រាជធានីភ្នំពេញ ៖ កាលពីវេលាម៉ោង៧និង៣០នាទីយប់ថ្ងៃទី ២១ សីហា ២០១៤មានករណីឈ្លោះប្រកែកគ្នាមួយបានកើតឡើងនៅចំណុចមុខផ្ទះលេខ៨អាអឺសេរ៉ូ ជាប់និងផ្លូវលេខ៣៣៦ ស្ថិតក្នុងសង្កាត់ផ្សារដើមគរ ខណ្ឌទួលគោក ដោយគេឃើញគ្រួសារមួយបានមកឈ្លោះប្រកែកជាមួយបុរសម្នាក់ ជាអ្នកបើករថយន្តដឹកបន្លែឱ្យម៉ូយនៅផ្សារដើមគរ បង្កឱ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចុះមកពិនិត្យផងដែរ។
បើតាមប្រភពព័ត៌មានពីបុរសឈ្មោះ ហ៊ីង ស៊ីផា អាយុ៤៨ឆ្នាំ ដែលមានមុខរបរបើករថយន្តដឹកបន្លែឱ្យម៉ូយនៅផ្សារដើមគរបានឱ្យដឹងថា នៅមុនពេលកើតហេតុគឺរូបគាត់បានដឹកបន្លែយកមកដាក់ឱ្យម៉ូយនៅផ្សារដើមគរហើយក៏បានឈប់រថយន្តនៅចិញ្ចើមផ្លូវមុខផ្ទះមួយកន្លែងជាប់នឹងផ្ទះលេខ៨អាអឺសេរ៉ូ ដើម្បីដាក់បន្លែ ឱ្យម៉ូយខណៈនោះស្រាប់តែម្ចាស់ផ្ទះលេខ៨អាអឺសេរ៉ូ ប្រមាណ៣ទៅ៤នាក់បានចេញពីក្នុងផ្ទះមករងរឿងឈ្លោះជាមួយគាត់ ដោយម្ចាស់ផ្ទះខាងលើបានយកធុងស្នោនិងរទេះរុញបន្លែមកដាក់ពាំងមុខផ្ទះ និងហៀរមកដល់ចិញ្ចើមផ្លូវលេខ៣៣៦ ដែលធ្វើឱ្យរថយន្តរបស់គាត់ពិបាកចតនិងបើកដាក់បន្លែ ហើយក៏មានការឈ្លោះប្រកែកគ្នាកាន់តែខ្លាំងឡើង ដោយម្ចាស់ផ្ទះខាងលើបានជេររូបគាត់យ៉ាងខ្លាំងដែលបង្កឱ្យមានការភ្ញាក់ផ្អើលដល់ប្រជាពលរដ្ឋ ។ បន្ទាប់ពីបានឈ្លោះប្រកែកនិងជេរមកលើរូបគាត់ហើយនោះម្ចាស់ផ្ទះខាងលើក៏នាំគ្នាចូលទៅក្នុងផ្ទះអស់ទៅ ភ្លាមៗនោះស្រាប់តែមានមនុស្សស្រីប្រុសពីរនាក់ដែលជាសាច់ញាត្តិម្ចាស់ផ្ទះខាងលើបានមកជេរទៅលើរូបគាត់បន្ថែមទៀត ។
បុរសខាងលើបានបន្តថានេះមិនមែនជាលើកទី១ទេដែរក្រុមគ្រួសារខាងលើមករករឿងឈ្លោះប្រកែកជាមួយគាត់ កាលពីមុនគ្រួសារនេះបានយកពងមាន់ស្អុយមកជះនៅក្បែរកន្លែងគាត់ឈប់រថយន្តដាក់បន្លែឱ្យម៉ូយ ដើម្បីឈ្លោះប្រកែកជាមួយគាត់តែគាត់ចេះតែអត់ទ្រាំព្រោះមិនចង់មានរឿងវែងឆ្ងាយ ទើបតែមកដល់ថ្ងៃនេះក៏បានមានការឈ្លោះប្រកែកគ្នាតែម្តង។ ដោយឡែកប្រជាពលរដ្ឋដែលរស់នៅក្បែរនោះបាននិយាយថាបុរសខាងលើមិនបានឈប់រថយន្តមុខផ្ទះលេខ៨អាអឺសេរ៉ូនោះទេ គឺបានឈប់មុខផ្ទះមួយទៀតនៅជាប់គ្នា ហើយគាត់មិនខុសទេ គឺគ្រួសារនេះទេដែលជាអ្នកមកបង្ករឿងជាមួយបុរសខាងលើ។
បន្ទាប់ពីឈ្លោះគ្នាបង្កការភ្ញាក់ផ្អើលហើយនោះគេឃើញប្រធានផ្សារដើមគរ និងប៉ូលិសប៉ុស្តិ៍ផ្សារដើមគរបានចុះមកត្រួតពិនិត្យកន្លែងកើតហេតុ តែមិនបានមកជួយដោះស្រាយបញ្ហាទេបែជាបង្ខំឱ្យបុរសដែលត្រូវគ្រួសារផ្ទះលេខ៨អាអឺសេរ៉ូ រករឿងឈ្លោះនោះឱ្យបើករថយន្តចេញពីកន្លែងកើតហេតុជាប្រញាប់ទៅវិញ ដែលធ្វើឱ្យអ្នកឃើញហេតុការណ៍មានការហួសចិត្តគ្រប់គ្នា។
ចែករំលែកព័តមាននេះ