ខេត្តមណ្ឌលគិរី ៖ វិនាសកម្មព្រៃឈើក្នុងដែនអភិរក្សជីវចម្រុះសីមា នៅស្រុកអូររាំងកំពុងឈានដល់ការព្រួយបារម្ភយ៉ាងធ្ងន់ធ្ងរបំផុត ខណៈការកាប់បំផ្លាញ និងការជួញដូរបទល្មើសព្រៃឈើនៅខេត្តមណ្ឌលគិរី បានកើតមានពេញបន្ទុក។ ជាមួយគ្នានេះជីវចម្រុះផ្សេងៗទៀតដែលរស់នៅក្នុងព្រៃដែនអភិរក្សក៏ទទួលរងនូវការវិនាសជាបណ្តើរៗ ព្រោះតែសកម្មភាពចូលលុកលុយពីសំណាក់អ្នករកស៊ីអារឈើ និងបរបាញ់សត្វព្រៃ។
ជាក់ស្តែងគំនរឈើប្រណីតប្រភេទធ្នង់ចំនួន៧គំនរធំៗត្រូវបានមន្ត្រីជំនាញរដ្ឋបាលព្រៃឈើ និងស្ថាប័នពាក់ព័ន្ធនានា បង្ក្រាបបានកាលពីថ្ងៃទី២១ សីហា ២០១៤ នៅពីរទីតាំង ដោយទីតាំងទីមួយនៅភូមិអណ្តូងក្រឡឹងមានមួយគំនរ ចំណែកទីតាំងទីពីរនៅភូមិពូហ្សាម មានចំនួន៦គំនរ ។ ភូមិទាំងពីរនេះស្ថិតនៅក្នុងឃុំសែនមនោរម្យ ស្រុកអូររាំង។
មន្ត្រីជំនាញរដ្ឋព្រៃឈើខណ្ឌមណ្ឌលគិរីបាននិយាយថា គេនៅមិនទាន់ដឹងពីចំនួនឈើពិតប្រាដកនៅឡើយទេ តែបើតាមការប៉ាន់ស្មានអាចមានចំនួនប្រហែលជិតពីររយកំណាត់។ មុខកាត់ឈើមួយកំណាត់អាចមានទំហំចាប់ពី៤០សង្ទីម៉ែត្រគុណ៤០សង្ទីម៉ែត្រ ប្រវែង៥ម៉ែត្រឡើងទៅ។
ប្រភពក្រៅផ្លូវការបាននិយាយថា ចំនួនឈើប្រណីតដែលមេព្រៃចាប់បង្ក្រាបនោះ ប្រសិនបើគេដឹកយកទៅលក់នៅទីផ្សារបរទេសអាចមានតម្លៃមិនក្រោមជាង៥ម៉ឺនដុល្លារទេ គឺក្នុងមួយម៉ែត្រគូបមានតម្លៃចន្លោះពី៣ពាន់ដុល្លារទៅ៤ពាន់ដុល្លារ។ ប៉ុន្តែតម្លៃដែលគេទិញនៅតាមភូមិពីអ្នកចូលកាប់នៅក្នុងព្រៃមួយម៉ែត្រគូបមិនលើសពី៥០០ដុល្លារឡើយ អ៊ីចឹងហើយតម្លៃចំណេញឃើញថា មានចំនួនមហិមា ទើបបានជាក្រុមថៅកែសំបូរលុយទាំងនោះហ៊ានដាក់ដើមទុនរកស៊ីយ៉ាងគគ្រឹងគគ្រេងរាល់ថ្ងៃ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ