ខេត្តបន្ទាយមានជ័យ ៖ បុរសម្នាក់ផឹកស្រាស្រវឹងជោកជាំក្នុងក្លឹបហ្គោលឌិន(បឹងឈូក) បានជេរប្រមាថគេឯងត្រូវបានសន្តិសុខ ឃាត់ខ្លួនប្រគល់ឱ្យកងរាជអាវុធហត្ថខេត្តបន្ទាយមានជ័យ កាលពីវេលាម៉ោង១១ យប់ ថ្ងៃទី២០ សីហា ២០១៤ ស្ថិតក្នុងភូមិ១ សង្កាត់ព្រះពន្លា ក្រុងសិរីសោភ័ណ។
សមត្ថកិច្ចប៉េអឹមបានឱ្យដឹងថា បុរសជាជនសង្ស័យដែលឃាត់ខ្លួនឈ្មោះ យឹង ថន អាយុ៣១ឆ្នាំ រស់នៅក្នុងភូមិសូភី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។ សមត្ថកិច្ចបានបន្តថាមូលហេតុដែលឃាត់ខ្លួនបុរសខាងលើនេះគឺដោយសារតែបុរសខាងលើនេះផឹកស្រវឹងជោកជាំស្រែកឡូឡានៅក្នុងក្លឹបហ្គោលឌិន (បឹងឈូក) បង្កភាពចលាចល ។ដើម្បីបញ្ជៀសកុំឱ្យមានបញ្ហាកើតឡើងសន្តិសុខនៅទីនោះបាននាំជនសង្ស័យចេញពីក្លឹបស្រាប់តែជននោះបានជេរប្រមាថ មើលថោកដល់កម្លាំងសន្តិសុខ ហើយជននេះបានអួតក្អេងក្អាងថារូបគេមានបងប្អូនធ្វើធំមិនខ្លាចអ្នកណាទេ។
កម្លាំងកងរាជអាវុធហត្ថបានអន្តរាគមន៍នាំខ្លួនបុរសខាងលើមកកាន់ទីបញ្ជាការដើម្បីធ្វើការព្រមាននិងអប់រំណែនាំមិនឱ្យប្រព្រិត្តខុសច្បាប់ទៅថ្ងៃក្រោយឡើយ។
ចែករំលែកព័តមាននេះ