ខេត្តត្បូងឃ្មុុំ ៖ ក្រុមចោរលួចជ័រកៅស៊ូចំនួន២នាក់បានប្រើកាំបិតកាប់ប្រហារទៅលើឆ្មាំចាំចម្ការកៅស៊ូម្នាក់ ឈ្មោះ ស៊ាង សុខា ភេទប្រុស អាយុ៤៤ឆ្នាំ រស់នៅភៅភូមិសួងលិច សង្កាត់សួង ក្រុងសួងដោយត្រូវក្បាលជាច្រើនកន្លែងបណ្តាលឱ្យស្លាប់ក្នុងថ្លុកឈាមយ៉ាងអាណោចអាធ័ម។ ហេតុការណ៍អំពើឃាតកម្មនេះកើតឡើងកាលពីវេលាម៉ោង៧និង៤០ នាទីយប់ ថ្ងៃទី ២១ សីហា ២០១៤ នៅចំណុចឡូត៍កៅស៊ូ៧១៣ ស្ថិតក្នុងភូមិ៦.១០ ឃុំគរស្រុកត្បូងឃ្មុំ ខេត្តត្បូងឃ្មុំ ។
លោកអនុសេនីយ៍ឯក ឡុង សារិន អធិការរងនគរបាលស្រុកត្បូងឃ្មុំបានប្រាប់ឱ្យដឹងថា នៅមុនពេលកើតហេតុបុរសរងគ្រោះបានអង្គុយយាមចម្ការកៅស៊ូកន្លែងកើតហេតុជាមួយនិងឆ្មាំការពារម្នាក់ទៀត ឈ្មោះលី សុផា ភេទប្រុស អាយុ៣៤ឆ្នាំ ស្រាប់ តែមកដល់ម៉ោងកើតហេតុខាងលើក៏មានចោរលួចជ័រកៅស៊ូ២នាក់បានមកកាប់ប្រហារឆ្មាំដែលកំពុងអង្គុយយាមចម្ការកៅស៊ូនៅកន្លែងងងឹតបណ្តាលឱ្យស្លាប់ក្នុងថ្លុកឈាមហើយក្រុមចោរបានរត់គេចខ្លួនបាត់ស្រមោល។
បើតាមព័ត៌មានពីសមត្ថកិច្ចបានឱ្យដឹងថា ឆ្មាំដែលចោរកាប់ប្រហារស្លាប់ក្នុងថ្លុកឈាមនេះ គឺបានធ្វើការយាមចម្ការកៅស៊ូឱ្យក្រុមហ៊ុន សុភក្ត្រ័ និកា ដែលស្ថិតក្នុងមូលដ្ឋានឃុំជប់។ ក្រោយពេលកើតហេតុកម្លាំងជំនាញព្រហ្មទណ្ឌស្រុកបានចុះទៅពិនិត្យកន្លែងកើតហេតុតែរកពុំឃើញមានវត្ថុតាងទេ គឺក្រុមចោរម្រមូលទៅអស់។ដោយឡែកបើតាមឆ្មាំដែលអង្គុយយាមជាមួយជនរងគ្រោះដែលស្លាប់បានឱ្យដឹងថា គេបានឃើញចោរពីរនាក់បានមកកាប់ប្រហារជនរងគ្រោះ បណ្តាលឱ្យស្លាប់តែគេពុំបានស្គាល់ មុខជនសង្ស័យទេដោយសារតែកន្លែងកើតហេតុមានសភាពងងឹត។
ទាក់ទងនិងអំពើឃាតកម្មនេះត្រូវបានសមត្ថកិច្ចធ្វើការស្និដ្ឋានថា ជនសង្ស័យប្រហែលខឹងលួចជ័រកៅស៊ូមិនបានព្រោះមានឆ្មាំការពារទើបមានកំហឹងមកកាប់ប្រហារឆ្មាំយាមចម្ការកៅស៊ូតែម្តង។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ