ខេត្តប៉ៃលិន ៖ អាជ្ញាធរខេត្ត និងស្រុកសាលាក្រៅ ដឹកនាំដោយលោក ចក់ ឬទ្ធី អនុប្រធានការិយាល័យ នៃសាលាខេត្តប៉ៃលិន កាលពីព្រឹកថ្ងៃទី២២ ខែសីហា ២០១៤ បានចុះវាស់វែងនិងស្រាវជ្រាវដោះស្រាយ ករណីវិវាទដីចំនួន១៦.៩៩ហិកតាក្នុងចំណោម៥៥ហិកតាជូនដល់ប្រជាពលរដ្ឋចំនួន៩គ្រួសារ ក្នុងចំណោម១៩គ្រួសារ នៅចំណុចភ្នំកេះ ក្នុងភូមិទំនប់ ឃុំស្ទឹងត្រង់ ស្រុកសាលាក្រៅ ។ ការចុះវាស់វែងដីនេះ ដោយមានការអញ្ជើញចូលរួមពីលោកស្រី មាស សំនាង អភិបាលរងស្រុកសាលាក្រៅ លោក សុង ម៉ៅ ភូមិបាលស្រុកសាលាក្រៅ លោក វ័រ រួម ទំទប់ទី១ឃុំស្ទឹងត្រង់ និងមានប្រជាពលរដ្ឋមួយចំនួនផងដែរ ។
សូមបញ្ជាក់ថា ដីចំនួន៥៥ហិកតា ក្នុងចំណោម៤០០ហិកតា ដែលអាជ្ញាធរចែកឱ្យព លរដ្ឋកាប់ឆ្កាជាកម្មសិទ្ធិផ្ទាល់ខ្លួននេះ កាលពីដើមដំបូងឡើយគឺជាដីសហគមន៍ លុះក្រោយមកត្រូវបានលោក កែវ សាម៉េត ប្រធានសហគមន៍យកដីនេះទៅលក់ឱ្យលោក យស សារ៉ាវុទ្ធ ធ្វើជាដីកម្មសិទ្ធផ្ទាល់ខ្លួន ហើយក៏កើតមានទំនាស់រវាងអ្នកមានលុយ និងប្រជាពលរដ្ឋនៅឆ្នាំ២០០៧ លុះក្រោយមកក៏ត្រូវគេប្តឹងឱ្យសមត្ថកិច្ចចាប់ប្រជាពលរដ្ឋចំនួន២នាក់ដាក់ពន្ធនាគារខេត្តប៉ៃលិន អស់រយៈពេលប្រហែល១ឆ្នាំ ទី១. ឈ្មោះ គឹម ជេមស៍ ភេទប្រុស អាយុ៣០ឆ្នាំជាង ទី២. ឈ្មោះ ម៉ី វុត្ថា ភេទប្រុស អាយុ៤០ឆ្នាំជាង រស់នៅភូមិភ្នំស្ពង់ ឃុំសាលាក្រៅ ស្រុកសាលាក្រៅ លុះក្រោយមកដោយកើតទុកមិនសុខចិត្ត ក្រុមគ្រួសារជនរងគ្រោះទាំងពីរគ្រួសារបានដាក់ពាក្យប្តឹងទៅតុលាការកំពូល ទើបមានការដោះលែងឱ្យមានសេរីភាពឡើងវិញ កាលពីពេលថ្មីៗនេះ ហើយក៏ត្រូវអាជ្ញាធរចុះវាស់វែងសារឡើងវិញ ។
ប្រភពព័ត៌មានពីលោក ចក់ ឬទ្ធី អនុប្រធានការិយាល័យនៃសាលាខេត្តប៉ៃលិន បានរៀបរាប់ឱ្យដឹងថា ការចុះវាស់វែងដីធ្លីត្រង់កន្លែងដីមានទំនាស់វិវាទនេះ គឺខាងលោកបានទទួលបញ្ជាពីអភិបាលរងនៃគណអភិបាលខេត្ត ឱ្យដឹកនាំក្រុមការងារចុះបំពេញភារកិច្ច និងស្រាវជ្រាវដោះស្រាយជូន ប្រជាពលរដ្ឋដែលកំពុងតែមានទំនាស់ជាមួយភាគីម្ខាងទៀត ដោយចុះវាស់ឱ្យដឹងទិន្នន័យរួច ខាងលោកនឹងកោះហៅភាគីទាំងសងខាងឱ្យចូលរួមអង្គុយតុមូលជាមួយគ្នាធ្វើការដោះស្រាយដោយសន្តិវិធីតែម្តង ។ លោកបានបន្តទៀតថា ចំណែក១០គ្រួសារទៀតខាងលោក ក៏នឹងបន្តធ្វើការចុះវាស់វែង ដោះស្រាយជូនពួកគាត់ជាបន្តបន្ទាប់ទៀតផងដែរ ដោយចំណាយពេលយ៉ាងយូរចំនួន១អាទិត្យខាងមុខ ។
ទាក់ទិនទៅនឹងបញ្ហានេះ បងប្អូនប្រជាពលរដ្ឋមានចិត្តសប្បាយរីករាយយ៉ាងខ្លាំង ដែលអាជ្ញាធរស្រុក ខេត្ត យកចិត្តទុកដាក់ដោះស្រាយជូនពួកគាត់ យ៉ាងយកចិត្តទុកដាក់និងដោយសន្តិវិធី ពោលគឺមិនអនុញ្ញាតិឱ្យអ្នកមានលុយ មានអំណាច បន្តជិះជាន់លើពល រដ្ឋទន់ខ្សោយតទៅទៀត គឺដោយសារតែពួកគេមានលុយច្រើនបានប្តឹងពួកគាត់ដាក់គុកច្រវ៉ាក់បែកបាក់កូនចៅស្ទើរតែលែងជួបមុខគ្នា តែយុត្តិធម៌នៅតែឈ្នះជានិច្ច ។
ចែករំលែកព័តមាននេះ