ប្រធានាធិបតីអ៊ុយក្រែន កាលពីថ្ងៃទី២១ សីហា បានសន្យាថា នឹងនិយាយពីសន្តិភាពជាមួយសមភាគីរុស្ស៊ី លោកវ្ល៉ាឌីមៀរ ពូទីន ហើយបញ្ចុះបញ្ចូលលោកពូទីន ឱ្យដកពួកយុទ្ធជនឧទ្ទាមចេញពីភាគខាងកើតអ៊ុយក្រែន ។ក្នុងសេចក្តីប្រកាសមួយ ប្រធានាធិបតីអ៊ុយក្រែនលោកប៉េត្រូប៉ូរូ៉ឆេនកូ ថ្លែងថា គ្រប់គ្នានឿយណាយនឹងសង្គ្រាម ។ ខ្ញុំមានបំណងទៅចូលរួមកិច្ចប្រជុំកំពូលតំបន់នៅទីក្រុងមីនស្ក៍ នាថ្ងៃទី២៦ សីហា ដើម្បីនិយាយពីសន្តិភាពជាមួយប្រធានាធិបតីរុស្ស៊ី ។
ប្រធានាធិបតីទាំង២រូបនោះនឹងជួបគ្នានាឱកាសកិច្ចប្រជុំកំពូលតំបន់គ្រោងធ្វើនាថ្ងៃទី២៦ សីហា នៅបេឡារុស ដោយមានវត្តមានផងដែររបស់បណ្តាមេដឹកនាំសហភាពអឺរុ៉ប ។ នេះនឹងជាការជួបគ្នារវាងលោកប៉ូរូ៉ឆេនកូ និងលោកពូទីន ជាលើកទី២ ក្រោយពីជួបគ្នារយៈពេលខ្លីមួយកាលពីថ្ងៃទី៦ មិថុនា កន្លងមកនេះនៅទីក្រុងន័រម៉ង់ឌី ប្រទេសបារាំងមក ។
សេចក្តីប្រកាសនោះបន្តថា អ៊ុយក្រែននឹងអំពាវនាវដល់រុស្ស៊ីឱ្យដកពួកយុទ្ធជនឧទ្ទាមចេញពីភាគខាងកើតប្រទេស ។ អាជ្ញាធរអ៊ុយក្រែនអះអាងកាលពីថ្ងៃទី២ សីហាថា រឹបអូសយកបានរថពាសដែក២គ្រឿងរបស់កងពលធំឆ័ត្រយោងមួយរបស់រុស្ស៊ីនៅជិតទីតាំងរបស់ពួកបំបែកខ្លួននិយម គឺក្រុងលូហ្គានស្ក័ ។ ប្រសិនបើនោះជាព័ត៌មានពិតនឹងបង្ហាញច្បាស់ជាលើកដំបូងពីការចូលរួមរបស់កងទ័ពរៀបរយរុស្ស៊ី ក្នុងជម្លោះនៅភាគខាងកើតអ៊ុយក្រែន ។
អ្នកនាំពាក្យយោធាអ៊ុយក្រែន លោកអានឌ្រឺអុីលីសេនកូ អះអាងថា ក្នុងការប្រយុទ្ធគ្នាជិតក្រុងលូហ្គានស្ក៍ កងទាហានអ៊ុយក្រែនចាប់បានរថពាសដែក២គ្រឿងរបស់កងពលធំឆ័ត្រយោង PSKOV ។ ក្នុងរថពាសដែកមួយ គេរកឃើញឯកសារនានា ។ ក្រសួងការពារប្រទេសរុស្ស៊ីបានបដិសេធព័ត៌មានទាំងនោះ ។
កងទ័ពអ៊ុយក្រែនអះអាងម្យ៉ាងទៀតថា មានការប្រយុទ្ធគ្នាដ៏ធំនៅទីក្រុងលូហ្គានស្ក៍ ដែលឡោមព័ទ្ធជាប់ ។ កងកុំម៉ង់ដូអ៊ុយក្រែនស្ថិតនៅតាមវិថីនានានៃទីក្រុងនោះដើម្បីកម្ទេចបណ្តាកាំភ្លើងធំរបស់ពួកឧទ្ទាម ។ ចំណែកទីក្រុងដូណេតស្ក៍ ជាទីតាំងធំរបស់ពួកឧទ្ទាម ក៏រងការបាញ់កាំភ្លើងធំយ៉ាងខ្លាំងក្លាដែរ ៕
ចែករំលែកព័តមាននេះ