ខេត្តកណ្តាល ៖ លោកតាអាយុ៧៤ឆ្នាំម្នាក់បានគាំងបេះដូងស្លាប់មួយរំពេចខណៈទាស់ពាក្យសម្តីគ្នាជាមួយភាគីម្ខាងទៀតពេលធ្វើប្លង់ដីផ្ទះជាប់គ្នា ។ ហេតុការណ៍នេះកើតឡើងកាលពីវេលាម៉ោង១២ ថ្ងៃត្រង់ ទី២១ សីហា ២០១៤ ស្ថិតក្នុងភូមិព្រែកតាកែវ ឃុំសំរោង ស្រុកកៀនស្វាយ ខេត្តកណ្តាល ។
សមត្ថកិច្ចមូលដ្ឋានបានឱ្យដឹងថា ជនរងគ្រោះ ឈ្មោះ យិន សេង ភេទប្រុស អាយុ៧៤ឆ្នាំ ចំណែកភាគីម្ខាងទៀតឈ្មោះ ពឺង ទ្រី ភេទប្រុស អាយុ៦៤ឆ្នាំ ទាំងពីរនាក់មានព្រំដីជាប់គ្នានៅក្នុងភូមិ-ឃុំកើតហេតុខាងលើ។
បើតាមប្រភពពីអ្នកជិតខាងបានឱ្យដឹងថា នៅមុនពេលកើតហេតុភាគីម្ខាងដែលមានឈ្មោះ ពឺង ទ្រី បានហៅអាជ្ញាធរ មានលោកមេភូមិ អនុភូមិឱ្យមកជួយវាស់វែងព្រំដីចំណុចកើតហេតុដើម្បីធ្វើរបងព័ទ្ធដីឡូត៍របស់ខ្លួន។ខណៈពេលវាស់ឈ្មោះ ពឺង ទ្រីបានសុំឱ្យជនរងគ្រោះជួយបរិច្ចាកដីកន្លះទឹកដោយសំអាងថា ខ្លួនជាអ្នកចេញថ្លៃសាងសង់របងនេះ តែភាគីជនរងគ្រោះមិនព្រមក៏ក្លាយទៅជាទំនាស់ពាក្យសម្តីតឹងសសៃក រៀងៗខ្លួនទោះបីជាលោកមេភូមិ អនុភូមិជួយអន្តរាគមន៍ សម្របសម្រួល ក៏ភាគីទាំងពីមិនស្តាប់នៅតែប្រកែកគ្នាពីដីឡូត៍ម្ខាងទៅដីឡូត៍ម្ខាង រហូតធ្វើឱ្យជនរងគ្រោះដែលមានជំងឺនិងវ័យចាស់ជរាផងនោះបានដួលដាច់ខ្យល់ស្លាប់តែម្តង។
ទោះបីជាយ៉ាងណាសមត្ថកិច្ចមូលដ្ឋានបានរាយការណ៍ទៅនគរបាលស្រុកហើយ ហើយនគរបាលស្រុកក៏បានធ្វើសេចក្តីរាយការណ៍ទៅមន្រ្តីជំនាញខេត្តឱ្យចុះមកពិនិត្យ និងធ្វើកោសល្យវិច័យសពផងដែរ។ ក្រោយពិនិត្យសពរួចមន្ត្រីជំនាញបានឱ្យដឹងថាជនរងគ្រោះមានវ័យចំនាស់និងមានជំងឺបេះដូងធ្ងន់ធ្ងរនៅពេលមានកំហឹងគឺគាំងបេះដូងស្លាប់តែម្តង។ សពត្រូវបានសមត្ថកិច្ចប្រគល់ជូនក្រុមគ្រួសារសពរៀបចំធ្វើបុណ្យតាមប្រពៃណី។
ចែករំលែកព័តមាននេះ