រាជធានីភ្នំពេញ ៖ ជនសង្ស័យម្នាក់ក្នុងចំណោម២នាក់ត្រូវបានប្រជាពលរដ្ឋសហការជាមួយកម្លាំងនគរបាលប៉ុស្តិ៍ទួលសង្កែ ដេញចាប់បានកាលពីវេលាម៉ោង៥ ល្ងាច ថ្ងៃទី២៣ សីហា ២០១៤ ចំណុចផ្លូវលេខ៩៣ កែងនិងផ្លូវលេខ៦៨ ស្ថិតក្នុងសង្កាត់ទួលសង្កែ ខណ្ឌឬស្សីកែវបន្ទាប់ពីជនសង្ស័យរូបនេះឆក់កាបូបស្ពាយ ពីស្រ្តីអាជីវករលក់ខោអាវម្នាក់កំពុងធ្វើដំណើរតាមផ្លូវត្រសក់ផ្អែម ។
ជនសង្ស័យឈ្មោះ ស៊ុង សឺង ភេទប្រុស អាយុ២០ឆ្នាំ មានទីលំនៅភូមិផ្សារតូច សង្កាត់ទួលសង្កែ ខណ្ឌឬស្សីកែវ ចំណែកស្រ្តីម្ចាស់កាបូបឈ្មោះ ចឹទ្ធ សុជាតា អាយុ២៧ឆ្នាំ ជាអាជីវករលក់ខោអាវនៅផ្សារបឹងកេងកង មានទីលំនៅផ្ទះលេខ116E3 ជាន់ទី១ ផ្លូវសុខ ហុក សង្កាត់អូរឬស្សី៤ ខណ្ឌ៧មករា ។
ប្រភពព័ត៌មានបានឱ្យដឹងថា នៅមុនពេលកើតហេតុស្រ្តីរងគ្រោះបានជិះម៉ូតូហុងដាឌ្រីមសេ១២៥ មួួយគ្រឿងដោយរួមដំណើរជាមួយបងស្រីជីដូនមួយចេញពីផ្សារបឹងកេងកង ក្នុងបំណងត្រឡប់ទៅផ្ទះដោយធ្វើដំណើរតាមផ្លូវត្រសក់ផ្អែម ខណៈមកដល់ស្តុប អេស៊ីអាយ ស្រ្តីរងគ្រោះបានឈប់ម៉ូតូចាំស្តុប ពេលនោះក៏មានជនសង្ស័យ២នាក់ជិះម៉ូតូវ៉វ៉ា ពណ៌ខ្មៅមួយគ្រឿងបានមកធ្វើសកម្មភាពឆក់ការបូបពីស្រ្តីរងគ្រោះបានសម្រេចរួចជិះគេចខ្លួន ហើយស្រ្តីរងគ្រោះបានស្រែកថា ចោរៗនិងបានជិះដេញតាម តែតាមមិនទាន់ ជនសង្ស័យក៏គេចខ្លួនបាត់ស្រមោលតែម្តង។ ជាការចៃដន្យខណៈជនសង្ស័យជិះម៉ូតូគេចមកដល់ចំណុចផ្លូវ៩៣ កែងនិងផ្លូវលេខ៦៨ នោះក៏មានការស្ទះចរាចរ ពេលនោះជនសង្ស័យដែលជាអ្នកបើកម៉ូតូបានទម្លាក់ឱ្យជនសង្ស័យជិះពីក្រោយចុះពីលើម៉ូតូសិន ទំនងខ្លាចម្ចាស់កាបូបដេញតាមមកទាន់ ។ ពេលនោះជនសង្ស័យជិះពីក្រោយស្ពាយការបូបដែលឆក់បាននោះចុះពីលើម៉ូតូ រត់ ពេលនោះប្រជាពលរដ្ឋឃើញស្ពាយការបូបមនុស្សស្រីនិងរត់ទៀតនោះក៏មានការសង្ស័យ ហើយប្រជាពលរដ្ឋសហការជាមួយសមត្ថកិច្ចដេញចាប់បានជនសង្ស័យបានម្នាក់ចំណែកម្នាក់ទៀតរតោះគេចខ្លួនបាត់ស្រមោល។
ក្រោយពេលកើតហេតុសមត្ថកិច្ចបានដកកាបូបពីជនសង្ស័យ ហើយបានឆែកឆរក្នុងកាបូបឃើញមានទូរស៍ព្ទម៉ាកIphone4S មួយគ្រឿងនិងលុយ២៥ដុល្លារ ។ ស្រ្តីម្ចាស់ទូរស័ព្ទបានទូរស័ព្ទចូលទូរស័ព្ទដែលចោរឆក់ទៅនោះទើបដឹងថា សមត្ថកិច្ចចាប់បានជនសង្ស័យ រួចក៏បានធ្វើដំណើរមកយករបរវិញ។
ចែករំលែកព័តមាននេះ