ខេត្តសៀមរាប ៖ ក្រុមអ្នកភូមិប្រមាណជាងមួយរយនាក់មកពីសហគមន៍មានវិវាទដីធ្លី ក្នុងឃុំរ៉ុនតាឯក និងឃុំត្បែងនៃស្រុកបន្ទាយស្រី កាលពីព្រឹកថ្ងៃទី២២ សីហា ២០១៤ បានលើកគ្នាមកឈរយ៉ាងពពាក់ពពូននៅមុខអគារសាលាដំបូងខេត្តសៀមរាបជាលើកទី០២ ក្រោមហេតុផលស្តាប់លទ្ធផលសវនាការ និងលើកទឹកចិត្តដល់តំណាងពួកគេចំនួន០៧រូប ដែលត្រូវបានតុលាការបើកការជំនុំជំរះក្តីទាក់ទិនទៅនឹងសំណុំរឿងប៉ះពាល់ដីកម្មសិទ្ធិស្របច្បាប់ជាសាធារណៈ ។
នេះជាករណីទី០២ហើយក្នុងឆ្នាំ២០១៤ នេះ សំរាប់ក្រុមប្រជាសហគមន៍មានជម្លោះដីធ្លីខាងលើដែលប្រមូលផ្តុំគ្នានៅពីមុខអគាររដ្ឋបាលតុលាការខេត្ត បន្ទាប់ពីសំណុំរឿងព្រហ្មទណ្ឌដដែលនេះត្រូវបានតុលាការខេត្តនេះ បើកសវនាការកាលពីព្រឹកថ្ងៃទី១៦ មិថុនា ២០១៤ កន្លងទៅ តែត្រូវបានលើកពេល ក្រោមហេតុផលពុំមានពេលវេលាគ្រប់គ្រាន់។
លោកងួន ណារ៉ា ប្រធានសាលាដំបូងខេត្ត និងជាចៅក្រមជំនុំជំរះក្នុងសំណុំរឿងព្រហ្មទណ្ឌខាងលើ នៅរសៀលថ្ងៃទី២២ នេះ មិនអាចសុំការពន្យល់បានទេ ដោយទូរសព្ទ័របស់លោកហៅចូល តែពុំមានអ្នកទទួល។ យ៉ាងណាក្តីអ្នកឃ្លាំមើលការរំលោភសិទ្ធិមនុស្សនៃអង្គការលីកាដូ ដែលបានតាមដានក្នុងបន្ទប់សវនាការបានថ្លែងថា នេះជាសវនាកាលើកទី០២ហើយសំរាប់ក្រុមអ្នកភូមិដែលជាប់ចោទព្រហ្មទណ្ឌទាំង០៧នាក់នោះ ក៏ប៉ុន្តែពេលសំណុំរឿងនេះត្រូវបានលោកចៅក្រមជំនំជុំរះសម្រេចចាត់របៀប(ពន្យារពេល) ដើម្បីទុកពេលឲ្យក្រុមអ្នកភូមិប្តឹងទៅគណៈកម្មាធិការដីធ្លីខេត្ត និងទុកពេល១៨ខែឲ្យពួកគេដាក់ឯកសាភាស្តុតាងពាក់ពន្ធ័ទៅនឹងការកាន់កាប់ដីធ្លីនោះទៅ តុលាការព្រហ្មទណ្ឌវិញ។
លោកថា នៅក្នុងព្រឹត្តការណ៏នោះពុំឃើញមានអំពើហឹង្សាណាមួយកើតឡើងទេ តែតាមការអង្កេតសន្ទុះនៃការយកចិត្តទុកដាក់ដោះស្រាយរបស់អាជ្ញាធរជូនប្រជាពលរដ្ឋ ក្នុងរឿងជម្លោះដីធ្លីហាក់ដូចជាហក់ឡើងខ្ពស់ជាងមុន ដែលទំនងដោយសារការដាក់បទបញ្ជាពីសម្តេចតេជោ ហ៊ុន សែន កាលពីពេលថ្មីកន្លងទៅ៕
ចែករំលែកព័តមាននេះ