រាជធានីភ្នំពេញ ៖ យុវជនម្នាក់ស្រវឹងធ្លាក់ភ្នែកបានបើករថយន្តតូយ៉ូតាព្រូសទៅបុកតូបលក់គុយទាវហើយជ្រុលទៅបុកម៉ូតូពីរគ្រឿងពីក្រោយបន្តបន្ទាប់គ្នាពេញហឹងបណ្តាលឱ្យម៉ូតូមួយគ្រឿងកៀបជាប់ពីក្រោមរថយន្តបើកអូសទៅមុខរបួសធ្ងន់២នាក់ ។ ហេតុការណ៍នេះកើតឡើងកាលពីវេលាម៉ោង១២ និង៣០នាទីរំលងអាធ្រាត្រឈាចូលថ្ងៃទី ២២ សីហា ២០១៤ តាមបណ្តោយផ្លូវកម្ពុជាក្រោមខាងលិចវិទ្យាល័យសន្ធម៉ុក ប្រហែល១០០ម៉ែត្រ ស្ថិតនៅក្នុងសង្កាត់ទឹកល្អក់មួយ ខណ្ឌទួលគោក។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តមួយគ្រឿងម៉ាកតូយ៉ូតាព្រូស ពណ៌ទឹកប្រាក់មួយគ្រឿងពាក់ស្លាកលេខភ្នំពេញ 2Q-0353 បើកដោយយុវជនស្រវឹងធ្លាក់ភ្នែកម្នាក់តាមផ្លូវកម្ពុជាក្រោមយ៉ាងលឿន ក្នុងទិសដៅពីកើតទៅលិចខណៈមកដល់ចំណុចកើតហេតុក៏បានរេចង្កូតទៅបុកតូបលក់គុយទាវ ហើយជ្រុលទៅបុកម៉ូតូសង់កូរ៉េ ពណ៌ក្រហម ពាក់ស្លាកលេខ1Q-8311 បើកដោយបុរសម្នាក់និងជ្រុលទៅបុកម៉ូតូស្តេប ពណ៌ខ្មៅ មួយគ្រឿងអត់មានស្លាកលេខ បើកដោយបុរសម្នាក់ពីក្រោយពេញទំហឹងបណ្តាយឱ្យម៉ូតូស្តេបមួយគ្រឿងកៀបជាប់ពីក្រោមរថយន្ត អួសទៅជាមួយរថយន្តបែកផ្កាភ្លើងពេញផ្លូវ របួសធ្ងន់ពីរនាក់ ។ អ្នកបើករថយន្តបានរីយ៉ែទម្លាក់ម៉ូតូស្តេបចេញពីរថយន្តហើយបានបើកគេចខ្លួនប៉ុន្តែត្រូវសមត្ថកិច្ចនិងប្រជាពលរដ្ឋស្ទាក់ចាប់បាននៅចំណុចផ្សារហេង លី ដោយសាររថយន្តបែកកង់។
ក្រោយពេលឃាត់រថយន្តបានហើយនោះប្រជាពលរដ្ឋបានស្វាគមន៍យុវជនបើករថយន្តបង្កខាងលើម្នាក់មួយដៃម្នាក់មួយជើងរបួសបែកមុខបែកមាត់ ហើយសមត្ថកិច្ចបានយករថយន្តនិងម៉ូតូទៅរក្សាទុកនៅអធិការដ្ឋានខណ្ឌទួលគោករងចាំដោះស្រាយតាមនិតិវិធីច្បាប់ ។
ចែករំលែកព័តមាននេះ