ខេត្តពោធិ៍សាត់ ៖ ជនសង្ស័យ០៤នាក់ ក្នុងចំណោម០៥នាក់ បានត្រូវសមត្ថកិច្ចឃាត់ខ្លួនដោយជាប់ពាក់ព័ន្ធនឹងករណីកាច់សោម៉ូតូអ្នកដទៃជិះទៅបាត់កាលពីយប់ថ្ងៃទី២១ សីហា នៅហាងខារ៉ាអូខេមួយស្ថិតក្នុងភូមិបឹងខ្នារ ឃុំបឹងខ្នារ ស្រុកបាកាន ខេត្តពោធិ៍សាត់។ នៅពេលឃាត់ខ្លួនបក្ខពួកទាំង០៤នាក់បានភ្លាមម៉ូតូនោះក៏ត្រូវបានគេប្រទះឃើញចោរយកទៅប្លុងចោលនៅជិតផ្សារពង្រ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំងឯណោះ។
លោកវរសេនីយ៍ទោ ម៉ូ លីដា ប្រធានការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តពោធិ៍សាត់ឲ្យដឹងថា ជនសង្ស័យទាំង០៤នាក់ដែលជាប់ពាក់ព័ន្ធនឹងករណីលួចម៉ូតូនេះមានឈ្មោះ១-រី ធារ៉ា ភេទប្រុស អាយុ២០ឆ្នាំ ២-ឈ្មោះប៉ោយ ឆ ភេទប្រុស អាយុ២៤ឆ្នាំ ទាំងពីរនាក់នេះមានទីលំនៅភូមិត្រាចក្រោលឃុំបឹងខ្នារ ៣-ឈ្មោះសុខា វ៉ាន់ដេត ភេទប្រុស អាយុ២៤ឆ្នាំ និង៤-ឈ្មោះវ៉ែន ធីភេទប្រុសអាយុ៣៧ឆ្នាំ ទាំងពីរនាក់នេះរស់នៅភូមិដើមរកាឃុំខ្នារទទឹងស្រុកបាកាន។ ចំណែកអ្នកកាច់សោម៉ូតូផ្ទាល់ឈ្មោះអៀក សីហា ភេទប្រុស អាយុ២៥ឆ្នាំ ដែលរស់នៅភូមិដើមរកាដែរនោះបានរត់គេចខ្លួនបាត់់។ម៉ូតូម៉ាកហុងដាសេ១២៥ ពណ៌ខ្មៅស៊េរី២០១៤ គ្មានស្លាកលេខជាកម្មសិទ្ធិរបស់ឈ្មោះសូ បណ្ដូល ភេទប្រុស អាយុ២៥ឆ្នាំ រស់នៅភូមិមេទឹក ឃុំមេទឹក ស្រុកបាកាន។
ទាក់ទិននឹងករណីនេះលោកម៉ូ លីដា បានបញ្ជាក់ប្រាប់ថា កាលពីយប់ថ្ងៃទី២០ សីហា ជនសង្ស័យទាំង០៤នាក់បានផឹកស៊ីជាមួយម្ចាស់ផ្ទះឈ្មោះអៀក សីហា រហូតដល់ម៉ោង២៣យប់ទើបឈប់។ ពេលបញ្ចប់នៅទីនោះពួកគេទាំង០៥នាក់ (រួមទាំងម្ចាស់ផ្ទះផង) បាននាំគ្នាទៅច្រៀងខារ៉ាអូខេយីហោម្លប់ដូងពីរនៅក្នុងឃុំបឹងខ្នារនោះដែរ។ ខណៈពេលដែលកំពុងច្រៀងនោះឈ្មោះអៀក សីហា បានចេញមកក្រៅលួចកាច់សោម៉ូតូភ្ញៀវដែលកំពុងច្រៀងខារ៉ាអូខេនៅបន្ទប់ជាប់គ្នានោះយកទៅបាត់។ លុះវេលាម៉ោង០១និង៤០នាទីឆ្លងចូលថ្ងៃទី២១ សីហា ម្ចាស់ម៉ូតូច្រៀងចប់ចេញមកមិនឃើញម៉ូតូរបស់ខ្លួនក៏សួរទៅម្ចាស់ហាងទើបគាត់ប្រាប់ថា ឃើញមនុស្សប្រុសម្នាក់ក្នុងចំណោម០៥នាក់ដែលច្រៀងនៅបន្ទប់ជាប់គ្នានោះជិះទៅបាត់ប្រហែលកន្លះម៉ោងហើយ។ ពេលនោះមានការឆោឡោក៏ទៅប្ដឹងនគរបាលប៉ុស្តិ៏ឲ្យជួយអន្តរាគមន៍ទើបនៅថ្ងៃទី២៣ សមត្ថកិច្ចបានស្រាវជ្រាវឃាត់ខ្លួនគូរកនទាំង០៤នាក់នេះតែម្ដង។
ជាមួយគ្នានេះយើងបានទំនាក់ទំនងជាមួយសមត្ថកិច្ចខេត្តជិតខាងឲ្យជួយសហការគ្នាក្នុងការស្វែងរកចោរនិងម៉ូតូទាំងនោះ ស្រាប់តែឃើញប្លុងម៉ូតូចោលនៅម្ដុំផ្សារពង្រ ស្រុករលាប្អៀរ ខេត្តកំពង់ឆ្នាំងក៏យកមកប្រគល់ឲ្យសមត្ថកិច្ចខេត្តពោធិ៍សាត់វិញ។ សមត្ថកិច្ចកំពុងតាមរកឈ្មោះអៀក សីហា ដែលរត់គេចខ្លួននោះដើម្បីចាប់ខ្លួនយកមកផ្ដន្ទាទោសតាមច្បាប់។ ចំណែកម៉ូតូបានប្រគល់ឲ្យទៅឈ្មោះសូ បណ្ដូល ដែលជាម្ចាស់ដើមវិញ៕
ចែករំលែកព័តមាននេះ