័យចំនួន៣នាក់ ដែលពាក់ព័ន្ធសម្លាប់នាយប៉ុស្តិ៍ស្វាយពោធិ ត្រូវបានចាប់ខ្លួនបញ្ជូនទៅកាន់សលាដំបូងខេត្ត លទ្ធផលនេះត្រូវបានអ្នកស្រុកស្រីសន្ធរ ស្វាគមន៍ចំពោះស្មារដៃលោកស្នងការនគរបាលខេត្ត ។ ចំពោះឃាតកដៃដល់វិញកំពុងតែត្រូវបានសមត្ថកិច្ចគ្រប់ច្រកល្ហក បានពង្រាយកម្លាំងបណ្តាក់ដូចខ្យងពីកន្លែងមួយទៅកន្លែងមួយ តាមប្រមាញ់មិនយូរនោះទេឈាមស្រែកស្បែកហៅ ឃាតកបាតដៃប្រឡាក់ឈាម នឹងយត្រូវចាប់ខ្លួនបានជាក់ជាមិនខានឡើយ ។
ចែករំលែកព័តមាននេះ