ខេត្តសៀមរាប ៖ បុរសវ័យកណ្តាលម្នាក់ បានត្រូវកូនប្រុសបង្កើតជាមនុស្សគថ្លង់វាយទាត់ធាក់ និងច្របាច់ក បណ្តាលឲ្យស្លាប់ភ្លាមៗនៅក្នុងផ្ទះ ។
ហេតុការណ៍នេះ បានកើតឡើងនៅម៉ោង០៩ព្រឹកថ្ងៃទី២២ សីហា ២០១៤ នៅក្នុងភូមិគោករាំង ឃុំមុខប៉ែន ស្រុកពួក ។
បើតាមអ្នកឆ្លើយឆ្លងព័ត៌មានកោះសន្តិភាពបានស្រង់សម្តីសមត្ថកិច្ចឲ្យដឹងជំហានដំបូងមកថា ជនរងគ្រោះឈ្មោះ អ៊ូច អម អាយុ៤៩ឆ្នាំ ជាកសិកររស់នៅក្នុងភូមិ-ឃុំកើតហេតុខាងលើ មានកូន០៤នាក់ (ស្រី០២នាក់) ។
ចំណែកជនដៃដល់ជាកូនប្រុសឈ្មោះ ធិប រុន អាយុ២១ឆ្នាំ ។ សមត្ថកិច្ចមិនទាន់ដឹងពីមូលហេតុពិតបា្រកដនៅឡើយទេ ប៉ុន្តែបើតាមក្រុមគ្រួសារបានបា្រប់ឲ្យដឹងថា នៅយប់មិញ (ថ្ងៃទី២១សីហា) ឪពុកដែលជាជនរងគ្រោះបានវាយទូន្មានប្រៀនប្រដៅជនដៃដល់ លុះព្រឹកឡើងនៅវេលាកើតហេតុ ខណៈឪពុកកំពុងដេកលើអង្រឹង ស្រាប់តែជនដៃដល់ស្ទុះទៅច្របាច់ករួចទាត់ធាក់បន្ថែមទៀត បណ្តាលឲ្យស្លាប់ភ្លាមនៅក្នុងផ្ទះរបស់ខ្លួនតែម្តង ។
បច្ចុប្បន្ន ជនដៃដល់ បានត្រូវសមត្ថកិច្ចមូលដ្ឋានបញ្ជូនមកឃុំនៅការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តរង់ចំាចាត់ការតាមច្បាប់ ៕
ចែករំលែកព័តមាននេះ